AKP ភ្នំពេញ ថ្ងៃទី១៦ ខែឧសភា ឆ្នាំ២០២៥-- ឯកឧត្តម នាយឧត្តមសេនីយ៍ យន្ត មីន រដ្ឋលេខាធិការ ក្រសួងការពារជាតិ តំណាង ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ បានអនុញ្ញាតឱ្យលោកវរសេនីយ៍ទោ DON GIOVANNI ABDUL RAHMAN នាយការិយាល័យអនុព័ន្ធយោធាព្រុយណេ ប្រចាំព្រះរាជាណាចក្រកម្ពុជា ចូលជួបសម្តែងការគួរសម និងបង្ហាញមុខ នៅទីស្ដីការក្រសួងការពារជាតិ នាថ្ងៃទី១៦ ខែឧសភា ឆ្នាំ២០២៥ ។

ក្នុងជំនួបនោះ ឯកឧត្តម នាយឧត្តមសេនីយ៍ យន្ត មីន បានស្វាគមន៍យ៉ាងកក់ក្តៅចំពោះវត្តមានរបស់លោកវរសេនីយ៍ទោ DON GIOVANNI ABDUL RAHMAN អនុព័ន្ធយោធាព្រុយណេ ប្រចាំព្រះរាជាណាចក្រកម្ពុជា ព្រមទាំងសហការី ដែលបានមកបំពេញបេសកកម្មការទូតនៅកម្ពុជា។ ឯកឧត្តមបន្តថា ប្រទេសព្រុយណេជាប្រទេសតូច មានប្រជាជនតិចពិតមែន ប៉ុន្តែមានការអភិវឌ្ឍរីកចម្រើនជឿនលឿនខ្លាំងគួរឱ្យកត់សម្គាល់។ ប្រទេសព្រុយណេ-កម្ពុជាមានទំនាក់ទំនងជាមួយគ្នាយ៉ាងជិតស្និទ្ធ ក៏ដូចជាប្រទេសដទៃទៀតក្នុងប្រទេសអាស៊ានជាបងប្អូន។

ឯកឧត្តមសង្ឃឹមជឿជាក់ថា កម្ពុជា-ព្រុយណេនឹងបន្តកិច្ចសហប្រតិបត្តិការ តាមរយៈការផ្លាស់ប្តូរគណៈប្រតិភូជាន់ខ្ពស់ ដើម្បីជំរុញឱ្យទំនាក់ទំនង រវាងក្រសួងការពារជាតិយើងទាំងពីរ មានការអភិវឌ្ឍកាន់តែរីកចម្រើន និងមានភាពជិតស្និទ្ធ ទាំងក្នុងពេលបច្ចុប្បន្ន និងថ្ងៃអនាគត។ ឯកឧត្តមសង្ឃឹមយ៉ាងមុតមាំថា លោកវរសេនីយ៍ទោ នាយការិយាល័យអនុព័ន្ធយោធាព្រុយណេប្រចាំព្រះរាជាណាចក្រកម្ពុជា បានពាំនាំដើម្បីផ្សព្វផ្សាយទៅប្រទេសព្រុយណេឱ្យប្រជាជនព្រុយណេមកទស្សនកិច្ចប្រទេសកម្ពុជាបានកាន់តែច្រើន។

លោកវរសេនីយ៍ទោ DON GIOVANNI ABDUL RAHMAN នាយការិយាល័យអនុព័ន្ធយោធាព្រុយណេ បានបញ្ជាក់ថា ជំនួបរវាងថ្នាក់ដឹកនាំក្រសួងការពារជាតិប្រទេសយើងទាំងពីរ កន្លងមក មានទំនាក់ទំនងយ៉ាងល្អ ហើយសង្ឃឹមថា ថ្នាក់ដឹកនាំរបស់ប្រទេសកម្ពុជាធ្វើដំណើរទស្សនកិច្ចប្រទេសព្រុយណេនាឆ្នាំក្រោយៗផងដែរ៕

ដោយ សំ សាម៉ន