AKP ភ្នំពេញ ថ្ងៃទី២២ ខែឧសភា ឆ្នាំ២០២៥ -- អគ្គនាយកដ្ឋាននយោបាយ និងកិច្ចការបរទេស ក្រសួងការពារជាតិ ដែលមាននាយកដ្ឋានកិច្ចការអាស៊ានជាសេនាធិការ បានរៀបចំសិក្ខាសាលាលើកទី៣ ស្តីពី «ការលើកកម្ពស់កិច្ចសហប្រតិបត្តិការក្នុងចំណោមកងទ័ពរដ្ឋសមាជិកអាស៊ានក្នុងការទប់ស្កាត់ជំងឺរាតត្បាតឆ្លងព្រំដែន» ចាប់ពីថ្ងៃទី១៩ ដល់ថ្ងៃទី២១ ខែឧសភា ឆ្នាំ២០២៥ នៅក្រុងសៀមរាប ខេត្តសៀមរាប ដោយមានការចូលរួមពីតំណាងនាយកដ្ឋានសុខាភិបាល បញ្ជាការដ្ឋានកងទ័ពជើងគោក និងស្ថាប័នពាក់ព័ន្ធនៃបណ្តាប្រទេសសមាជិកអាស៊ាន ប្រទេសសង្កេតការណ៍ទីម័រខាងកើត ព្រមទាំងតំណាងតំណាងលេខាធិការដ្ឋានអាស៊ាន មជ្ឈមណ្ឌលសុខាភិបាលយោធាអាស៊ាន  និងតំណាងវិស័យសុខាភិបាលអាស៊ាន។

សិក្ខាសាលានេះបានប្រព្រឹត្តទៅក្រោមអធិបតីភាព ឯកឧត្តម នាយឧត្តមសេនីយ៍ ណឹម សុវត្ថិ អគ្គនាយកនៃអគ្គនាយកដ្ឋាននយោបាយ និងកិច្ចការបរទេស ប្រធានឧត្តមមន្រ្តីការពារជាតិអាស៊ាន (ADSOM) របស់កម្ពុជា និងជាតំណាងដ៏ខ្ពង់ខ្ពស់ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីការពារជាតិ។

ថ្លែងក្នុងពិធីបើក ឯកឧត្តម នាយឧត្តមសេនីយ៍ ណឹម សុវត្ថិ បានសម្តែងការស្វាគមន៍ចំពោះប្រតិភូទាំងអស់ ដែលបានចូលរួមសិក្ខាសាលា ដើម្បីអនុវត្តគំនិតផ្តួចផ្តើមរួម ស្តីពី «ការលើកកម្ពស់កិច្ចសហប្រតិបត្តិការក្នុងចំណោមកងទ័ពរដ្ឋសមាជិកអាស៊ានលើការទប់ស្កាត់ជំងឺរាតត្បាតឆ្លងព្រំដែន»។ ជំងឺរាតត្បាតនៅជាបញ្ហាប្រឈមមួយសម្រាប់តំបន់ និងសកលលោក ដែលទាមទារនូវកិច្ចខិតខំប្រឹងប្រែងរួមគ្នាសំដៅធានាសុខមាលភាព និងសុវត្ថិភាពរបស់ប្រជាជន។ ក្នុងបរិការនៃជំងឺកូវីដ-១៩ តួនាទីរបស់កងទ័ពក្នុងការទប់ស្កាត់ជំងឺកូវីដ-១៩ ពិតជាមានសារសំខាន់តាមរយៈការប្រើប្រាស់ទាំងធនធានមនុស្ស និងគ្រឿងបរិក្ខារយោធា ក្នុងការចល័តកម្លាំង ការរៀបចំទីតាំងចត្តាឡីស័ក ការគ្រប់គ្រងសណ្តាប់ធ្នាប់សាធារណៈ។ល។ ក្នុងនាមជាម្ចាស់គំនិតផ្តួចផ្តើម កម្ពុជាមើលឃើញនូវសារសំខាន់នៃតួនាទីរបស់កងទ័ពនៃប្រទេសសមាជិកអាស៊ាន ក្នុងការបង្កើតកិច្ចសហប្រតិបត្តិការ ដើម្បីដោះស្រាយការគំរាមកំហែង និងចូលរួមទប់ស្កាត់ការរីករាលដាលជំងឺរាតត្បាតឆ្លងតាមព្រំដែន តាមរយៈការខិតខំប្រឹងប្រែងរួមគ្នា។ គោលដៅរួមគឺដើម្បីអភិវឌ្ឍសមត្ថភាពរួម និងកិច្ចសហប្រតិបត្តិការក្នុងតំបន់ តាមរយៈគំនិតផ្តួចផ្តើមជាក់ស្តែង និងចាត់វិធានការសម្របសម្រួលមួយនៅពេលចាំបាច់ សំដៅធានាបាននូវដំណោះស្រាយមួយប្រកបដោយជោគជ័យ។ ទន្ទឹមនេះ ឯកឧត្តម នាយឧត្តមសេនីយ៍ ក៏បានគូសបញ្ជាក់ថាគំនិតផ្តួចផ្តើមរបស់កម្ពុជា ស្តីពីកិច្ចសហប្រតិបត្តិការកងទ័ពអាស៊ានក្នុងការទប់ស្កាត់ជំងឺរាតត្បាតឆ្លងព្រំដែននេះ គឺស្របតាមគោលនយោបាយរាជរដ្ឋាភិបាលកម្ពុជាក្រោមការដឹកនាំប្រកបដោយថាមពល និងឆន្ទៈខ្ពស់របស់សម្តេចមហាបវរធីបតី ហ៊ុន ម៉ាណែត ដែលកំណត់អាទិភាពក្នុងការលើកកម្ពស់វិស័យសុខភាពសាធារណៈ ការពារអាយុជីវិតប្រជាជន និងការរក្សាសុវត្ថិភាពនៃកិច្ចដំណើការសកម្មភាពសង្គម-សេដ្ឋកិច្ច ក្រោយពីកម្ពុជាទទួលបានសន្តិភាព និងការឯកភាពជាតិពេញលេញ តាមរយៈនយោបាយឈ្នះ ឈ្នះ។

ឯកឧត្តម បានបង្ហាញនូវវឌ្ឍនភាពពីលទ្ធផលសម្រេចបាន នៃសិក្ខាសាលា២លើក និងការដាក់ឆ្លងសេចក្តីព្រាងនេះ ទៅក្នុងកិច្ចប្រជុំក្រុមការងារឧត្តមមន្រ្តីការពារជាតិអាស៊ានកន្លងមក ដោយទទួលបាននូវធាតុចូលថ្មី នាំឱ្យធ្វើការពិភាក្សាបន្តលើសេចក្តីព្រាងក្រមប្រតិបត្តិការជាថ្មី ដែលនេះស្តែងនូវសេចក្តីត្រូវការចាំបាច់ និងការផ្តោតការយកចិត្តទុកដាក់ពីអ្នករៀបចំគោលនយោបាយ និងអ្នកជំនាញ។ ឯកឧត្តម នាយឧត្តមសេនីយ៍ ក៏បានលើកទឹកចិត្តឱ្យអង្គសិក្ខាសាលាទាំងមូល បន្តរួមចំណែក និងសន្ទនាឱ្យបានផុសផុល ក្នុងរង្វង់ស្ថាប័នពាក់ព័ន្ធ និងបណ្តាអ្នកជំនាញ ក្នុងការពិភាក្សា ផ្លាស់ប្តូរមតិយោបល់ និងផ្តល់ធាតុចូលថ្មីៗ ហើយក៏ជឿជាក់ថា សិក្ខាសាលាលើកទី៣នេះនឹងផ្តល់លទ្ធផលដែលអាចឈានទៅសម្រេចបានតាមគោលបំណង ដែលមានកំណត់នៅក្នុងឯកសារទស្សនទាន។

បន្ទាប់ពីពិធីបើកផ្លូវការ ឧត្តមសេនីយ៍ទោ សំ សោភា នាយករងនាយកដ្ឋានកិច្ចការអាស៊ាន បានបន្តដឹកនាំកិច្ចពិភាក្សាក្នុងសិក្ខាសាលា ដោយមានការចូលរួមចែករំលែកបទពិសោធន៍ ទស្សនៈ និងគំរូឧត្តមានុវត្តន៍ថ្មីៗទៅវិញទៅមក ពីបណ្តាប្រទេសចូលរួម និងមជ្ឈមណ្ឌលសុខាភិបាលយោធាអាស៊ាន ស្របទៅតាមរបៀបវារៈកំណត់៕

ដោយ សំ សាម៉ន