AKP ភ្នំពេញ ថ្ងៃទី២២ ខែឧសភា ឆ្នាំ២០២៥ -- បញ្ហាមេរោគអេដស៍ និងជំងឺអេដស៍ នៅក្នុងប្រទេសយើងនេះបានជំរុញឱ្យយើងទាំងអស់គ្នា ត្រូវយកចិត្តទុកដាក់ប្រឹងប្រែងចូលរួមប្រយុទ្ធប្រឆាំងតាមសមត្ថកិច្ច និងលទ្ធភាពរៀងៗខ្លួន។ ជាការពិតណាស់រាជរដ្ឋាភិបាលកម្ពុជាដែលមានអាជ្ញាធរជាតិប្រយុទ្ធនឹងជំងឺអេដស៍ជាអ្នកទទួលបន្ទុកផ្ទាល់លើសកម្មភាពប្រយុទ្ធនឹងជំងឺអេដស៍។ នេះជាការថ្លែងបញ្ជាក់ពីសំណាក់ ឯកឧត្តម ធៀង វណ្ណដារ៉ុង ប្រធានគណៈកម្មាធិការប្រយុទ្ធនឹងជំងឺអេដស៍ និងជាអនុរដ្ឋលេខាធិការប្រចាំក្រសួងវប្បធម៌ និងវិចិត្រសិល្បៈ។

បញ្ជាក់ក្នុងសិក្ខាសាលាស្តីពី “ការឆ្លើយតបនឹងមេរោគអេដស៍ និងជំងឺអេដស៍ក្នុងវិស័យវប្បធម៌” នៅថ្ងៃទី២២ ខែ ឧសភា ឆ្នាំ២០២៥ ឯកឧត្តម ធៀង វណ្ណដារ៉ុង បានមានប្រសាសន៍ថា ក្រសួងវប្បធម៌ និងវិចិត្រសិល្បៈ តែងតែបានយកចិត្តទុកដាក់ចូលរួមជាប្រចាំ ទន្ទឹមគ្នាជាមួយនឹងក្រសួង/ស្ថាប័នទាំងអស់ក្នុងសកម្មភាពជាពហុវិស័យរបស់រាជរដ្ឋាភិបាល ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តែងតែយកចិត្តទុកដាក់បំផុតចំពោះបញ្ហាមេរោគអេដស៍ និងជំងឺអេដស៍នេះ។

ជាមួយគ្នានេះដែរ ឯកឧត្តម បានជំរុញដល់គ្រប់ភាគី នៃ ក្រសួងវប្បធម៌ ត្រូវជំរុញបន្ថែមដល់នាយកដ្ឋាននិងអង្គភាពក្រោមឱវាទ ដោយបន្តការចូលរួមឱ្យសកម្មជាងនេះក្នុងការផ្សព្វផ្សាយ ការបង្ការ ការទប់ស្កាត់ ការរីករាលដាលនិងការចម្លងមេរោគអេដស៍និងជំងឺអេដស៍ ជាពិសេសនាយកដ្ឋានសិល្បៈទស្សនីយ៍ភាព និង នាយកដ្ឋានសិល្បៈភាពយន្ត និងផ្សព្វផ្សាយវប្បធម៌ ត្រូវយកចិត្តទុកដាក់បង្កើនស្នាដៃអប់រំរឿងខ្លី និងខ្លឹមសារ ជាសារអប់រំ ដើម្បីឱ្យផលិតករពេលចាក់បញ្ចាំងខ្សែភាពយន្ត និងវីដេអូត្រូវរត់អក្សរនៃសារអប់រំពីការឆ្លងមេ រោគអេដស៍ និងជំងឺអេដស៍នេះ។

ដោយឡែក ឯកឧត្តម ហម គឹមសុន អនុរដ្ឋលេខាធិការ និងជាអនុប្រធានគណៈកម្មាធិការប្រយុទ្ធនឹងជំងឺអេដស៍ ក្រសួងវប្បធម៌ និងវិចិត្រសិល្បៈ បានបញ្ជាក់ថាបើតាមរបាយការណ៍ នៃតួលេខចុងក្រោយនៅឆ្នាំ២០២៤ ក្នុងប្រទេសកម្ពុជា គេប៉ាន់ស្មានថាមានអ្នកផ្ទុកមេរោគអេដស៍ប្រមាណ៧៦.០០០នាក់ ឯអត្រាប្រេវ៉ាឡង់ អេដស៍បានធ្លាក់មកត្រឹម០,៥ភាគរយ ក្នុងចំណោមប្រជាជនទូទៅ(អាយុពី១៥ ទៅ ៤៩ឆ្នាំ)។

ឯកឧត្តមបានបញ្ជាក់បន្ថែមថាក្នុងចំណោមអ្នកសង្ស័យថាផ្ទុកមេរោគអេដស៍ទាំង៧៦.០០០នាក់នោះ ៧០.០១៣នាក់ បានធ្វើតេស្ត បញ្ជាក់ថាពិតជាផ្ទុកមេរោគអេដស៍មែនគឺស្មើនឹង ៩២%។ ក្នុងចំណោមអ្នកដែលបានធ្វើតេស្តដឹងខ្លួនពិតប្រាកដ ថាផ្ទុកមេរោគអេដស៍ទាំង៧០.០១៣នាក់ អ្នកផ្ទុកមេរោគអេដស៍ចំនួន ៦៩.៩៩៤នាក់ បានទទួលសេវាព្យាបាល ថែទាំ គឺស្មើនឹង ១០០ភាគរយ ។ ក្នុងចំណោមអ្នកជំងឺអេដស៍៦៩.៩៩៤នាក់នោះ អ្នកជំងឺចំនួន ៦៨.៨៦១នាក់ មាន មេរោគអេដស៍នៅក្នុងគ្រាប់ឈាមទាបបំផុត មើលពុំឃើញតាមអតិសុខុមទស្សន៍ គឺស្មើនឹង៩៨%។ លើគោលដៅ៩៥-៩៥-៩៥ កម្ពុជាសម្រេចបាន ៩២-១០០-៩៨។

គួរបញ្ជាក់ថា តាមការវិភាគកន្លងមកគេបានរកឃើញថាក្នុងចំណោមករណីឆ្លងមេរោគអេដស៍១.២០០ ប្រជាជនទូទៅឆ្លង១២ភាគរយ និងប្រជាជនគន្លឹះ ៨៨ភាគរយ។ ការឆ្លងមេរោគអេដស៍នៃប្រជាជនគន្លឹះ៨៨ភាគរយ អាចចែកចេញដូចតទៅ៖ ៤៨% ជាក្រុមបុរសរួមភេទជាមួយបុរស,១៣% ជាក្រុមដៃគូរួមភេទជាមួយប្រជាជនគន្លឹះ, ៩%ជាក្រុមបំប្លែងភេទ, ៧% ជាក្រុមរកស៊ីផ្លូវភេទបុរស, ៧% ជាក្រុមស្ត្រីបម្រើសេវាកម្សាន្តសប្បាយ និង២% ជាក្រុមចាក់គ្រឿងញៀន៕

ដោយ៖ មករា