AKP កំពង់ធំ ថ្ងៃទី២០ ខែឧសភា ឆ្នាំ២០២៥-- លោក សាយ គឹមឡម អភិបាលស្រុកស្ទោង បានណែនាំដល់រដ្ឋបាលឃុំត្រូវធ្វើផែនការវិនិយោគឱ្យឆ្លើយតបទៅនឹងតម្រូវការជាក់ស្ដែងជាអាទិភាពរបស់ប្រជាពលរដ្ឋនៅក្នុងឱកាសអញ្ជើញជាអធិបតីភាពក្នុងពិធីដេញថ្លៃគម្រោងវិនិយោគឃុំឆ្នាំ២០២៥ នៅសាលាឃុំព្រះដំរី កាលពីថ្ងៃទី១៩ ខែឧសភាឆ្នាំ២០២៥។

លោក សាយ គឹមឡម បានណែនាំដល់រដ្ឋបាលឃុំព្រះដំរីត្រូវធ្វើផែនការវិនិយោគរបស់ឃុំឱ្យឆ្លើយតបទៅនឹងតម្រូវការជាក់ស្ដែង និងជាអាទិភាពរបស់ប្រជាពលរដ្ឋក្នុងមូលដ្ឋានដើម្បីលើកកម្ពស់ជីវភាព និងសេដ្ឋកិច្ចគ្រួសារជាពិសេសស្របតាមយុទ្ធសាស្ត្ររបស់រាជរដ្ឋាភិបាលអាណត្តិទី៧ ក្រោមការដឹកនាំដ៏ប៉ិនប្រសប់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ទន្ទឹមនឹងនេះ លោកអភិបាលស្រុកបានណែនាំដល់អាជ្ញាធរឃុំព្រះដំរីត្រូវធ្វើការផ្សព្វផ្សាយឱ្យបានធំទូលាយនូវគម្រោងកសាងផ្លូវថ្មីនេះដែលជាសមិទ្ធផលថ្មីមួយទៀតរបស់ឃុំក៏ដូចជារបស់រាជរដ្ឋាភិបាល ដើម្បីឱ្យប្រជាពលរដ្ឋនៅក្នុងមូលដ្ឋានបានសហការព្រមទាំងធ្វើការបើកផ្លូវនេះទៅតាមច្បាប់ភូមិបាលដើម្បីងាយស្រួលក្នុងការអភិវឌ្ឍការថែទាំព្រមទាំងធ្វើផ្លូវបានប្រកបដោយគុណភាពតាមបទដ្ឋានបច្ចេកទេសសំណង់និងប្រើប្រាស់បានយូរអង្វែង។

លោកអភិបាលស្រុកបានណែនាំដល់ម្ចាស់ក្រុមហ៊ុនដែលជាអ្នកទទួលការត្រូវខិតខំធ្វើផ្លូវនេះប្រកបដោយគុណភាពតាមបទដ្ឋានបច្ចេកទេសហើយធានានូវការប្រើប្រាស់បានយូរអង្វែង គោរពនូវកិច្ចសន្យា និងទាន់ពេលវេលាដើម្បីឆ្លើយតបទៅនឹងការប្រើប្រាស់ជាក់ស្ដែង ព្រមទាំងតម្រូវការរបស់ប្រជាពលរដ្ឋក្នុងមូលដ្ឋាន និងបានណែនាំដល់គណៈកម្មការលទ្ធកម្មឃុំគឺមានភាពប្រាកដប្រជានិងច្បាស់លាស់ក្នុងការប្រើប្រាស់ថវិកាមូលនិធិឃុំប្រកបដោយគុណភាព ប្រសិទ្ធភាពតម្លាភាពក៏ដូចជាមន្ត្រីជំនាញពាក់ព័ន្ធត្រូវធ្វើការតាមដានត្រួតពិនិត្យជាប្រចាំរាល់សកម្មភាពសាងសង់របស់ក្រុមហ៊ុន និងអ្នកម៉ៅការដើម្បីធានាបានតាមកិច្ចសន្យានិងធានានូវគុណភាពផងដែរ។

សូមបញ្ជាក់ថា ផ្លូវដែលដាក់ឱ្យដេញថ្លៃនៅក្នុងឱកាសនោះមានប្រវែង២គីឡូម៉ែត្រ ទទឹង៥ម៉ែត្រ និងកម្រាស់គ្រួសក្រហម០,១៥ម៉ែត្រ លូ៧កន្លែង ស្លាកសញ្ញាគម្រោង១ផ្ទាំង និងតម្លៃដាក់ឱ្យដេញថ្លៃគឺចំនួន២៣៨៩០៦៥២៣រៀល ហើយក្រុមហ៊ុន ឡូវ សេងហៀងដែលជាអ្នកដេញថ្លៃឈ្នះទទួលបានសិទិ្ធក្នុងការសាងសង់៕

ដោយ ស៊ុម វណ្ណា