AKP បន្ទាយមានជ័យ ថ្ងៃទី២៣ ខែឧសភា ឆ្នាំ២០២៥--លោក ឈឿន ក្រៃយ៉ុង អភិបាលរងខេត្តបន្ទាយមានជ័យ តំណាងឯកឧត្តម អ៊ុំ រាត្រី អភិបាលនៃគណៈអភិបាលខេត្ត កាលពីថ្ងៃទី២២ ខែឧសភា ឆ្នាំ២០២៥ បានអញ្ជើញជាអធិបតីក្នុងសិក្ខាសាលាបូកសរុបលទ្ធផលសម្រេចបានរបស់គម្រោង និងបិទបញ្ចប់គម្រោង "លើកកម្ពស់សន្តិសុខស្បៀង អាហារូបត្ថម្ភ និងបន្សាំទៅនឹងបម្រែបម្រួលអាកាសធាតុរបស់គ្រួសារកសិករងាយរងគ្រោះ" នៅសាលប្រជុំ(ខ) សាលាខេត្តបន្ទាយមានជ័យ ដោយមានការចូលរួមពីតំណាងអង្គការដៃគូអភិវឌ្ឍន៍ មន្ត្រីជំនាញ មន្ទីរ អង្គភាពពាក់ព័ន្ធ និងតំណាងប្រជាពលរដ្ឋជាច្រើនរូប។

ក្នុងឱកាសនោះ លោក ឈឿន ក្រៃយ៉ុង បានថ្លែងអំណរគុណយ៉ាងជ្រាលជ្រៅចំពោះអង្គការដៃគូអភិវឌ្ឍន៍ ដែលបានគាំទ្រ និងអនុវត្តគម្រោងដ៏មានសារៈសំខាន់នេះ នៅក្នុងខេត្តបន្ទាយមានជ័យ។ គម្រោងនេះបានដើរតួនាទីយ៉ាងសំខាន់ក្នុងការលើកកម្ពស់ជីវភាពរស់នៅរបស់ប្រជាកសិករងាយរងគ្រោះ តាមរយៈការបង្កើនសន្តិសុខស្បៀង លើកកម្ពស់អាហារូបត្ថម្ភ និងជួយឱ្យពួកគាត់មានលទ្ធភាពបន្សាំខ្លួនទៅនឹងបម្រែបម្រួលអាកាសធាតុ ដែលជាបញ្ហាប្រឈមសកល។

ទន្ទឹមនឹងនេះ លោកអភិបាលរងខេត្តបានសង្កត់ធ្ងន់ថា "គម្រោងនេះមិនត្រឹមតែបានបង្រៀនបច្ចេកទេសកសិកម្មថ្មីៗដល់ប្រជាពលរដ្ឋប៉ុណ្ណោះទេ ប៉ុន្តែក៏បានជួយឱ្យពួកគាត់យល់ដឹងកាន់តែស៊ីជម្រៅអំពីរបៀបគ្រប់គ្រងធនធានទឹក ការប្រើប្រាស់ពូជដំណាំធន់ទ្រាំនឹងអាកាសធាតុ និងការអនុវត្តកសិកម្មធម្មជាតិ ដើម្បីធានាបាននូវទិន្នផលខ្ពស់ និងនិរន្តរភាពនៃផលិតកម្មស្បៀង។ នេះគឺជាមូលដ្ឋានគ្រឹះដ៏រឹងមាំមួយក្នុងការកសាងសហគមន៍ឱ្យមានភាពធន់ និងអាចសម្របខ្លួនទៅនឹងបញ្ហាប្រឈមនានា។"

លោកក៏បានបន្ថែមទៀតថា "ខ្ញុំសូមជំរុញឱ្យបងប្អូនប្រជាពលរដ្ឋទាំងអស់ ដែលបានទទួលផលពីគម្រោងនេះ បន្តអនុវត្តនូវចំណេះដឹង និងបទពិសោធន៍ដែលបានរៀនសូត្រ ទៅក្នុងជីវភាពប្រចាំថ្ងៃរបស់ខ្លួន ដើម្បីធានាបាននូវនិរន្តរភាពនៃសន្តិសុខស្បៀង និងអាហារូបត្ថម្ភសម្រាប់គ្រួសារ។ អាជ្ញាធរខេត្តនៅតែបន្តយកចិត្តទុកដាក់ និងគាំទ្រដល់កិច្ចខិតខំប្រឹងប្រែងទាំងអស់នេះ។"

ជាមួយគ្នានោះ តំណាងអង្គការដៃគូអភិវឌ្ឍន៍បានបង្ហាញពីក្តីរំភើបចំពោះលទ្ធផលដ៏ល្អប្រសើរនៃគម្រោង ដោយបញ្ជាក់ថា ការសហការគ្នាយ៉ាងជិតស្និទ្ធរវាងអាជ្ញាធរមូលដ្ឋាន មន្ត្រីជំនាញ និងប្រជាពលរដ្ឋ គឺជាកត្តាគន្លឹះនៃភាពជោគជ័យនេះ។ ពួកគាត់បានលើកឡើងពីគំរូជោគជ័យជាច្រើន ដែលប្រជាកសិករបានអនុវត្តបច្ចេកទេសកសិកម្មទំនើបៗ និងទទួលបានទិន្នផលគួរជាទីមោទនៈ។

ទន្ទឹមនឹងនេះ អ្នកស្រី សេង ម៉ាលី តំណាងកសិករម្នាក់មកពីស្រុកមង្គលបូរី បានលើកឡើងថា "កាលពីមុន ខ្ញុំតែងតែបារម្ភពីបញ្ហាស្បៀងអាហារ ជាពិសេសនៅរដូវប្រាំង។ ប៉ុន្តែចាប់តាំងពីបានចូលរួមជាមួយគម្រោងនេះ ខ្ញុំបានរៀនពីរបៀបដាំដុះដំណាំចម្រុះ និងចិញ្ចឹមសត្វ ដែលជួយឱ្យគ្រួសារខ្ញុំមានចំណូលបន្ថែម និងមានស្បៀងគ្រប់គ្រាន់សម្រាប់បរិភោគពេញមួយឆ្នាំ។ លើសពីនេះ ខ្ញុំក៏បានយល់ដឹងពីរបៀបថែរក្សាដី និងទឹក ដើម្បីកុំឱ្យប៉ះពាល់ដល់បរិស្ថាន។"

សូមជម្រាបថា សិក្ខាសាលានេះបានបិទបញ្ចប់ទៅដោយបរិយាកាសរីករាយ និងស្និទ្ធស្នាល បន្ទាប់ពីការបង្ហាញរបាយការណ៍បូកសរុបលទ្ធផល ការផ្លាស់ប្តូរបទពិសោធន៍ និងការប្រគល់វិញ្ញាបនបត្រជូនដល់អ្នកចូលរួម និងដៃគូពាក់ព័ន្ធ។ គម្រោង "លើកកម្ពស់សន្តិសុខស្បៀង អាហារូបត្ថម្ភ និងបន្សាំទៅនឹងបម្រែបម្រួលអាកាសធាតុ របស់គ្រួសារកសិករងាយរងគ្រោះ" បានបន្សល់ទុកនូវសមិទ្ធផលជាច្រើន ដែលនឹងបន្តរួមចំណែកដល់ការអភិវឌ្ឍសេដ្ឋកិច្ច និងសង្គមក្នុងខេត្តបន្ទាយមានជ័យ ប្រកបដោយចីរភាព៕

ដោយ ឈុន សារ៉ាត