AKP កំពង់ចាម ថ្ងៃទី២២ ខែឧសភា ឆ្នាំ២០២៥ -- ឯកឧត្ដម ខ្លូត ផន ប្រធានក្រុមប្រឹក្សាខេត្ត ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងលោកជំទាវ និងឯកឧត្តម សួស ឡា ប្រធានសាលាដំបូងខេត្ត បានអញ្ជើញជាអធិបតីក្នុងពិធីសែនក្រុងពលី និងបញ្ចុះឋមសិលាសាងសង់ព្រះវិហារកម្ពស់២ជាន់ ក្នុងវត្តសុទស្សនារាមជ្រោយថ្ម ស្ថិតក្នុងសង្កាត់បឹងកុក ក្រុងកំពង់ចាម។

ថ្លែងក្នុងពិធីសំណេះសំណាលជាមួយប្រជាពុទ្ធបរិស័ទ  ប្រជាពលរដ្ឋ ក្នុងពិធីបញ្ចុះបឋមសិលាសាងសង់ព្រះវិហារថ្មីនេះ ឯកឧត្តម អ៊ុន ចាន់ដា បានលើកឡើងថា រាល់សមិទ្ធផលនានាជាច្រើនទាំងផ្នែកពុទ្ធចក្រ និងអាណាចក្រ ដែលត្រូវបានកសាងឡើងជាបន្តបន្ទាប់ក្នុងខេត្តកំពង់ចាម ក៏ដូចជានៅទូទាំងប្រទេស គឺស្របទៅនឹងស្ថានភាពរួមនៃការអភិវឌ្ឍរីកចម្រើនរបស់ប្រទេសជាតិទាំងមូល ជាពិសេសបានធ្វើឱ្យជីវភាពរស់នៅរបស់ប្រជាពលរដ្ឋត្រូវបានលើកកម្ពស់ គឺបណ្តាលមកពីកត្តាសុខសន្តិភាព ក្រោមនយោបាយឈ្នះឈ្នះរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងនយោបាយដឹកនាំបន្តរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។

ឯកឧត្តមអភិបាលខេត្តបានលើកឡើងថា កត្តាដែលនាំឱ្យសមិទ្ធផលទាំងឡាយកើតឡើង នៅលើទឹកដីកម្ពុជាយើងមានបួនជាសំខាន់៖ ទី១. កត្តាសុខសន្តិភា ទី២. ការអភិវឌ្ឍ ទី៣. កត្តាជីវភាពរស់នៅរបស់ប្រជារដ្ឋយើង និងទី៤. កត្តាចម្បងបំផុត គឺមេដឹកនាំ។ ក្រោមការដឹកនាំដ៏ត្រឹមត្រូវឈ្លាសវៃរបស់ប្រមុខដឹកនាំប្រទេស ធ្វើឱ្យប្រទេសជាតិមានសុខសន្តិភាព មានការអភិវឌ្ឍ និងជីវភាពរស់នៅរបស់ប្រជាពលរដ្ឋយើងកាន់តែមានការរីកចម្រើនជាលំដាប់។

ឯកឧត្តម អ៊ុន ចាន់ដា បញ្ជាក់ថា ព្រះរាជាណាចក្រកម្ពុជាជាប្រទេសដែលមានមេដឹកនាំត្រឹមត្រូវក្រោមការដឹកនាំរបស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធានព្រឹទ្ធសភា និងសម្តេច ហ៊ុន ម៉ាណែត ជានាយករដ្ឋមន្ត្រី ពិតជាធានាបាននូវសុខសន្តិភាព និងធ្វើការអភិវឌ្ឍប្រទេស សេដ្ឋកិច្ចសង្គម និងជីវភាពប្រជាពលរដ្ឋកាន់តែប្រសើរឡើង។ ដូច្នេះ បងប្អូនប្រជាពលរដ្ឋបន្តគាំទ្រការដឹកនាំរបស់គណបក្សប្រជាជនកម្ពុជាដែលមានសម្តេចហ៊ុន សែន ជាប្រធាន និងបន្តទៅចុះឈ្មោះ និងពិនិត្យឈ្មោះបោះឆ្នោតឱ្យបានគ្រប់ៗគ្នា និងបន្តបោះឆ្នោតជូនគណបក្សប្រជាជនកម្ពុជា បន្តការគាំទ្រការដឹកនាំនាំរបស់សម្តេច ហ៊ុន ម៉ាណែត ជានាយករដ្ឋមន្ត្រី និងរួមគ្នាថែរក្សាសុខសន្តិភាពដែលមានស្រាប់ដែលនាំមកដោយ គណបក្សប្រជាជនកម្ពុជាយើង ដែលប្រទេសជាតិមានសុខសន្តិភាពដូចសព្វថៃ្ងនេះ៕

ដោយ ឆាយ ម៉ុត