AKP កំពង់ធំ ថ្ងៃទី១៣ ខែឧសភា ឆ្នាំ២០២៥ -- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នាព្រឹកថ្ងៃទី១៣ ខែឧសភា ឆ្នាំ២០២៥ បានដឹកនាំសហការីនាំយកស៊ីម៉ងត៍ចំនួន២តោន អង្ករចំនួន១០០គីឡូក្រាម មីជាតិចំនួន៥កេស ទឹកត្រីទឹកស៊ីអ៊ីវ ត្រីខកំប៉ុងនិងថវិកាមួយចំនួន ទៅប្រគេនព្រះសង្ឃសម្រាប់បន្តការសាងសង់កុដិ០១ខ្នង និងសម្រាប់ផ្គត់ផ្គង់ចង្ហាន់ព្រះសង្ឃប្រចាំថ្ងៃដែលកំពុងមានការខ្វះខាតនៅវត្តស្រែវាលខាងកើត ឃុំដងកាំបិត ស្រុកសណ្ដាន់ ខេត្តកំពង់ធំ។

ព្រះតេជគុណព្រះភិក្ខុ ម៉ន សោម ព្រះគ្រូចៅអធិការវត្តបុទុមសាគរ (វត្តស្រែវាលខាងកើត) បានមានសង្ឃដីកាថា កន្លងមកការសាងសង់កុដិមួយខ្នងនេះត្រូវបានការជួយឧបត្ថម្ភឥដ្ឋស៊ីម៉ងត៍និងថវិកាមួយចំនួនពីឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំនិងសហការី ហើយបច្ចុប្បន្ននេះមានការខ្វះខាតសម្ភារសម្រាប់ដំណើរការសាងសង់បន្តទើបថ្ងៃនេះបានទទួលស៊ីម៉ងត៍ និងគ្រឿងឧបភោគបរិភោគ ព្រមទាំងថវិកាមួយចំនួន ដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត និងលោកជំទាវ តាមរយៈឧត្តមសេនីយ៍ទោ សោម ស៊ុន ដើម្បីបានដំណើរការសាងសង់បន្ត និងផ្គត់ផ្គង់ចង្ហាន់ដល់ព្រះសង្ឃនៅក្នុងវត្តផងដែរ និងសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្តេចមហាបវរធធិបតី និងលោកជំទាវ សូមទទួលបាននូវពុទ្ធពរទាំងបួនប្រការកុំបីឃ្លៀងឃ្លាតឡើយ។

ឧត្តមសេនីយ៍ទោ សោម ស៊ុន បានមានប្រសាសន៍បញ្ជាក់ថា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី តែងតែមានការគិតគូរ និងដោះស្រាយគ្រប់បែបយ៉ាងចំពោះការលំបាកខ្វះខាតទាំងផ្នែកពុទ្ធចក្រ និងអាណាចក្រពិសេសក្នុងការកសាងសមិទ្ធផលនានា ដើម្បីជាសមិទ្ធផលរបស់សង្គមជាតិ ហើយថ្ងៃនេះតាមសំណូមពររបស់ព្រះតេជគុណព្រះសង្ឃ និងលោកតាគណៈកម្មការអាចារ្យវត្ត ព្រមទាំងប្រជាពលរដ្ឋ សម្ដេច និងលោកជំទាវ បានឧបត្ថម្ភជូនស៊ីម៉ងត៍ សម្រាប់បន្តការសាងសង់ និងគ្រឿងឧបភោគបរិភោគ ព្រមទាំងថវិកាមួយចំនួន សម្រាប់ផ្គត់ផ្គង់ចង្ហាន់ដល់ព្រះសង្ឃនៅក្នុងទីអារាមវត្តស្រែវាលខាងកើតនៅពេលនេះផងដែរ៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)