AKP ភ្នំពេញ ថ្ងៃទី ២៣ ខែឧសភា ឆ្នាំ ២០២៥--ដោយសារតែឆ្នាំ២០២៥នេះ សេដ្ឋកិច្ចកម្ពុជា ក៏ដូចជាសេដ្ឋកិច្ចនៅក្នុងតំបន់ បានចាប់ផ្ដើមងើបឡើងវិញបន្ដិច  ម្ដងៗនោះ ជាពិសេសអ្នកវិនិយោគបរទេសដែលបានចាប់អារម្មណ៍ និងមើលឃើញពីសក្ដានុពលរបស់កម្ពុជាលើវិស័យអចលនព្រទ្យ ការទិញខុនដូរសម្រាប់ការស្នាក់នៅ និងការរស់នៅរបស់ជនបរទេស ក៏ដូចជាប្រជាជន    កម្ពុជាមានការកើនឡើងគួរឱ្យកត់សម្គាល់ផងដែរនោះ ក្រុមហ៊ុន Econ Group និងក្រុមហ៊ុន Picasso បានចុះអនុស្សរណៈនៃការយោគយល់គ្នា ដើម្បីធ្វើកិច្ចសហការយុទ្ធសាស្ត្រលើវិស័យអចលនទ្រព្យ ជាពិសេសការសាងសង់ខុនដូរនៅកម្ពុជា។

ក្រុមហ៊ុន Econ Group ដឹកនាំដោយអ្នកឧកញ៉ា បណ្ឌិត យូ សាម៉េត ដែលជាក្រុមហ៊ុនអភិវឌ្ឍន៍លើពហុវិស័យដូចជា អចលនទ្រព្យ នាំចូលអាហាបំប៉ន និងភោជនីយដ្ឋានក្នុងព្រះរាជាណាចក្រកម្ពុជា និងក្រុមហ៊ុន Picasso ដឹកនាំដោយលោក Teng Cheng Yueh ដែលជាក្រុមហ៊ុនវិនិយោគ និងអភិវឌ្ឍន៍លើវិស័យអចលនទ្រព្យ នៅរសៀលថ្ងៃទី២២ ខែឧសភា ឆ្នាំ២០២៥ បានចុះហត្ថលេខាលើអនុស្សរណៈនៃការយោគយល់គ្នា (MOU) ដើម្បីធ្វើកិច្ចសហការយុទ្ធសាស្ត្ររវាងក្រុមហ៊ុនទាំងពីរ។ កិច្ចសហការនេះ នឹងបង្រួបបង្រួមចំណេះដឹង បទពិសោធន៍ និងសក្តានុពលរបស់ភាគីទាំងពីរ ដើម្បីជំរុញឱ្យការអភិវឌ្ឍគម្រោងអចលនទ្រព្យមានប្រសិទ្ធភាព និងទទួលបានភាពជោគជ័យ ជាពិសេសលើវិស័យខុនដូរនៅកម្ពុជា។

កិច្ចព្រមព្រៀងនេះគឺជាការផ្តើមយុទ្ធសាស្ត្រសម្រាប់ក្រុមហ៊ុនទាំងពីរក្នុងការរួមគ្នាបង្កើតដំណោះស្រាយបញ្ហាអចលនទ្រព្យដែលកំពុងជាប់គាំងក្នុងព្រះរាជាណាចក្រកម្ពុជា ដោយផ្សារភ្ជាប់ការអភិវឌ្ឍន៍គុណភាពខ្ពស់របស់ក្រុមហ៊ុន Picasso ជាមួយសមត្ថភាពគ្រប់គ្រង និងបណ្តាញទីផ្សាររបស់ក្រុមហ៊ុន Econ Group។ ជាមួយនឹងកិច្ចសហការនេះ អតិថិជននឹងទទួលបានអត្ថប្រយោជន៍ពីគម្រោងដែលមានភាពខុសប្លែក និងស៊ីជម្រៅទាំងក្នុងវិស័យលំនៅឋាន ពាណិជ្ជកម្ម និងសេវាកម្ម។

អ្នកឧកញ៉ាបណ្ឌិត យូ សាម៉េត ស្ថាបនិកនៃក្រុមហ៊ុន Econ Group និងជាប្រធានគណៈកម្មការអាស៊ីប៉ាស៊ីហ្វិក(APC-Cambodia)ដែលផ្តោតទៅលើការកៀរគរអ្នកវិនិយោគមកពីក្រៅប្រទេសឱ្យចូលមកកម្ពុជាបានលើកឡើងថាកិច្ចសហការនេះគឺជាជំហានដ៏សំខាន់មួយក្នុងការពង្រីកសកម្មភាពអាជីវកម្មរបស់ Econ Group ហើយ យើងមានជំនឿថា ការរួមដៃជាមួយ Picasso ដែលមានគោលបំណងដូចគ្នា នឹងជួយឱ្យយើងផ្តល់នូវតម្លៃបន្ថែមដល់អតិថិជន និងជម្នះឧបសគ្គក្នុងការចូលទៅកាន់ទីផ្សារថ្មី។ អ្នកឧកញ៉ាបានបញ្ជាក់ថា៖«យើងពិតជាមានមោទនភាពដែលបានសហការជាមួយក្រុមហ៊ុន Picasso ដែលជាក្រុមហ៊ុនធំមួយ និងមានបទពិសោធន៍ដ៏ក្រាស់ក្រែលក្នុងការវិនិយោគ និងអភិវឌ្ឍន៍គម្រោងអចលទ្រព្យនៅកម្ពុជា»។  

អ្នកឧកញ៉ាបណ្ឌិត យូ សាម៉េត បានកត់សម្គាល់ឃើញថា កាលពីមុនបងប្អូនប្រជាជនកម្ពុជាមិនសូវចាប់អារម្មណ៍​ជាមួយខុនដូរនោះទេ ប៉ុន្ដែងាកមកចាប់អារម្មណ៍ពេលដែលខុនដូរបានរីកដុះដាលច្រើន និងបានចាប់អារម្មណ៍ចំពោះការរស់នៅក្នុងខុនដូរដែលជាកន្លែងរស់នៅជាលក្ខណៈឯកជនងាយស្រួល។ អ្នកឧកញ៉ាបានឱ្យដឹងទៀតថា បច្ចុប្បន្នប្រទេសដែលនៅជុំវិញអាស៊ីប៉ាស៊ីហ្វិកក៏បានឈានចូលមកប្រទេសកម្ពុជាក្នុងការវិនិយោគកាន់តែច្រើននៅក្នុងឆ្នាំ២០២៥នេះ ហើយសេដ្ឋកិច្ចកម្ពុជាយើងក៏នឹងចាប់ផ្ដើមរើបឡើងវិញពីឆ្នាំ២០២៥ ឡើងទៅ ដោយងើបឡើងវិញម្ដងបន្ដិចៗ រហូតដល់ឆ្នាំ២០៣០ ដោយអ្នកឧកញ៉ារំពឹងទុកថា អ្នករកស៊ីសាងសង់ខុនដូរ ការលក់ខុនដូរ និងលក់ផ្ទះផ្សេងៗទៀត នឹងមានស្ថានភាពល្អឡើងវិញ។ អ្នកឧកញ៉ាបានបញ្ជាក់បន្ថែមថា៖  «អ្វីដែលចាប់អារម្មណ៍ខ្លាំងនោះ គឺអ្នកនៅក្រៅប្រទេសបានមករកទិញខុនដូរច្រើននៅក្នុងប្រទេសកម្ពុជា ដូច្នេះ អចលនទ្រព្យនៅក្នុងឆ្នាំ២០២៥នេះ នឹងចាប់ផ្ដើមរើបឡើងវិញបន្ដិចម្ដងៗ»។ 

ក្នុងឱកាសនោះ អ្នកឧកញ៉ាបានថ្លែងឱ្យដឹងទៀតថា តាមរយៈការចុះអនុស្សរណៈចាប់ដៃគូសហការជាមួយ ក្រុមហ៊ុន Picasso នេះ នឹងទទួលបានជោគជ័យលើវិស័យអចលនទ្រព្យខុនដូរ ដោយមើលឃើញថា Picasso ជាក្រុមហ៊ុនមកពីក្រៅប្រទេស ហើយការសាងសង់ក៏មានស្ដង់ដារខ្ពស់ ជាពិសេសក្រុមហ៊ុនមានភាពជោគជ័យនៅក្នុងវិស័យខុនដូរនេះជាយូរឆ្នាំណាស់មកហើយ។

សម្រាប់កិច្ចសហការរវាងក្រុមហ៊ុនទាំងពីរនេះ ក៏រំពឹងថានឹងជំរុញឱ្យមានការរីកចម្រើនយ៉ាងឆាប់រហ័សក្នុងវិស័យអចលនទ្រព្យនៅកម្ពុជា ដោយផ្តោតលើការបំពេញតម្រូវការអ្នកប្រើប្រាស់តាមរយៈសេវាកម្មដ៏ពិសេស និងគម្រោងដែលមានស្តង់ដារអន្តរជាតិ ហើយភាគីទាំងពីរនឹងធ្វើការជាមួយគ្នាយ៉ាងជិតស្និទ្ធដើម្បីឆ្លើយតបទៅនឹងការវិវត្តថ្មីៗនៃទីផ្សារកម្ពុជា។

លោក Teng Cheng Yueh បានឱ្យដឹងដែរថា ក្រុមហ៊ុន Picasso មានក្តីរំភើបរីករាយក្នុងការធ្វើកិច្ចសហការជាមួយក្រុមហ៊ុន Econ Group ហើយយើងនឹងរួមគ្នាផ្តល់នូវគុណតម្លៃបន្ថែមដល់អតិថិជន និងបង្កើតគម្រោងអភិវឌ្ឍន៍របស់យើងឱ្យកាន់តែមានភាពល្អប្រសើរ និងស៊ីជម្រៅទៅក្នុងទីផ្សារកម្ពុជា។  

សូមជម្រាបជូនថា ក្រុមហ៊ុន Econ Group គឺជាក្រុមហ៊ុនជំនាញខាងការគ្រប់គ្រង និងទីផ្សារអចលនទ្រព្យ និងនាំចូលអាហារបំប៉នរួមវិស័យភោជនីយដ្ឋាន ដែលមានប្រព័ន្ធផ្សព្វផ្សាយទូលំទូលាយ និងបទពិសោធន៍ក្នុងការផ្តល់ដំណោះស្រាយរួមគ្នាដល់អ្នកវិនិយោគ។  ចំណែក ក្រុមហ៊ុន Picasso ជាអ្នកអភិវឌ្ឍន៍អចលនទ្រព្យដ៏ធំមួយ ដែលស្ថិតនៅជួរមុខខាងការបង្កើតគម្រោងអភិវឌ្ឍន៍អចលទ្រព្យដែលមានច្នៃប្រឌិត និងផ្តោតទៅលើគុណភាព និងបរិយាកាសរស់នៅ៕

ដោយ៖ រិទ្ធី