AKP ភ្នំពេញ ថ្ងៃទី២៣ ខែឧសភា ឆ្នាំ២០២៥-- ប្រព័ន្ធអេកូឡូស៊ីសមុទ្រ និងតំបន់ឆ្នេរកម្ពុជា មានដូចជាផ្កាថ្មប៉ប្រះទឹក រុក្ខជាតិនៅបាតសមុទ្រ ដើមកោងកាង ផ្តល់ទីជម្រកដល់ជីវៈចម្រុះពិសេស។ ពួកវាមានសារសំខាន់សម្រាប់សន្តិសុខស្បៀងអាហារ ការទ្រទ្រង់ជីវភាពសហគមន៍តំបន់ឆ្នេរ និងភាពធន់ប្រឈមទៅនឹងបម្រែបម្រួលអាកាសធាតុ។ ទោះជាយ៉ាងណាក្តី ធនធានទាំងនេះកាន់តែទទួលរងការគំរាមកំហែងដោយសារការនេសាទលើសកម្រិត ភាពសឹករេចរឹលនៃទីជម្រក និងបម្រែបម្រួលអាកាសធាតុ។

ប្រភពពីគម្រោង “ការនេសាទតាមតំបន់ឆ្នេរ និងសមុទ្រប្រកបដោយចីរ បានឱ្យដឹងនៅថ្ងៃទី២២ ខែឧសភា ឆ្នាំ២០២៥ថា ដើម្បីឆ្លើយតបទៅនឹងបញ្ហាប្រឈមទាំងនេះ គម្រោងនេះទទួលបានជំនួយផ្នែកហិរញ្ញវត្ថុពីទីភ្នាក់ងារបារាំងសម្រាប់អភិវឌ្ឍន៍ (AFD) និងធនាគារអភិវឌ្ឍន៍អាស៊ី ជួយជ្រោមជ្រែងអន្តរកាលទៅកាន់ការនេ សាទប្រកបដោយចីរភាព និងមិនប៉ះពាល់ដល់ជីវៈចម្រុះ។ នៅតាមមូលដ្ឋាន អង្គការក្រៅរដ្ឋាភិបាល  Marine Conservation Cambodia (MCC) ដើរតួនាទីសំខាន់ ដោយតាមដានជីវៈចម្រុះសមុទ្រប្រកបដោយលក្ខណៈវិទ្យាសាស្រ្ត ស្តារទីជម្រក (ថ្មប៉ប្រះទឹក រុក្ខជាតិបាតសមុទ្រ) ជួយជ្រោមជ្រែងដល់សហគមន៍មូលដ្ឋានដើម្បីគ្រប់គ្រងប្រព័ន្ធអេកូឡូស៊ីនៃធនធាន ជាពិសេសជុំវិញកោះរ៉ុងសន្លឹម។ 

គម្រោង “ការនេសាទតាមតំបន់ឆ្នេរ និងសមុទ្រប្រកបដោយចីរភាព” មានគោលដៅចំនួនបួនគឺ៖ ទី១. ការពារជម្រក និងសត្វសមុទ្រ ទី២. លើកកម្ពស់ការនេសាទជាលក្ខណៈសហគមន៍ប្រកបដោយចីរភាព ទី៣. ពង្រឹងភាពធន់នៃតំបន់ឆ្នេរប្រឈមនឹងអាកាសធាតុ និងទី៤. ជួយជ្រោមជ្រែងដល់ការអភិវឌ្ឍប្រកបដោយបរិយាបន្ន និងដែលគោរពជីវៈចម្រុះ៕

ដោយ ណយ នឿន