AKP ភ្នំពេញ ថ្ងៃទី១៣ ខែឧសភា ឆ្នាំ២០២៥ -- ក្រោយទទួលបានការអនុញ្ញាតពីឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀននៅព្រឹកថ្ងៃទី១៣ ខែឧសភា ឆ្នាំ២០២៥ នេះ ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានដឹកនាំប្រតិភូស្ថាប័នត្រួតពិនិត្យគ្រឿងញៀនកម្ពុជាដើម្បីចូលរួមកិច្ចប្រជុំទ្វេភាគីកម្ពុជា-ថៃ លើកទី១៥ ស្ដីពីកិច្ចសហប្រតិបត្តិការប្រយុទ្ធប្រឆាំងគ្រឿងញៀននៅប្រទេសខេត្តក្រាប៊ី ប្រទេសថៃ ។

កិច្ចប្រជុំនេះនឹងប្រព្រឹត្តទៅមានរយៈពេល២ថ្ងៃគឺចាប់ពីថ្ងៃទី១៤-១៥ ខែឧសភា ឆ្នាំ២០២៥ ដែលកម្ពុជាដឹកនាំដោយឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន និងភាគីថៃដែលដឹកនាំដោយឯកឧត្តម ផានុរ៉ាត់ លូកប៊ូន អគ្គលេខាធិការក្រុមប្រឹក្សាត្រួតពិនិត្យគ្រឿងញៀនថៃ។

មុននឹងចាកចេញពីកម្ពុជា ឯកឧត្តម នាយឧត្តមសេនីយ៍ មាស វិរិទ្ធ បានបញ្ជាក់ឱ្យដឹងថា កិច្ចប្រជុំលើកទី១៥ នេះ នឹងពិភាក្សាទៅលើប្រធានបទសំខាន់ៗមួយចំនួនមាន៖ ១. ការពង្រឹងសមត្ថភាពមន្ត្រីអនុវត្តច្បាប់ដើម្បីបង្ការទប់ស្កាត់គ្រឿងញៀន និងសារធាតុគីមីផ្សំឆ្លងកាត់ព្រំដែន។ ២. វឌ្ឍនភាពស្ថានភាពគ្រឿងញៀននិងប្រតិបត្តិការកម្ពុជា-ថៃ។ ៣. ពិនិត្យលើវឌ្ឍនភាពនៃស្មារតីកិច្ចប្រជុំទ្វេភាគីកម្ពុជា-ថៃ លើកទី១៤ និងពិភាក្សាលើទិសដៅកិច្ចសហប្រតិបត្តិការនាពេលអនាគត ដែលមានការពង្រឹងសមត្ថភាពការវិភាគគ្រឿងញៀននិងសំណុំព័ត៌មានគ្រឿងញៀន ការព្យាបាលនិងស្តារនីតិសម្បទាអ្នកញៀនគ្រឿងញៀន ការអប់រំ បង្ការទប់ស្កាត់បញ្ហាគ្រឿងញៀន និងការចែករម្លែកបទពិសោធន៍ពីការទស្សនាភូមិសហគមន៍អនុវត្តកម្មវិធី CBTx ជាដើម។ល។៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន