AKP ភ្នំពេញ ថ្ងៃទី២២ ខែឧសភា ឆ្នាំ២០២៥-- សាស្ត្រាចារ្យកម្ពុជាចំនួន៨រូបមកពីស្ថាប័នកសិកម្មចំនួន៤ រួមមាន សាកលវិទ្យាល័យភូមិន្ទកសិកម្ម (Royal University of Agriculture) វិទ្យាស្ថានជាតិកសិកម្មព្រែកលៀប (PNIA) វិទ្យាស្ថានជាតិកសិកម្មកំពង់ចាម (KNIA) និងសាកលវិទ្យាល័យជាតិបាត់ដំបង (National University of Battambang (NUBB)) បានចូលរួមក្នុងដំណើរទស្សនកិច្ចសិក្សាថ្នាក់តំបន់ទៅកាន់សាកលវិទ្យាល័យកំពូលចំនួន៤ ដែលជាសមាជិកនៃបណ្តាញអប់រំជលផលអាស៊ាន (ASEAN-FEN) នៅប្រទេសឥណ្ឌូនេស៊ី ម៉ាឡេស៊ី ថៃ និងហ្វីលីពីន។ 

ប្រភពពី CaPFishAquaculture បានឱ្យដឹងនៅថ្ងៃទី២១ ខែឧសភា ឆ្នាំ២០២៥ថា នេះជាផ្នែកមួយនៃកម្មវិធី CaPFish-Aquaculture ទស្សនកិច្ចសិក្សានេះ បានផ្តល់ឱ្យសិក្ខាកាមទាំងអស់នូវចំណេះដឹងក្នុងការអភិវឌ្ឍវិធីសាស្រ្តបង្រៀនបែបអន្តរកម្មក្នុងមុខជំនាញវារីវប្បកម្ម។ បន្ទាប់ពីត្រលប់មកវិញ សិក្ខាកាមទាំងនេះក៏បានចូលរួមក្នុងសិក្ខាសាលារយៈពេល៣ថ្ងៃជាមួយអ្នកជំនាញវារីវប្បកម្ម គឺលោកបណ្ឌិត J. Verreth មកពីប្រទេសហូឡង់ ដើម្បីរួមគ្នាវាយតម្លៃពីការរកឃើញ និងពិភាក្សាលើការអនុវត្តវិធីសាស្ត្រដែលបានកំណត់ក្នុងការបង្រៀនរបស់ពួកគេ។ ចំណុចសំខាន់ៗដែលបានរំលេចឡើងនោះរួមមាន សារៈសំខាន់នៃការបង្រៀនជាក្រុមតូចៗ ការបង្រៀនដោយផ្អែកលើនិស្សិតជាគោល ការសិក្សាផ្អែកលើករណីជាក់ស្តែង ការសហការគ្នា និងការផ្តល់មតិកែលម្អជាប្រចាំ។ 

វិធីសាស្រ្តទាំងនេះជួយពង្រឹងនូវជំនាញ សមត្ថភាពត្រិះរិះពិចារណា និងការធ្វើការងារជាក្រុមក្នុងវិស័យអប់រំវារីវប្បកម្ម ក៏ដូចជាជំរុញឱ្យមានការសហការពីសាកលវិទ្យាល័យថ្មីៗក្នុងតំបន់ ក៏ដូចជាបើកឱកាសសម្រាប់ការផ្លាស់ប្តូរបទពិសោធន៍នាពេលអនាគត។ ខាបហ្វីស អាក្វ័រខាល់ឆ័រ CaPFishAquaculture ប្តេជ្ញានាំមកនូវវារីវប្បកម្មប្រកបដោយចីរភាព និងបរិយាបន្ននៅកម្ពុជា៕

ដោយ  ណយ នឿន (ប្រភព៖ CaPFishAquaculture)