AKP ភ្នំពេញ ថ្ងៃទី១៤ ខែឧសភា ឆ្នាំ២០២៥

ព្រះរាជពិធីបុណ្យច្រត់ព្រះនង្គ័លជាពិធីមួយដាស់តឿនក្រើនរម្លឹក ដល់ប្រជាកសិករខ្មែរ ដែលពឹងផ្អែក​លើ​ការធ្វើកសិកម្មជាចម្បងឱ្យបានដឹងថា រដូវធ្វើស្រែចម្ការបានចូលមកដល់ហើយ ដែលត្រូវរួសរាន់សាប​ព្រួសឱ្យទាន់រដូវកាល ដោយយោងតាមការផ្សងប្រផ្នូលរបស់គោឧសភរាជ ដើម្បីទទួលបានទិន្នផលខ្ពស់។ ព្រះរាជពិធីនេះត្រូវបានប្រារព្ធធ្វើជារៀងរាល់ឆ្នាំនៅថ្ងៃ១រោច ដល់ថ្ងៃ៤រោច ខែពិសាខ ដោយផ្លាស់ប្ដូរ​ទីកន្លែង​ពីខេត្តមួយទៅខេត្តមួយ ខណៈការប្រារព្ធខុសពីសម័យដើម ដោយព្រះរាជ​ពិធី​បុណ្យ​ច្រត់ព្រះ​​នង្គ័ល​ប្រារព្ធច្រើនតែនិយមធ្វើនៅវាលព្រះមេរុ ជិតព្រះបរមរាជវាំង។

ព្រះរាជពិធីច្រត់ព្រះនង្គ័ល ជាព្រះរាជប្បវេណីដ៏មានសារៈសំខាន់ ក្នុងបណ្តាព្រះរាជពិធីបុណ្យទ្វាទសមាស​ប្រចាំឆ្នាំ ត្រូវបានធ្វើឡើងក្នុងគោលបំណងផ្សងមើលប្រផ្នូលរបស់ស្រុកទេស ទៅតាមការបរិភោគរបស់ «គោឧសភរាជ»ដោយចាត់ទុកជាវប្បមង្គលមួយដ៏ប្រសើររបស់ប្រជារាស្ត្រខ្មែរ ដែលព្រះមហាក្សត្រ គ្រប់​ព្រះអង្គ តែងដឹកនាំប្រារព្ធធ្វើពុំដែលខកខានតាំងពីបុរាណកាលរៀងមក ដើម្បីចម្រុងចម្រើនដល់ការ​សាប​ព្រួស បណ្ដុះ ដាំ ក្នុងរដូវភ្លៀងរបស់ប្រជាកសិករ។

កាលពីសម័យសង្គមរាស្ត្រនិយម ព្រះករុណាព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ “ព្រះបរមរតនកោដ្ឋ” កាលព្រះអង្គមានព្រះ​ជន្មគង់នៅ និង សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះអង្គសព្វព្រះរាជហឫទ័យយាងច្រត់ដោយផ្ទាល់ព្រះអង្គ នៅតាមបណ្តា រាជធានី ខេត្តមួយចំនួនដូចជា រាជធានីភ្នំពេញ ខេត្តកណ្តាល ខេត្តកំពង់ចាម ខេត្តស្វាយរៀង ខេត្ត​សៀមរាប ខេត្ត កំពង់ស្ពឺ និងខេត្តតាកែវជាដើម។

ចំណេរកាលក្រោយមក ព្រះមហាក្សត្រ ស្តេចពុំបានយាងច្រត់ព្រះនង្គ័ល ដោយផ្ទាល់ព្រះអង្គឡើយ ព្រះអង្គតែងចាត់ព្រះរាជតំណាងយាងច្រត់ជំនួស តែព្រះអង្គស្តេចយាងជាព្រះរាជាធិបតី ដ៏ខ្ពង់ខ្ពស់​បំផុត​ក្នុង​ព្រះរាជពិធីនេះវិញ។ ព្រះរាជពិធីនេះ ប្រព្រឹត្តឡើងដើម្បីជាមង្គល ឧទ្ទិសដល់ការចាប់ផ្តើមរដូវធ្វើ​ស្រែ​ចម្ការ របស់ប្រជាកសិករ និងបួងសួងដល់វត្ថុស័ក្តិសិទ្ធិ ឱ្យបង្ហូរទឹកភ្លៀងបរិបូណ៌តាមរដូវកាល បម្រើឱ្យ​វិស័យ​កសិកម្មគ្រប់ប្រភេទ ទទួលបាន ភោគផលខ្ពស់។

តាមរយៈប្រព័ន្ធផ្សព្វផ្សាយរបស់ជាតិ អ្នកជំនាញវិជ្ជាបុរាណក៏បានពន្យល់ពីការផ្សារភ្ជាប់​ជីវិតរស់នៅប្រចាំ​ថ្ងៃទៅនឹងព្រះរាជពិធីច្រត់ព្រះនង្គ័ល និងបានជំរុញឱ្យកុលបុត្រកុលធីតាខ្មែររួមគ្នាថែរក្សា​ព្រះរាជប្បវេណី​នេះឱ្យបានគង់វង្សទៀតផង។

ក្នុងកម្មវិធីសន្ទនាមតិ «ជីវិតយើង សង្គមយើង» នៃវិទ្យុជាតិកម្ពុជាAM918KHz និងវិទ្យុវត្តភ្នំ FM 105.70 MHz មានការពិភាក្សានូវប្រធានបទស្ដីពី៖«ស្វែងយល់ពីព្រះរាជពិធីច្រត់ព្រះនង្គ័ល» នាព្រឹកថ្ងៃចន្ទ ទី១២ ខែឧសភា ឆ្នាំ២០២៥ ឯកឧត្ដម ប៊ុន វាស្នារ ទីប្រឹក្សាអមគណៈកម្មាធិជាតិរៀបចំបុណ្យជាតិ-អន្តរជាតិ និងជាសមាជិកអចិន្ត្រៃយ៍ នៃគណៈកម្មការស្រាវជ្រាវវិជ្ជាហោរាសាស្ត្រនិងប្រពៃណីទំនៀមទម្លាប់ខ្មែរ បាន​បានបញ្ជាក់ថា ពីបុរាណមកអាណាប្រជានុរាស្ត្រទាំងអស់មុននឹងធ្វើស្រែចម្ការ គេចាំមើលព្រះរាជ​ពិធី​ច្រត់​ព្រះនង្គ័លរបស់ព្រះករុណាជាអម្ចាស់ជីវិតតម្កល់លើត្បូងលោកប្រារព្ធធ្វើមុន ទើបអាណាប្រជានុរាស្ត្រ​ចាប់​ផ្ដើមភ្ជួររាស់ជាខាងក្រោយ បន្ទាប់ពីព្រះករុណាជាអម្ចាស់ជីវិតតម្កល់លើត្បូង។ ឯកឧត្ដមបន្ដថា កាលណា ព្រះករុណាជាអម្ចាស់មិនទាន់ភ្ជួរទេ អាណាប្រជានុរាស្ត្រមិនហ៊ានធ្វើស្រែចម្ការទេ នេះជាការគោរព ការ​បូជា​ចំពោះព្រះករុណា ជាអម្ចាស់ជីវិតលើត្បួង។

អមដោយការពន្យល់បកស្រាយយ៉ាងក្បោះក្បាយពាក់ព័ន្ធព្រះរាជពិធីបុណ្យច្រត់ព្រះនង្គ័លតាមរលកអាកាសវិទ្យុផងនោះ ឯកឧត្ដម ប៊ុន វាស្នារ បានដាស់តឿនបងប្អូនជនរួមជាតិថា៖ «យើងជាកូនខ្មែរ​ត្រូវថែរក្សា​ប្រពៃណីវប្បធម៌ទំនៀមទម្លាប់ដូនតារបស់យើង អ្វីៗដែលកើតឡើងបើសិនណាមិនមានរបស់បុរាណទេ យើងធ្វើរបស់សម័យមិនបានទេ ប្រសិនបើយើងមិនមានផ្ទះឈើទេ  យើងមិនអាចទៅធ្វើផ្ទះថ្មបានទេ អីចឹង​យើងជាកូនខ្មែរ យើងត្រូវនាំគ្នាថែរក្សាប្រពៃណី និងទំនៀមទម្លាប់របស់យើង កុំប្រកាន់ថា ឥឡូវគេ វិទ្យាសាស្ត្រហើយ ណាគេទៅធ្វើចឹងទៀត នាំខាតនិយាយចឹងមិនត្រូវទេ ខុស ហ្នឹងហើយខុស»។

ជាមួយគ្នានេះដែរ សម្រាប់ព្រះរាជពិធីបុណ្យនេះ ប្រជាកសិករនៅទូទាំងប្រទេសកម្ពុជា ចាត់ទុកព្រះរាជពិធីច្រត់ព្រះនង្គ័ល ជាការពញ្ញាក់សា្មរតីពួកគេ ឱ្យត្រៀម ស្រូវពូជ ​និង​គ្រាប់ពូជ​ដំណាំផ្សេងៗ គោ​ក្របី រទេះ ឧបករណ៍សម្រាប់ធ្វើកសិកម្ម កម្លាំងពលកម្ម កូនចៅ អ្នកភូមិផងរបងជាមួយសម្រាប់ធ្វើការ​ប្រវ៉ាស់ដៃគ្នា ក្នុងការធ្វើស្រែចម្ការ ព្រោះថាវស្សារដូវចូលមកដល់ហើយ។

បើតាមផែនការណែនាំរបស់គណៈកម្មាធិការជាតិរៀបចំបុណ្យជាតិ-អន្តរជាតិ បានឱ្យដឹងថា ព្រះរាជពិធី​ច្រត់​ព្រះនង្គ័លឆ្នាំនេះ នឹងប្រព្រឹត្តទៅក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ ព្រះករុណាព្រះ​បាទ​សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈ​ដ៏ខ្ពង់ខ្ពស់បំផុត ដោយមានការយាង និងអញ្ជើញចូលរួមពីព្រះរាជវង្សានុវង្ស ថ្នាក់ដឹកនាំ ព្រឹទ្ធសភា រដ្ឋសភា រាជរដ្ឋាភិបាល មន្ត្រីរាជការ សាស្ត្រាចារ្យ លោកគ្រូ អ្នកគ្រូ និស្សិត សិស្ស និងប្រជារាស្ត្រ  ដើម្បី​រួម​គ្នាថែរក្សានូវព្រះរាជប្បវេណីពីបុរាណរបស់ ព្រះមហាក្សត្រ ឱ្យបានគង់វង្ស។

សម្រាប់ព្រះរាជពិធីច្រត់ព្រះនង្គ័លឆ្នាំនេះ នឹងត្រូវប្រព្រឹត្តទៅនៅស្ថិតនៅទីព្រះស្រែ ភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង  ខេត្តកំពង់ឆ្នាំង រយៈពេល៤ថ្ងៃ គឺ ចាប់ពីថ្ងៃ១-២-៣រោច ខែពិសាខ ឆ្នាំម្សាញ់ សប្តស័ក ព.ស២៥៦៩ ត្រូវនឹងថ្ងៃទី១២-១៣-១៤ ខែឧសភា ឆ្នាំ២០២៥ ជាថ្ងៃប្រារព្ធហោមពិធី និងពិធីតាមរោងមណ្ឌលជាភារកិច្ចរបស់ក្រុមបារគូ ឯថ្ងៃព្រហស្បតិ៍ ៤រោច ខែពិសាខ ត្រូវនឹង ថ្ងៃទី១៥ ខែឧសភា ឆ្នាំ២០២៥ ប្រារព្ធព្រះរាជពិធីច្រត់ព្រះនង្គ័លជាផ្លូវការ ក្រោមព្រះរាជាធិបតីភាពដ៏ខ្ពង់​ខ្ពស់​បំផុតរបស់ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជា​ណា​ចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត។

សូមរម្លឹកជូនផងដែរថា កាលពីឆ្នាំ២០២៤ ព្រះរាជពិធីច្រត់ព្រះនង្គ័ល ត្រូវបានប្រារព្ធធ្វើឡើងនៅខេត្ត​កំពង់ស្ពឺ ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត៕

ដោយ៖ គង់ សិរីរ័ត្ន និង រិទ្ធី