AKP បន្ទាយមានជ័យ ថ្ងៃទី១៩ ខែឧសភា ឆ្នាំ២០២៥--ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកព្រះនេត្រព្រះ បានមានប្រសាសន៍អំពីសារៈសំខាន់នៃវេទិកាសាធារណៈ ដែលជាយន្តការដ៏សំខាន់មួយក្នុងការស្តាប់ និងទទួលយកដោយផ្ទាល់នូវសំណូមពរ បញ្ហាប្រឈម និងក្តីកង្វល់របស់បងប្អូនប្រជាពលរដ្ឋនៅក្នុងមូលដ្ឋាន។ ឯកឧត្តម គង់ ច័ន្ទវាសនា បានថ្លែងដូច្នេះក្នុងកិច្ចប្រជុំបូកសរុបលទ្ធផលវេទិកាសាធារណៈរបស់ក្រុមការងាររាជរដ្ឋាភិបាលចុះមូលដ្ឋានស្រុកព្រះនេត្រព្រះ ខេត្តបន្ទាយមានជ័យ កាលពីថ្ងៃអាទិត្យ ទី១៨ ខែឧសភា ឆ្នាំ២០២៥ នៅសាលប្រជុំរដ្ឋបាលស្រុក។

ក្នុងកិច្ចប្រជុំដ៏មានអត្ថន័យនេះ ឯកឧត្តម គង់ ច័ន្ទវាសនា បានថ្លែងកោតសរសើរចំពោះកិច្ចខិតខំប្រឹងប្រែងរបស់ក្រុមការងាររាជរដ្ឋាភិបាលចុះមូលដ្ឋានស្រុកព្រះនេត្រព្រះ ដែលបានលះបង់ពេលវេលា កម្លាំងកាយចិត្ត ដើម្បីចុះជួបសំណេះសំណាល និងស្វែងយល់ពីតម្រូវការជាក់ស្តែងរបស់ប្រជាពលរដ្ឋដើម្បីរួមគ្នាដោះស្រាយជូនពួកគាត់បានទាន់ពេលវេលានោះ។

ជាមួយគ្នានេះដែរ លោកស្រី រស់ សុផានី អភិបាលរងខេត្តបន្ទាយមានជ័យ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកព្រះនេត្រព្រះ ក៏បានចូលរួមយ៉ាងសកម្មក្នុងការពិភាក្សា និងលើកឡើងនូវទស្សនៈសំខាន់ៗ ពាក់ព័ន្ធនឹងការដោះស្រាយបញ្ហាជូនប្រជាពលរដ្ឋ ដោយលោកស្រីបានសង្កត់ធ្ងន់លើការសម្របសម្រួលរវាងស្ថាប័នពាក់ព័ន្ធនានា ដើម្បីធានាថា រាល់សំណូមពរ និងបញ្ហាប្រឈមដែលបានលើកឡើង នឹងត្រូវបានយកចិត្តទុកដាក់ និងដោះស្រាយប្រកបដោយប្រសិទ្ធភាព និងតម្លាភាព និងបានប្តេជ្ញាចិត្តបន្តសហការយ៉ាងជិតស្និទ្ធជាមួយក្រុមការងាររាជរដ្ឋាភិបាលចុះមូលដ្ឋានស្រុកព្រះនេត្រព្រះ ដើម្បីរួមចំណែកក្នុងការលើកកម្ពស់ជីវភាពរស់នៅរបស់ប្រជាពលរដ្ឋក្នុងខេត្តបន្ទាយមានជ័យទាំងមូល។

កិច្ចប្រជុំបានផ្តោតជាសំខាន់លើការបូកសរុបលទ្ធផលនៃវេទិកាសាធារណៈកន្លងមក ដោយបានពិនិត្យឡើងវិញនូវសំណូមពរ និងបញ្ហាប្រឈមនានាដែលប្រជាពលរដ្ឋបានលើកឡើង។ ក្រុមការងារបានធ្វើការវិភាគស៊ីជម្រៅលើបញ្ហាទាំងនោះ និងបានដាក់ចេញនូវផែនការសកម្មភាពជាក់លាក់ ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ រួមមាន បញ្ហាទាក់ទងនឹងហេដ្ឋារចនាសម្ព័ន្ធផ្លូវថ្នល់ ប្រព័ន្ធធារាសាស្រ្ត កង្វះខាតទឹកប្រើប្រាស់ បញ្ហាដីធ្លី និងបញ្ហាផ្សេងៗទៀតដែលប៉ះពាល់ដល់ជីវភាពរស់នៅប្រចាំថ្ងៃរបស់ពួកគាត់។

ជាលទ្ធផល ឯកឧត្តម គង់ ច័ន្ទវាសនា និងលោកស្រី រស់ សុផានី បានឯកភាពលើដំណោះស្រាយមួយចំនួនចំពោះបញ្ហាដែលបានលើកឡើង។ អាជ្ញាធរពាក់ព័ន្ធនឹងធ្វើការសិក្សាលម្អិតបន្ថែមទៀតលើបញ្ហាអាទិភាព និងចាត់វិធានការជាបន្តបន្ទាប់ ដើម្បីដោះស្រាយបញ្ហាទាំងនោះឱ្យបានឆាប់រហ័ស និងមានប្រសិទ្ធភាព។ ក្រុមការងារក៏បានប្តេជ្ញាចិត្តបន្តពង្រឹងកិច្ចសហប្រតិបត្តិការជាមួយប្រជាពលរដ្ឋ និងស្ថាប័នពាក់ព័ន្ធនានា ដើម្បីធានាបាននូវការអភិវឌ្ឍប្រកបដោយចីរភាព នៅក្នុងស្រុកព្រះនេត្រព្រះ។

កិច្ចប្រជុំបូកសរុបលទ្ធផលវេទិកាសាធារណៈនេះបានបង្ហាញឱ្យឃើញពីការយកចិត្តទុកដាក់យ៉ាងខ្ពស់របស់រាជរដ្ឋាភិបាល ក្នុងការស្តាប់សំឡេងរបស់ប្រជាពលរដ្ឋ និងការប្តេជ្ញាចិត្តក្នុងការដោះស្រាយបញ្ហាប្រឈមនានាដែលពួកគាត់កំពុងជួបប្រទះ៕

ដោយ ឈុន សារ៉ាត