AKP ភ្នំពេញ ថ្ងៃទី១៤  ខែឧសភា ឆ្នាំ២០២៥

កម្ពុជា និងថៃ បានបើកកិច្ចប្រជុំទ្វេភាគីលើកទី១៥ ស្ដីពីកិច្ចសហប្រតិបត្តិការប្រយុទ្ធប្រឆាំងគ្រឿង​ញៀន​នៅខេត្តក្រាប៊ី ប្រទេសថៃ នាថ្ងៃទី១៤ ខែឧសភា ឆ្នាំ២០២៥ ដែលភាគីកម្ពុជាដឹកនាំដោយឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា និងភាគី​ដឹកនាំដោយឯកឧត្តម ឧត្តមសេនី​យ៍ឯក ផានុរក្ស លក្ខបុណ្យ អគ្គលេខាធិការក្រុមប្រឹក្សាត្រួតពិនិត្យគ្រឿង​ញៀនថៃ។

ថ្លែងក្នងកិច្ចប្រជុំនោះ ឯកឧត្តម ឧត្តមសេនីយ៍ឯក ផានុរក្ស លក្ខបុណ្យ បានថ្លែងពីកិច្ចសហប្រតិបត្តិ​ការ​ការងារប្រយុទ្ធប្រឆាំងគ្រឿងញៀនថៃ-កម្ពុជា ក្រោមស្មារតីរួមគ្នាពិភាក្សាលើកកម្ពស់ប្រសិទ្ធភាពដោះ​ស្រាយ​បញ្ហា​គ្រឿង​ញៀន ហើយឯកឧត្ដម ឧត្ដមសេនីយ៍ឯកក៏បានថ្លៃងអរគុណដល់ភាគីកម្ពុជាដែលតែង​តែរួម​សហការគ្នាយ៉ាងល្អសំដៅអនុវត្តន៍ឱ្យបាននូវខ្លឹមសារនៃកិច្ចប្រជុំទ្វេភាគីថៃ-កម្ពុជា ដែលបានផ្ដល់ជូន​ប្រជា​ពលរដ្ឋប្រទេសយើងទាំងពីរនូវសន្តិសុខ ភាពសុខសាន្តនិងការអភិវឌ្ឍ។

ក្នុងឱកាសនោះដែរ ឯកឧត្តមនាយឧត្តមសេនីយ៍ មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធ​ប្រឆាំង​គ្រឿងញៀនបានមានប្រសាសន៍ថ្លែងអំណរគុណដល់ភាគីថៃដែលតែងតែឧបត្ថម្ភគាំទ្រ ក្នុងក្នុងគោល​បំណង​រួមគ្នាបង្ការទប់ស្កាត់បញ្ហាគ្រឿងញៀនឆ្លងកាត់ព្រំដែនក៏ដូចជាការបង្ការទប់ស្កាត់ការប្រើ​ប្រាស់ និង ព្យាបាលអ្នកញៀនគ្រឿងញៀន ការលួចបង្វែរសាធាតុគីមីផ្សំទៅធ្វើជាគ្រឿងញៀន តាមរយៈយន្តការ​ទ្វេ​ភាគី ដោយផ្ដោតទៅលើការងារពង្រឹងសមត្ថភាពមន្ត្រី ការងារស្រាវជ្រាវនានា ការផ្លាស់ប្ដូរព័ត៌មាន ដែល​បម្រើដល់ប្រសិទ្ធភាពការងារប្រយុទ្ធប្រឆាំងគ្រឿងញៀន  ។

ក្រោយពីបានពិភាក្សាផ្លាស់ប្ដូរបទពិសោធន៍រវាងគ្នានឹងគ្នារួចមក ភាគីទាំងពីរកម្ពុជា-ថៃ ក៏បានឯកភាពគ្នា​ទៅលើការងារចំនួន ៥ រួមមាន៖ទី១- ការត្រួតពិនិត្យគ្រឿងញៀន សារធាតុគីមីផ្សំ និង សារធាតុគីមី ទី២-​ ការវិភាគគ្រឿងញៀន និងការចងក្រងឯកសារ អត្តសញ្ញាណ ទី៣- ការអប់រំ បង្ការ ការប្រើបំពាន​គ្រឿង​ញៀន ទី៤-ការព្យាបាល ស្តារនីតិសម្បទាន និងទី៥- កិច្ចសហការក្នុងការលើកកម្ពស់សមត្ថភាពប្រយុទ្ធ​ប្រឆាំងគ្រឿងញៀន ។

ជាមួយគ្នានេះដែរ ភាគីទាំងពីរកម្ពុជា និងថៃ ក្រោយពីបានឯកភាពនៅលើចំណុចទាំង៥ ខាងលើ​ដើម្បី​បន្តអនុវត្តន៍ គឺសុទ្ធតែបានចាត់ទុកស្មារតីនៃកិច្ចប្រជុំលើកនេះគឺបានពីកិច្ចពិភាក្សាទូលំទូលាយ និង ស៊ី​ជម្រៅប្រកបដោយស្មារតីមិត្តភាពនិងការយោគយល់គ្នាទៅវិញទៅមកចេញលទ្ធផលប្រកបដោយផ្លែផ្កា និងជាផែនទីនាំផ្លូវក្នុងការពង្រឹង និងពង្រីកកិច្ចសហប្រតិបត្តិការប្រយុទ្ធប្រឆាំងគ្រឿងញៀនរវាងប្រទេស​យើង​ទាំងពី​រក៏ដូចជាការចូលរួមក្នុងយន្តការតំបន់ទាំងមូលឱ្យកាន់តែមានប្រសិទ្ធភាពបន្ថែម​មួយកម្រិត​ទៀត ៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន