AKP ភ្នំពេញ ថ្ងៃទី២៣ ខែ ឧសភា ឆ្នាំ ២០២៥

អ្នកសារព័ត៌មានដែលមានទំនួលខុសត្រូវ និងមានក្រមសីលធម៌វិជ្ជាជីវៈត្រឹមត្រូវបានចូលរួមលើកកម្ពស់ ការពារសិទ្ធិ កិត្តិយស សេចក្តីថ្លៃថ្នូរ អនាគតរបស់កុមារ និងយុវវ័យ  ហើយ អ្នកសារព័ត៌មាន ក៏ត្រូវផ្តល់នូវចំណេះដឹង និងការអប់រំដល់អ្នកអាន អ្នកស្តាប់ អ្នកទស្សនាផងដែរ។ នេះជាការលើកឡើងរបស់ ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន ក្នុងពិធីបើកសិក្ខាសាលាបណ្តុះបណ្តាលអ្នកសារព័ត៌មានស្តីពីការរក្សាសុវត្តិភាពកុមារក្នុងវិស័យសារព័ត៌មាន នៅសណ្ឋានគារសាន់វ៉េ នាព្រឹកថ្ងៃទី ២៣ ខែ ឧសភា ឆ្នាំ ២០២៥។

ឯកឧត្តម  ទេព អស្នារិទ្ធ បានគូសបញ្ជាក់ថា អ្នកសារព័ត៌មានត្រូវគោរពក្រមសីលធម៌ និងត្រូវគោរពឱ្យបានខ្ជាប់ខ្ជួននូវក្រមសីលធម៌ដែលចាំបាច់ណាស់អ្នកសារព័ត៌មានត្រូវចូលរៀនវគ្គបណ្តុះបណ្តាលឱ្យបានជាបន្តបន្ទាប់ និងធ្វើការសិក្សាស្វែងយល់ដើម្បីពង្រឹងនូវសមត្ថភាព ដែលនេះជាការយកចិត្ដទុកដាក់មួយសំខាន់សម្រាប់ការនិពន្ធអត្ថបទ ឬការបញ្ចេញមតិរបស់ខ្លួនប្រកបដោយភាពត្រឹមត្រូវ ហើយសាធារណជនទូទៅទទួលយកបាន។ ឯកឧត្តមបានបញ្ជាក់បន្ថែមថា ក្នុងចំណោមក្រមសីលធម៌នេះដែរអ្នកសារព័ត៌មានដែលធ្វើសេចក្តីរាយការណ៍ព័ត៌មានត្រូវគិតគូរផងដែរពីបញ្ហាសិទ្ធិបុគ្គល ដោយក្នុងនេះ មិនត្រូវចូលទៅផ្សព្វផ្សាយដោយធ្វើសេចក្តីរាយការណ៍ចេញពីលំនៅឋានរបស់គេដោយពុំមានការអនុញ្ញាតដែលប៉ះពាល់ធ្ងន់ធ្ងរដល់កិត្តិយស កេរ្តិ៍ឈ្មោះរបស់គេជាដើម។ ឯកឧត្ដមអ្នកនាំពាក្យក្រសួងព័ត៌មានបានថ្លែងបញ្ជាក់ទៀតថា អ្នកសារព័ត៌មានដែលមានទំនួលខុសត្រូវ និងមានក្រមសីលធម៌វិជ្ជាជីវៈត្រឹមត្រូវចូលរួមលើកកម្ពស់ ការពារសិទ្ធិ កិត្តិយស សេចក្តីថ្លៃថ្នូរ អនាគតរបស់កុមារ និងយុវវ័យ។

ជាមួយគ្នានេះ ឯកឧត្ដមអនុរដ្ឋលេខាធិការ និងជាអ្នកនាំពាក្យក្រសួងព័ត៌មានក៏បានអះអាងផងដែរថា អ្នកសារព័ត៌មានតែម្នាក់មិនទាន់គ្រប់គ្រាន់ដើម្បីអាចធានាបាននូវក្រមសីលធម៌សារព័ត៌មានសម្រាប់កុមារ និងយុវវ័យទេ គឺត្រូវមានតួនាទីផ្សេងទៀតដែរ ដូចជាអ្នកកែសម្រួលអត្ថបទ របស់ការីនិពន្ធ ដែលជាអ្នកត្រួតពិនិត្យ កែសម្រួលចំណងជើង រូបភាព សម្រួចខ្លឹមសារនៃព័ត៌មាន មុនផ្សាយ ដើម្បីធានាភាពត្រឹមត្រូវ មានទឡ្ហីករណ៍ ខ្លឹមសារគ្រប់គ្រាន់ គ្រប់ជ្រុងជ្រោយ សុក្រិតភាព និងគុណភាព។

លោក យី គឹមថាន នាយកប្រចាំប្រទេសស្តីទី នៃអង្គការភ្លែនអន្តរជាតិកម្ពុជាបានបញ្ជាក់ថា ថ្ងៃនេះយើងមានគោលបំណងរួមមួយ គឺពង្រឹងសមត្ថភាពរួមគ្នាដើម្បីរាយការណ៍ប្រកបដោយក្រមសីលធម៌ និងការទទួលខុសត្រូវលើគ្រប់បញ្ហាដែលទាក់ទងនឹងកុមារ និងយុវជន ជាពិសេសក្មេងស្រី និងស្ត្រីវ័យក្មេង ខណៈរក្សាបាននូវស្តង់ដារគាំពារខ្ពស់បំផុត។ លោកបានបន្ដថា ប្រព័ន្ធផ្សព្វផ្សាយដើរតួនាទីយ៉ាងសំខាន់ ក្នុងការបង្កើនការយល់ដឹង និងការយល់ឃើញរបស់សាធារណជន ហើយនេះជាការទទួលខុសត្រូវដ៏ធំរបស់អ្នកសារព័ត៌មាន។

លោកនាយកស្ដីទីបានបញ្ជាក់ទៀតថា យុវជន និងមនុស្សពេញវ័យ ជាពិសេសនៅពេលរាយការណ៍ពីប្រធានបទរសើប ឬប៉ះពាល់ផ្លូវចិត្ត ដែលគម្លាតនេះអាចនាំឱ្យមានផលប៉ះពាល់ដោយអចេតនា រួមមានការប៉ះពាល់ផ្លូវចិត្ត ឬការរើសអើងយូរអង្វែង។

លោក យី គឹមថាន បានឱ្យដឹងទៀតថា វគ្គបណ្តុះបណ្តាលនេះ គឺមិនគ្រាន់តែបង្កើនការយល់ដឹងពីគោលការណ៍ណែនាំ និងគោលការណ៍រក្សាសុវត្ថិភាព សេចក្តីថ្លៃថ្នូរ និងសិទ្ធិប៉ុណ្ណោះទេ យើងក៏នឹងផ្តល់ជូននូវឧបករណ៍ជាក់ស្តែង និងក្របខ័ណ្ឌក្រមសីលធម៌ដល់អ្នកចូលរួមផងដែរ៕

ដោយ៖ មករា