AKP កំពង់ធំ ថ្ងៃទី២៤ ខែឧសភា ឆ្នាំ២០២៥-- ឯកឧត្តមបណ្ឌិត សួង ណយ ប្រធានក្រុមការងារអភិវឌ្ឍន៍សេដ្ឋកិច្ចមូលដ្ឋាន និងទីផ្សារផលិតផលខ្មែរខេត្តកំពង់ធំ កាលពីពេលថ្មីៗនេះ បានដឹកនាំវេទិកាសិក្ខាសាលាស្តីពី ដំណោះស្រាយហិរញ្ញវត្ថុក្នុងវិស័យ កសិកម្ម សិប្បកម្ម សេវាកម្មនិងពាណិជ្ជកម្មនៅសាលប្រជុំសាលាក្រុងស្ទឹងសែន ដោយមានការអញ្ជើញចូលរួមពីស្ថាប័នថ្នាក់ជាតិ មន្ទីរតាមវិស័យចំនួន៧រូប រួមមានមន្ទីរកសិកម្ម រុក្ខាប្រមាញ់និងនេសាទ មន្ទីរឧស្សាហកម្ម បច្ចេកវិទ្យា វិទ្យាសាស្រ្តនិងនវានុវត្តន៍ មន្ទីរពាណិជ្ជកម្ម  មន្ទីរធនធានទឹកឧតុនិយម  មន្ទីរអភិវឌ្ឍន៍ជនបទ មន្ទីរទេសចរណ៍ រដ្ឋបាលក្រុងស្ទឹងសែននិងការិយាល័យចំណុះរដ្ឋបាលក្រុង ចៅសង្កាត់ សហគមន៍កសិកម្មសិប្បកម្ម ស្ថាប័នហិរញ្ញវត្ថុ (ARDB,  KE,  SME Bank និង Sathapana bank) សរុបចំនួន៦១នាក់។

ឯកឧត្តមបណ្ឌិត សួង ណយ បានបញ្ជាក់ថាវេទិកាសិក្ខាសាលាបានចែករំលែកព័ត៌មានយ៉ាងច្បាស់លាស់ និងពិភាក្សាយ៉ាងសកម្មអំពី ប្រភពហិញ្ញវត្ថុពីស្ថាប័នហិរញ្ញវត្ថុខាងលើ ដែលមានការប្រាក់សមរម្យតាមវិស័យដូចជា កសិកម្ម សិប្បកម្ម ឧស្សាហកម្ម សេវាកម្ម ភស្តុភា និងពាណិជ្ជកម្ម។ ការគ្រប់គ្រង ការប្រើប្រាស់ថវិកាឱ្យចំគោលដៅ។ របៀបស្នើសុំហិរញ្ញប្បទាន និងហិរញ្ញវត្ថុ តាមរយៈការណែនាំនិងពន្យល់ដោយស្ថាប័នហិរញ្ញវត្ថុ សម្រាប់អ្នកដែលមានបំណងចង់ដាក់ពាក្យស្នើសុំ។ លក្ខខណ្ឌ ប្រភេទការប្រាក់ និងឱកាសទទួលបានកញ្ចប់ថវិកាពិសេសដូចបណ្តាស្រុកមុនៗដែរ។ មន្ទីរកសិកម្ម ឧស្សាហកម្ម ពាណិជ្ជកម្ម កិច្ចការនារី អភិវឌ្ឍន៍ជនបទ ធនធានទឹក បានឆ្លើយតប និងដោះស្រាយដោយប្រទាក់ក្រឡាគ្នាពីការដាំដុះ បង្កបង្កើនផល បច្ចេកទេសកែច្នៃវេចខ្ចប់ ចុះបញ្ជីទីផ្សារ ទឹកស្អាត ប្រព័ន្ធស្រោចស្រព និងនូវរាល់សំណួរនិងសំណូមពររបស់ប្រជាពលរដ្ឋ។

ទន្ទឹមនឹងនេះ ឯកឧត្តមបណ្ឌិតបានស្នើឱ្យរដ្ឋបាលក្រុងត្រូវចាត់តាំងជនបង្គោលតាមវិស័យឱ្យបន្តការផ្សព្វផ្សាយ ដោយសហការជាមួយ ចៅសង្កាត់ មេភូមិ សហគមន៍កសិកម្ម អាជីវករ ជនបង្គោល។ ស្ថាប័នហិរញ្ញវត្ថុបន្តសហការសម្របសម្រួល ណែនាំដល់ក្រុមផលិត សិប្បករ អាជីវករ សេវាករ ក្នុងការបំពេញឯកសារតាមលក្ខខណ្ឌដើម្បីទទួលបានឥណទាន និងថវិកាឥតសំណងពីស្ថាប័នហិរញ្ញវត្ថុទាំងនោះផងដែរ។

វេទិកានេះជាជំហានសំខាន់ក្នុងការបំពេញគោលដៅរបស់រាជរដ្ឋាភិបាលក្នុងការកាត់បន្ថយភាពក្រីក្រនិងលើកកម្ពស់ជីវភាពប្រជាពលរដ្ឋតាមរយៈការផ្តល់ដំណោះស្រាយហិរញ្ញវត្ថុដ៏ច្បាស់លាស់។ ការចូលរួមពីស្ថាប័នជាតិ និងមូលដ្ឋានបង្ហាញពីការសហការល្អរវាងភាគីពាក់ព័ន្ធ៕

ដោយ ស៊ុម វណ្ណា