AKP កំពង់ធំ ថ្ងៃទី២៣ ខែឧសភា ឆ្នាំ២០២៥-- ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ បានមានប្រសាសន៍ថា វត្តអារាមដើរតួនាទីយ៉ាងសំខាន់ក្នុងសង្គមខ្មែរជាទីពឹងពំនាក់ ជាបង្អែកផ្លូវចិត្ត ជាកន្លែងសម្រាប់សាងនូវបុណ្យកុសលគ្រប់បែបយ៉ាង និងជាឃ្លាំងចំណេះដឹង។ នេះជាការលើកឡើងរបស់ឯកឧត្តមអភិបាលខេត្តក្នុងពិធីសម្ពោធឆ្លងឧបដ្ឋានសាលាធម្មសភា និងសមិទ្ធផលនានានៅក្នុងវត្តក្តីចារ៍ ហៅវត្តសុជុល ស្ថិតនៅឃុំផាន់ញើម ស្រុកប្រាសាទបល្ល័ង្ក ខេត្តកំពង់ធំ កាលពីរសៀលថ្ងៃទី២២ ខែឧសភា ឆ្នាំ២០២៥។

ឯកឧត្តម នួន ផារ័ត្ន បានមានប្រសាសន៍ថា វត្តអារាមគឺជាបណ្ណាល័យ ជាសារមន្ទីរនៃវប្បធម៌អក្សរសាស្ត្រជាតិនៅគ្រប់សម័យកាល ប៉ុន្តែគួរឱ្យសោកស្តាយបំផុតនៅក្នុងរបបប្រល័យពូជសាសន៍ ប៉ុល ពត វត្តអារាមត្រូវបានគេបំភ្លេចចោល។ ព្រះសង្ឃដែលជាអ្នកមានចំណេះដឹង ត្រូវបានពួកយង់ឃ្នងចាប់ផ្សឹក សៀវភៅធម៌អាថ៌ ក្បួនច្បាប់ផ្សេងៗពាក់ព័ន្ធព្រះពុទ្ធសាសនាត្រូវបានបំផ្លាញខ្ទេចខ្ទីស្ទើរគ្មានសល់។ បច្ចុប្បន្ននេះដោយសារប្រទេសកម្ពុជាទទួលបានសុខសន្តិភាពពេញលេញ វត្តអារាមបានរីកដុះដាលគ្រប់កន្លែង។ ជាក់ស្តែងវត្តនៅទូទាំងខេត្តកំពង់ធំបានកើនរហូតដល់២៩៧វត្ត និងមានអាស្រម២២កន្លែង ដែលមានព្រះសង្ឃគង់នៅសរុបចំនួន ៣៧១២អង្គ។

ឯកឧត្តមអភិបាលខេត្តបានបន្ថែមទៀតថា ការដែលយើងទាំងអស់គ្នាមានឱកាសរៀបចំពិធីដ៏អធិកអធមនៅពេលនេះក៏ដោយសារកម្ពុជារក្សាបាននូវស្ថិរភាពនយោបាយ ជាពិសេសគឺកត្តាសុខសន្តិភាពដែលកើតចេញពីការយកអាយុជីវិតធ្វើជាដើមទុន និងការខិតខំប្រឹងប្រែងរបស់រាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ក្នុងការសង្គ្រោះជាតិមាតុភូមិ កសាងបាននូវសុខសន្តិភាព និងការបន្តអភិវឌ្ឍប្រទេសជាតិក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ឯកឧត្តមអភិបាលខេត្តបានអំពាវនាវដល់គណៈកម្មការអាចារ្យវត្ត ពុទ្ធបរិស័ទចំណុះជើងវត្ត និងអាជ្ញាធរមូលដ្ឋាន សូមចូលរួមថែរក្សាសមិទ្ធផលនានាដែលបានកសាងរួចនៅក្នុងបរិវេណវត្ត និងរៀបចំបរិស្ថានឱ្យបានស្អាតដើម្បីឱ្យពុទ្ធបរិស័ទមកគោរពបូជារៀងរាល់ថ្ងៃសីល និងកម្មវិធីបុណ្យទានផ្សេងៗ ព្រោះព្រះពុទ្ធសាសនា ជាសាសនារបស់រដ្ឋ។

សូមបញ្ជាក់ថា ឧបដ្ឋានសាលាធម្មសភា (សាលាឆាន់) នេះចាប់ផ្ដើមកសាងឡើងនៅឆ្នាំ២០១៩ហើយបានសាងសង់រួចជាស្ថាពរនៅឆ្នាំ២០២៥មានបណ្ដោយប្រវែង៣០ម៉ែត្រ ទទឹងប្រវែង២៥ម៉ែត្រ និងកម្ពស់១៥ម៉ែត្រ៕

ដោយ ស៊ុម វណ្ណា