AKP ព្រះសីហនុ ថ្ងៃទី២៣ ខែឧសភា ឆ្នាំ២០២៥--លោក ឡុង ឌីម៉ង់ អភិបាលរងនៃគណៈអភិបាលខេត្តព្រះសីហនុ តំណាងដ៏ខ្ពង់ខ្ពស់ឯកឧត្តម អភិបាលនៃគណៈអភិបាលខេត្តព្រះសីហនុ អមដំណើរឯកឧត្តម ស្សី គុនលីន អភិបាលខេត្តជាំងស៊ូ និងឯកឧត្តម វាំង វិនពីន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំប្រទេសកម្ពុជា បានអញ្ជើញជាអធិបតីក្នុងពិធីចែកអាហារសប្បុរសធម៌នៃក្ដីស្រឡាញ់ ក្រោមគម្រោង «ស្នាមញញឹមកុមារកម្ពុជា» ជូនដល់សិស្សានុសិស្សចំនួន ៥០០នាក់ នៅសាលាបឋមសិក្សា និងអនុវិទ្យាល័យបិតត្រាំង មិត្តភាពព្រះសីហុ ជាំងស៊ូ ស្ថិតនៅសង្កាត់បិតត្រាំង ក្រុងកំពង់សោម ខេត្តព្រះសីហនុ កាលពីរសៀលថ្ងៃព្រហស្បតិ៍ ទី២២ ខែឧសភា ឆ្នាំ២០២៥។

គម្រោងចែកអាហារសប្បុរសធម៌នៃក្ដីស្រឡាញ់របស់អភិបាលខេត្តជាំងស៊ូ នាពេលនេះ គឺនឹងចាប់ផ្តើមអនុវត្តចាប់ពីថ្ងៃទី២២ ខែឧសភា រហូតដល់ថ្ងៃទី៣១ ខែធ្នូ ឆ្នាំ២០២៥ ដោយធ្វើការបែងចែកចំនួន៤ដង ក្នុងមួយខែ ក្រោមការជួយឧបត្ថម្ភគាំទ្រពីសមាគមសប្បុរសធម៌ អ៊ូស៊ី លីងសាន ខេត្តជាំងស៊ូ។

សូមជម្រាបជូនថា ខេត្តជាំងស៊ូ និងខេត្តព្រះសីហនុ មានកិច្ចសហប្រតិបត្តិការដោយផ្តោតសំខាន់ទៅលើសេវាអប់រំ សុខាភិបាល និងវិស័យមួយចំនួនទៀត ហើយកន្លងមក ខេត្តជាំងស៊ូ បានជួយកែលម្អបន្ទប់ទឹកនៅក្នុងសាលាបឋម និងអនុវិទ្យាល័យមិត្តភាពព្រះសីហនុ ជាំងស៊ូ ក៏ដូចជាការរៀបចំកែលម្អសោភ័ណភាពសួនច្បារនៅក្នុងបរិវវេណសាលា និងមានការជួសជុលអគារសិក្សារ។ ទន្ទឹមនោះ ខេត្តជាំងស៊ូក៏បានបញ្ជូនក្រុមគ្រូពេទ្យស្ម័គ្រចិត្តមកជួយពិនិត្យព្យាបាលជំងឺជូនសិស្សានុសិស្ស និងប្រជាពលរដ្ឋក្នុងខេត្តព្រះសីហនុបានជាច្រើនលើកផងដែរ៕

ដោយ ងូ សុមុនី