AKP កំពង់ធំ ថ្ងៃទី២៤ ខែឧសភា ឆ្នាំ២០២៥-- ឯកឧត្តមឱសថការី បាន បុត្តា អនុរដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាគណៈឱសថការីជាតិអាណត្តិទី៣ តំណាងដ៏ខ្ពង់ខ្ពស់ឯកឧត្តម ឈាង រ៉ា រដ្ឋមន្ត្រីក្រសួងសុខាភិបាល លោក ប៉ឹក គឹមសាន អនុប្រធានមន្ទីរសុខាភិបាលខេត្ត លោកឱសថការី ជិន ប៉ូលីណា ប្រធានក្រុមប្រឹក្សាគណៈឱសថការីខេត្តកំពង់ធំនិងឯកឧត្តម លោកជំទាវ លោក លោកស្រីជាច្រើនរូប បានអញ្ជើញចូលរួមក្នុងពិធីសំណេះសំណាលផ្សព្វផ្សាយក្រមសីលធម៌ឱសការី និងរបាយការណ៍សន្និបាតក្រុមប្រឹក្សាគណៈឱសថការីជាតិ អាណត្តិទី២ នាព្រឹកថ្ងៃទី២៤ ខែឧសភា ឆ្នាំ២០២៥ នៅសាលប្រជុំមន្ទីរសុខាភិបាលខេត្តកំពង់ធំ។

លោក ប៉ឹក គឹមសាន អនុប្រធានមន្ទីរសុខាភិបាលខេត្តកំពង់ធំ បានលើកឡើងពីសកម្មភាពសម្រាប់ទិសដៅឆ្នាំ២០២៥នេះ ដោយផ្អែកលើយុទ្ធសាស្ត្របញ្ចកោណរបស់រាជរដ្ឋាភិបាល មន្ទីរសុខាភិបាលមានអង្គភាពប្រតិបត្តិចំនួន៤ គឺ៖ ១.មន្ទីរពេទ្យខេត្តកំពង់ធំ ២.ការិយាល័យសុខាភិបាលស្រុកប្រតិបត្តិកំពង់ធំដែលគ្របដណ្តប់មណ្ឌលសុខភាពចំនួន២៣។ ៣. ការិយាល័យសុខាភិបាលស្រុកប្រតិបត្តិបារាយណ៍ សន្ទុកដែលគ្របដណ្តប់មន្ទីរពេទ្យបង្អែក១ និងមណ្ឌលសុខភាពចំនួន២២ ព្រមទាំងប៉ុស្តិ៍សុខភាពចំនួន៣ និង៤. ការិយាល័យសុខាភិបាលស្រុកប្រតិបត្តិស្ទោង ដែលគ្របដណ្តប់មន្ទីរពេទ្យបង្អែក១ និងមណ្ឌលសុខភាពចំនួន១១ ព្រមទាំងប៉ុស្តិ៍សុខភាពចំនួន២។ សម្រាប់ខេត្តកំពង់ធំមាន ប្រភេទសេវាឱសថស្ថាន ឱសថស្ថានរង(ក) ឱសថស្ថានរង(ខ) និងឱសថបុរាណសរុបចំនួន១០៥កន្លែង រួមមាន៖ ប្រភេទសេវាឱសថស្ថានចំនួន៨៩កន្លែង ឱសថស្ថានរង(ក)ចំនួន១០កន្លែង ឱសថស្ថានរង (ខ) ចំនួន៥កន្លែង និងសេវាឱសថបុរាណចំនួន០១កន្លែង។

ឯកឧត្តម បាន បុត្តា បានមានប្រសាសន៍ថា អ្នកប្រកបវិជ្ជាជីវៈសំដៅដល់ឱសថការី គ្រូពេទ្យ ទន្តពេទ្យ ឆ្មប និងគិលានុបដ្ឋាក ត្រូវតែចុះបញ្ជីកាជាមួយគណៈវិជ្ជាជីវៈសុខាភិបាលរបស់ខ្លួនរៀងៗខ្លួន ហើយដាច់ខាត ត្រូវតែគោរព និងអនុវត្តតាមលិខិតប្រកាស សេចក្តីណែនាំ លិខិតបទដ្ឋានគតិយុត្តិ និងច្បាប់នានា របស់ក្រសួងសុខាភិបាលដូចជាច្បាប់ស្តីពីការគ្រប់គ្រងឱសថ ច្បាប់ស្តីពីការគ្រប់គ្រង អ្នកប្រកបវិជ្ជាជីវៈសុខាភិបាល ក្រមសីលធម៌ឱសថការី ដែនកំណត់វិជ្ជាជីវៈឱសថការី និងនិយាមវិជ្ជាជីវៈឱសថការី ដើម្បីចូលរួមចំណែកផ្តល់ការថែទាំ និងផ្តល់សេវាឱសថសាស្ត្រប្រកបដោយគុណភាព សុវត្ថិភាព និងប្រសិទ្ធភាពជូនដល់ប្រជាជនកម្ពុជាឱ្យត្រឹមត្រូវ។

ក្នុងឱកាសនោះ ឯកឧត្តមឱសថការីបានក្រើនរំលឹកដល់សមាជិកទាំងអស់ត្រូវបន្តការស្រាវជ្រាវ ពង្រឹងសមត្ថភាពរបស់ខ្លួនដោយចូលរួមវគ្គបណ្តុះបណ្តាលការអភិវឌ្ឍវិជ្ជាជីវៈបន្តដើម្បីស្នើសុំអាជ្ញាបណ្ណ និងបន្តអាជ្ញាបណ្ណឱសថការី សម្រាប់ការប្រកបវិជ្ជាជីវៈរបស់ខ្លួនដោយអនុលោមតាមច្បាប់ជាធរមាន ត្រូវមានឥរិយាបថល្អ ថ្លៃថ្នូរ ត្រូវចូលរួមថែរក្សាសុខភាពរបស់ខ្លួនឱ្យបានល្អ និងគោរពក្រមសីលធម៌ឱសថការីឱ្យបានខ្ជាប់ខ្ជួន។

ទន្ទឹមនឹងនេះ ឯកឧត្តមឱសថការី បាន បុត្តា អនុរដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាគណៈឱសថការីជាតិអាណត្តិទី៣ បានផ្ដាំផ្ញើដល់ឱសថការីដែលបានបើកឱសថស្ថាននានា នៅគ្រប់ទីកន្លែងក្នុងខេត្តកំពង់ធំទាំងអស់ ត្រូវមានអាជ្ញាបណ្ណត្រឹមត្រូវ ហើយចំពោះឱសថការីណាពុំទាន់មានអាជ្ញាបណ្ណត្រូវធ្វើអាជ្ញាបណ្ណ ព្រមទាំងរួមគ្នាលុបបំបាត់ឱសថក្លែងក្លាយដែលធ្វើឱ្យប៉ះពាល់សុខភាពដល់អ្នកទិញ និងអ្នកយកទៅប្រើប្រាស់ប្រចាំថ្ងៃ៕

ដោយ ស៊ុម វណ្ណា