AKP បន្ទាយមានជ័យ ថ្ងៃទី១២ ខែឧសភា ឆ្នាំ២០២៥ -- ឯកឧត្តម ប៊ុន ច័ន្ទវណ្ណៈ រដ្ឋលេខាធិការក្រសួងអភិវឌ្ឍន៍ជនបទ នាព្រឹកថ្ងៃទី១២ ខែឧសភា ឆ្នាំ២០២៥ បានអញ្ជើញជាអធិបតីក្នុងពិធីបើកការដ្ឋានការងារលើកកម្រិតគុណភាពផ្លូវក្រាលកៅស៊ូពីរជាន់ DBST ចំនួន៣ខ្សែ ប្រវែងសរុប៩៩៦៨ម៉ែត្រ ទទឹង៧ម៉ែត្រ នៅឃុំទួលពង្រ ស្រុកម៉ាឡៃ ខេត្តបន្ទាយមានជ័យ ដោយមានការអញ្ជើញចូលរួមពីឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ឯកឧត្តម ប្លែក វ៉ារី ប្រធានក្រុមប្រឹក្សាខេត្ត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឧត្តមសេនីយ៍ទោ សុខ ចាន់ឡា តំណាងកងវិស្វកម្មតេជោ ហ៊ុន សែន សៀមរាប រួមទាំងមន្ត្រីរាជការ អាជ្ញាធរ កងកម្លាំងគ្រប់លំដាប់ថ្នាក់ និងប្រជាពលរដ្ឋក្នុងមូលដ្ឋានជាច្រើននាក់ផងដែរ។

គម្រោងសាងសង់ផ្លូវដ៏មានសារៈសំខាន់នេះគឺជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ដែលបានផ្តល់ជូនដល់បងប្អូនប្រជាពលរដ្ឋរស់នៅភូមិអូរអំពិល ភូមិទួលប្រាសាទ និងភូមិបឹងជង្រុកតេជោ ឈ្នះ ឈ្នះ ក្នុងឃុំទួលពង្រ។

ថ្លែងក្នុងឱកាសនោះ ឯកឧត្តម ប៊ុន ច័ន្ទវណ្ណៈ បានពាំនាំនូវប្រសាសន៍ផ្តាំផ្ញើដ៏កក់ក្តៅពីឯកឧត្តម ឆាយ ឫទ្ធិសែន រដ្ឋមន្ត្រី ក្រសួងអភិវឌ្ឍន៍ជនបទ ដែលបានកោតសរសើរ និងថ្លែងអំណរគុណយ៉ាងជ្រាលជ្រៅចំពោះសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ចំពោះទឹកចិត្តដ៏សប្បុរសធម៌ និងការយកចិត្តទុកដាក់ខ្ពស់ចំពោះការអភិវឌ្ឍន៍ជនបទ និងកែលម្អជីវភាពរបស់ប្រជាពលរដ្ឋនៅតាមទីជនបទដាច់ស្រយាល។

ឯកឧត្តមរដ្ឋលេខាធិការបានបញ្ជាក់ថា គម្រោងសាងសង់ផ្លូវក្រាលកៅស៊ូ DBST ទាំងបីខ្សែនេះ នឹងដើរតួនាទីយ៉ាងសំខាន់ក្នុងការសម្រួលដល់ការធ្វើដំណើររបស់ប្រជាពលរដ្ឋ ការដឹកជញ្ជូនកសិផល និងទំនិញផ្សេងៗ ក៏ដូចជាការជំរុញកំណើនសេដ្ឋកិច្ចក្នុងមូលដ្ឋាន។ ផ្លូវដែលមានគុណភាពល្អ នឹងជួយកាត់បន្ថយគ្រោះថ្នាក់ចរាចរណ៍ និងលើកកម្ពស់សុវត្ថិភាពក្នុងការធ្វើដំណើរសម្រាប់ប្រជាពលរដ្ឋផងដែរ។

លើសពីនេះ ឯកឧត្តម ប៊ុន ច័ន្ទវណ្ណៈ បានណែនាំដល់ក្រុមហ៊ុនសាងសង់ និងអង្គភាពពាក់ព័ន្ធទាំងអស់ ត្រូវយកចិត្តទុកដាក់ក្នុងការអនុវត្តគម្រោងនេះឱ្យបានត្រឹមត្រូវតាមស្តង់ដារបច្ចេកទេស និងបញ្ចប់តាមពេលវេលាដែលបានកំណត់ ដោយធានាបាននូវគុណភាព និងប្រើប្រាស់សម្ភារៈសំណង់ដែលមានគុណភាពល្អ។

ក្នុងឱកាសនោះ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានសម្តែងនូវសេចក្តីសោមនស្សរីករាយ និងថ្លែងអំណរគុណយ៉ាងជ្រាលជ្រៅបំផុតចំពោះ សម្តេចមហាបវរធិបតី និងលោកជំទាវបណ្ឌិត ដែលបានផ្តល់នូវអំណោយដ៏មានតម្លៃនេះ ដល់ប្រជាពលរដ្ឋនៅក្នុងខេត្តបន្ទាយមានជ័យ ជាពិសេសបងប្អូននៅក្នុងឃុំទួលពង្រ ស្រុកម៉ាឡៃ។ ឯកឧត្តមអភិបាលខេត្ត បានគូសបញ្ជាក់ថា ការសាងសង់ផ្លូវនេះគឺជាការឆ្លើយតបយ៉ាងច្បាស់លាស់ទៅនឹងតម្រូវការជាក់ស្តែងរបស់ប្រជាពលរដ្ឋ ដែលរង់ចាំនូវផ្លូវដែលមានគុណភាពល្អអស់រយៈពេលជាយូរមកហើយ និងបានប្តេជ្ញាចិត្តថា រដ្ឋបាលខេត្តនឹងសហការយ៉ាងជិតស្និទ្ធជាមួយក្រសួងអភិវឌ្ឍន៍ជនបទ និងអង្គភាពពាក់ព័ន្ធទាំងអស់ ដើម្បីធានាឱ្យការសាងសង់ផ្លូវនេះ ប្រព្រឹត្តទៅដោយរលូន និងទទួលបានជោគជ័យតាមផែនការដែលបានគ្រោងទុក។ ឯកឧត្តមក៏បានអំពាវនាវដល់ប្រជាពលរដ្ឋទាំងអស់ចូលរួមសហការ និងផ្តល់ភាពងាយស្រួលដល់ក្រុមការងារសាងសង់ ដើម្បីឱ្យការងារនេះឆាប់បានបញ្ចប់ និងដាក់ឱ្យប្រើប្រាស់ជាប្រយោជន៍រួម។

គម្រោងលើកកម្រិតគុណភាពផ្លូវក្រាលកៅស៊ូ DBST ចំនួន៣ខ្សែនេះ ត្រូវបានគេរំពឹងទុកយ៉ាងមុតមាំថា នឹងផ្លាស់ប្តូរមុខមាត់ឃុំទួលពង្រ ស្រុកម៉ាឡៃ ឱ្យកាន់តែមានភាពរីកចម្រើន និងលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើងថែមទៀត ជាពិសេសក្នុងការសម្រួលដល់ការធ្វើដំណើរការប្រកបមុខរបរ និងការទទួលបានសេវាសាធារណៈផ្សេងៗកាន់តែងាយស្រួល។ ពិធីបើកការដ្ឋានបានប្រព្រឹត្តទៅក្នុងបរិយាកាសសប្បាយរីករាយ និងពោរពេញដោយក្តីសង្ឃឹមពីសំណាក់ប្រជាពលរដ្ឋក្នុងមូលដ្ឋាន៕

ដោយ ឈុន សារ៉ាត