AKP កំពង់ចាមថ្ងៃទី១៣ ខែឧសភា ឆ្នាំ២០២៥-- ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានមានប្រសាសន៍ថា ផ្លូវដែលខូចខាតដោយគម្រោងសាងសង់ប្រព័ន្ធលូរំដោះទឹកកខ្វក់ និងប្រព័ន្ធលូរំដោះទឹកភ្លៀង ក្នុងក្រុងកំពង់ចាម មានប្រវែងប្រមាណជាង១០គីឡូម៉ែត្រ នឹងត្រូវជួសជុលឱ្យរួចរាល់នៅចុងឆ្នាំ២០២៥នេះ ដោយរដ្ឋបាលខេត្ត និងក្រសួងសាធារណការ និងដឹកជញ្ជូន បានឯកភាពគ្នារួចរាល់។ ជាផែនការបឋម ត្រូវជួសជុលផ្លូវដែលខូចខាតក្នុងក្រុងកំពង់ចាមឡើងវិញ ទៅតាមស្ថានភាពជាក់ស្តែងលើស្ថានភាពផ្លូវ ប្រសិនបើផ្លូវកន្លែងណាខូចតិចតួច ត្រូវជួសជុលឱ្យស្អាតវិញ។  ប្រសិនបើផ្លូវកន្លែងដែលខូចខាត់ទាំងស្រុងត្រូវធ្វើផ្លូវថ្មីវិញតែម្ដង ដោយគម្រោងសាងសង់ប្រព័ន្ធលូរំដោះទឹកកខ្វក់ និងប្រព័ន្ធលូរំដោះទឹកភ្លៀង ក្រុងកំពង់ចាម បច្ចុប្បន្នសម្រេចបានប្រមាណ៧៨% ហើយ។

ឯកឧត្តមអភិបាលខេត្តថ្លែងបែបនេះក្នុងកិច្ចប្រជុំសាមញ្ញលើកទី១២ អាណត្តិទី៤របស់ក្រុមប្រឹក្សាខេត្តកំពង់ចាម ក្រោមអធិបតីភាពឯកឧត្តម ខ្លូត ផន ប្រធានក្រុមប្រឹក្សាខេត្ត ដោយមានការអញ្ជើញចូលរួមពីសមាជិកក្រុមប្រឹក្សាខេត្ត អភិបាលរងខេត្ត នាយក នាយករងរដ្ឋបាល ស្នងការនគរបាលខេត្ត មេបញ្ជាការកងរាជអាវុធហត្ថខេត្ត ប្រធានការិយាល័យប្រជាពលរដ្ឋ ថ្នាក់ដឹកនាំមន្ទីរ វិស័យជុំវិញខេត្ត និងមន្រ្តីពាក់ព័ន្ធមួយចំនួន ស្ថិតនៅសាលប្រជុំធំសាលាខេត្ត។

របៀបវារៈនៃកិច្ចប្រជុំមានចំនួន៤សម្រាប់ធ្វើការពិភាក្សា៖ ១- ពិនិត្យ និងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី១១ អាណត្តិទី៤ របស់ក្រុមប្រឹក្សាខេត្ត។ ២- ពិនិត្យ ពិភាក្សា និងអនុម័តសេចក្ដីព្រាងរបាយការណ៍ស្ដីពីការអនុវត្តការងារប្រចាំខែមេសា និងលើកទិសដៅប្រចាំខែឧសភា ឆ្នាំ២០២៥ របស់រដ្ឋបាលខេត្ត។ ៣- ពិនិត្យ ពិភាក្សា និងអនុម័តសេចក្ដីព្រាងសំណើសុំតែងតាំងអភិបាល អភិបាលរងក្រុង ស្រុកចំនួន០៩រូប ក្នុងដែនសមត្ថកិច្ចដដែល និងសម្រួលភារកិច្ចអភិបាលរងស្រុកចំនួន០១រូប និង៤- បញ្ហាផ្សេងៗ៕

ដោយ ឆាយ ម៉ុត