AKP ភ្នំពេញ ថ្ងៃទី១៩ ខែឧសភា ឆ្នាំ២០២៥-- ឯកឧត្តមបណ្ឌិត អ៊ុម រម្យណី រដ្ឋលេខាធិការ តំណាងដ៏ខ្ពង់ខ្ពស់របស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ព្រឹកថ្ងៃទី១៩ ខែឧសភា ឆ្នាំ២០២៥ បានដឹកនាំគណៈប្រតិភូចូលរួមកិច្ចប្រជុំតុមូលលើប្រធានបទ "បច្ចេកវិទ្យាអប់រំក្នុងថ្នាក់រៀន៖ ការផ្តល់អំណាចដល់គ្រូបង្រៀនក្នុងយុគសម័យឌីជីថល" ដែលកិច្ចប្រជុំនេះមានការចូលរួមពីសំណាក់គណៈប្រតិភូដែលជារដ្ឋមន្រ្តីអប់រំ និងរដ្ឋមន្រ្តីពាក់ព័ន្ធនឹងវិស័យអប់រំ និងអ្នកជំនាញអប់រំនៅតាមបណ្តាប្រទេសនានាជាច្រើន។

កិច្ចប្រជុំបានផ្តោតលើការចែករំលែកគោលនយោបាយ បទពិសោធន៍ និងចក្ខុវិស័យនៃបរិវត្តកម្មអប់រំ ដូចជា៖ ១) តួនាទីរបស់បច្ចេកវិទ្យាអប់រំ និងបញ្ញាសប្បនិម្មិតក្នុងការអប់រំឆ្ពោះទៅលើការសម្រេចសមធម៌ និងគុណភាពនៃការអប់រំ ២) ការអភិវឌ្ឍសមត្ថភាពគ្រូ និងការផ្តល់ការគាំទ្រដល់គ្រូក្នុងការប្រើប្រាស់បច្ចេកវិទ្យាអប់រំ និងបញ្ញាសប្បនិម្មិត ៣) ការលើកកម្ពស់ការអប់រំកុមារតូច តាមរយៈបច្ចេកវិទ្យាអប់រំ ៤) ការអភិវឌ្ឍហេដ្ឋារចនាសម្ព័ន្ធ និងឧបករណ៏បច្ចេកវិទ្យាឌីជីថល និង៥) ការលើកកម្ពស់កិច្ចសហប្រតិបត្តិការ និងភាពដៃគូសកលក្នុងការជំរុញការអប់រំឌីជីថល។

ថ្លែងក្នុងប្រជុំនេះ ឯកឧត្តមបណ្ឌិត អ៊ុម រម្យណី បានលើកឡើងអំពីចក្ខុវិស័យ និងទស្សនៈនៃបរិវត្តកម្មឌីជីថលអប់រំ រួមមាន  សារៈសំខាន់នៃបច្ចេកវិទ្យាអប់រំ និងបញ្ញាសប្បនិម្មិតក្នុងការអប់រំ ការប្រើប្រាស់  បច្ចេកវិទ្យាអប់រំ និងបញ្ញាសប្បនិម្មិតដោយការទទួលខុសត្រូវ ភាពចាំបាច់នៃការអភិវឌ្ឍសមត្ថភាពគ្រូ និងភាគីពាក់ព័ន្ធក្នុងការប្រើប្រាស់បច្ចេកវិទ្យាអប់រំ និងបញ្ញាសប្បនិម្មិត  និងគោលនយោបាយឌីជីថលអប់រំនៅកម្ពុជា៕

ដោយ៖ ចាន់ សុភឿន (ប្រភព៖ ក្រសួងអប់រំ)