AKP ភ្នំពេញ ថ្ងៃទី២០ ខែឧសភា ឆ្នាំ២០២៥ -- ប្រធានាធិបតីអេហ្ស៊ីបលោក អាប់ដេល ហ្វាតតាហ៍ អាល់ ស៊ីស៊ី (Abdel-Fattah al-Sisi) បានអំពាវនាវឱ្យឈានដល់បទឈប់បាញ់ភ្លាមៗនៅក្នុងតំបន់ហ្គាហ្សាស្ទ្រីបនិងសម្របសម្រួលលំហូរនៃជំនួយមនុស្សធម៌ចូលទៅក្នុងតំបន់ដែលហែកហួរដោយសង្រ្គាម ក្នុងអំឡុងពេលជួបជាមួយមន្ត្រីសហរដ្ឋអាមេរិកដែលកំពុងបំពេញទស្សនកិច្ច។

ប្រធានាធិបតីអេហ្ស៊ីបបាននិយាយនៅក្នុងសេចក្តីថ្លែងការណ៍មួយថាលោក ស៊ីស៊ី បានធ្វើការអំពាវនាវនៅទីក្រុងគែរ នៅពេលជួបជាមួយ លោក ម៉ាស់សាដ ប៊ូឡូស (Massad Boulos) ទីប្រឹក្សាជាន់ខ្ពស់របស់សហរដ្ឋអាមេរិកសម្រាប់ទ្វីបអាហ្រ្វិក និងជាទីប្រឹក្សាប្រធានាធិបតីស្តីពីកិច្ចការអារ៉ាប់ និងតំបន់មជ្ឈិមបូព៌ា។ ភាគីទាំងពីរបានពិភាក្សាអំពីការវិវឌ្ឍចុងក្រោយបង្អស់នៅតំបន់មជ្ឈិមបូព៌ា និងវិធីស្តារស្ថិរភាពក្នុងតំបន់។

ក្នុងជំនួបនោះ លោក ស៊ីស៊ី បានលើកឡើងយ៉ាងច្រើនអំពីកិច្ចខិតខំប្រឹងប្រែងសម្របសម្រួលរួមគ្នារបស់ប្រទេសអេហ្ស៊ីប សហរដ្ឋអាមេរិក និងកាតាសម្រាប់បទឈប់បាញ់នៅតំបន់ហ្គាហ្សា ដោយលោកបានបញ្ជាក់ពីការប្តេជ្ញាចិត្តរបស់ប្រទេសអេហ្ស៊ីបក្នុងការបន្តការសម្របសម្រួលរបស់ខ្លួន។

ចំណែកឯលោក ប៊ូឡូស បានបញ្ជាក់ពីការប្តេជ្ញាចិត្តរបស់សហរដ្ឋអាមេរិកក្នុងការបន្តកិច្ចខិតខំប្រឹងប្រែងរួមគ្នាជាមួយប្រទេសអេហ្ស៊ីបដើម្បីស្តារភាពស្ងប់ស្ងាត់ដល់តំបន់មជ្ឈិមបូព៌ាតាមរបៀបមួយដែលបម្រើផលប្រយោជន៍របស់ភាគីទាំងអស់។

កិច្ចប្រជុំរបស់ពួកគេកើតឡើងនៅពេលដែលការចរចាដោយប្រយោលថ្មីរវាងអ៊ីស្រាអែល និងក្រុមហាម៉ាស់ត្រូវបានធ្វើឡើងកាលពីថ្ងៃសៅរ៍នៅទីក្រុងដូហា។ កាលព្រឹកថ្ងៃអាទិត្យ ការិយាល័យនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា ក្រុមចរចាអ៊ីស្រាអែលកំពុងធ្វើការនៅទីក្រុងដូហា «ដើម្បីសម្រេចបាននូវឱកាសសម្រាប់កិច្ចព្រមព្រៀង» ដែលនឹង«បញ្ចប់ការប្រយុទ្ធ» ធានាការដោះលែងចំណាប់ខ្មាំង ៥៨នាក់ដែលនៅតែឃុំខ្លួននៅតំបន់ហ្គាហ្សា បណ្តេញពួកសកម្មប្រយុទ្ធហាម៉ាស់ និងដកហូតអាវុធនៅតំបន់ហ្គាហ្សា៕

ដោយ៖ មូល មិនា (ប្រភព៖ ស៊ីនហួ)