AKP ភ្នំពេញ ថ្ងៃទី១៣ ខែឧសភា ឆ្នាំ២០២៥ -- សម្តេចរដ្ឋសភាធិបតី ឃួន សុដារី អញ្ជើញចូលរួមកិច្ចប្រជុំគណៈកម្មាធិការសមាជរដ្ឋសភានិងព្រឹទ្ធសភា ក្រោមអធិបតីដ៏ខ្ពង់ខ្ពស់ សម្ដេចតេជោ ហ៊ុន សែន ប្រធានព្រឹទ្ធសភានិងជាប្រធានសមាជរដ្ឋសភានិងព្រឹទ្ធសភា។

សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានសមាជរដ្ឋសភានិងព្រឹទ្ធសភា នៅព្រឹកថ្ងៃអង្គារ ទី១៣ ខែឧសភា ឆ្នាំ២០២៥ បានអញ្ជើញដឹកនាំកិច្ចប្រជុំគណៈកម្មាធិការសមាជរដ្ឋសភានិងព្រឹទ្ធសភា នៅវិមានព្រឹទ្ធសភា ដើម្បីពិភាក្សានិងអនុម័តរបៀបវារៈមួយចំនួន។

កិច្ចប្រជុំគណៈកម្មាធិការសមាជរដ្ឋសភានិងព្រឹទ្ធសភា មានវត្តមានចូលរួម ដោយ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងជាអនុប្រធានគណៈកម្មាធិការសមាជរដ្ឋសភានិងព្រឹទ្ធសភា ឯកឧត្តម អ៊ុច បូររិទ្ធ អនុប្រធានទី១ព្រឹទ្ធសភា ឯកឧត្តមគតិសេដ្ឋាបណ្ឌិត ជាម យៀប អនុប្រធានទី១រដ្ឋសភា ឯឧត្តម ធន់ វឌ្ឍនា អនុប្រធានទី២ព្រឹទ្ធសភា និងឯកឧត្តម វង សូត អនុប្រធានទី២រដ្ឋសភា ជាសមាជិកគណៈកម្មាធិការសមាជរដ្ឋសភានិងព្រឹទ្ធសភា ព្រមទំាងមានវត្តមានអញ្ជើញចូលរួមពីសំណាក់ ឯកឧត្តម លោកជំទាវ ជាជំនួយការ គណៈកម្មាធិការសមាជរដ្ឋសភានិងព្រឹទ្ធសភា ផងដែរ។

កិច្ចប្រជុំកិច្ចគណៈកម្មាធិការសមាជរដ្ឋសភានិងព្រឹទ្ធសភា បានសម្រេចទទួលយកសំណើរបស់រាជរដ្ឋាភិបាល ក្នុងពិភាក្សាអំពីប្រធានបទសំខាន់ៗចំនួនបី មានរួមមាន ប្រធានបទអំពី ប្រព័ន្ធគាំពារសង្គម ប្រធានបទអំពី សេដ្ឋកិច្ចក្រៅប្រព័ន្ធ និងប្រធានបទអំពី វិស័យកសិកម្ម។

កិច្ចប្រជុំគណៈកម្មាធិការសមាជរដ្ឋសភានិងព្រឹទ្ធសភានាព្រឹកនេះ ក៏បានប្រគល់ភារៈកិច្ចជូនជំនួយការសមាជរដ្ឋសភានិងព្រឹទ្ធសភា ពិនិត្យនិងសិក្សាលើប្រធានបទទំាងបីខាងលើ តាមនីតិវិធី រួចហើយធ្វើរបាយការណ៍ជូន គណៈកម្មាធិការសមាជរដ្ឋសភានិងព្រឹទ្ធសភា វិញ៕

ដោយ៖ ប៊ុនរិទ្ធ