AKP ភ្នំពេញ ថ្ងៃទី១២ ខែឧសភា ឆ្នាំ២០២៥ -- នៅក្នុងត្រីមាសទី១ ឆ្នាំ២០២៥នេះ ការិយាល័យច្រកចេញចូលតែមួយនៃរដ្ឋបាលក្រុង-ស្រុក-ខណ្ឌ បានផ្តល់សេវាជូនពលរដ្ឋសរុបចំនួន ១.១៧៦.៤០៦សេវានៅទូទាំងប្រទេស និងទទួលបានចំណូលជាង៣ពាន់លានរៀល នេះបើតាមរបាយការណ៍របស់អគ្គនាយកដ្ឋានរដ្ឋបាលនៃក្រសួងមហាផ្ទៃ។

របាយការណ៍ដដែលបានបញ្ជាក់ថា នៅក្នុងចំណោមសេវាផ្តល់ជូនពលរដ្ឋជាង១លានសេវានោះ បើប្រៀបធៀបចំនួនសេវាក្នុងវិស័យទាំង១៧ ការងារអត្រានុកូលដ្ឋានបានផ្តល់សេវាច្រើនជាងគេ គឺមានចំនួន៦២៤.៧១៤សេវា។ បន្ទាប់មកគឺការងារនីត្យានុកូលកម្មបានផ្តល់សេវាចំនួន៤៦៣.៦៧៩សេវា ខណៈដែលវិស័យបរិស្ថានបានផ្តល់សេវាតិចជាងគេ គឺត្រឹមតែ១សេវាប៉ុណ្ណោះ។ ក្នុងរយៈពេលដូចគ្នានេះ ការិយាល័យច្រកចេញចូលតែមួយទទួលបានចំណូលសរុបចំនួន៣.៤៩១.០២៥.៣២០រៀល ស្មើនឹង៨៧២.៧៥៦,៣៣ដុល្លារអាមេរិក។ ក្នុងនោះបើប្រៀបធៀបចំណូលដែលទទួលបានក្នុងវិស័យទាំង១៧ឃើញថា វិស័យសំណង់ទទួលបានចំណូលខ្ពស់ជាងគេ គឺចំនួន៩១៦.៨៧៣.៦០០រៀល បន្ទាប់មកវិស័យសុរិយោដីទទួលបានចំណូលចំនួន ៦១៨.១១០.០០០ រៀល។ ចំពោះវិស័យដែលបានទទួលចំណូលតិចជាងគេគឺវិស័យពាណិជ្ជកម្មបានទទួលចំណូលចំនួន១២៥.០០០រៀល និងវិស័យដែលមិនទទួលបានចំណូលគឺការងារអត្រានុកូលដ្ឋាន និងវិស័យធម្មការ និងសាសនា។

គួរបញ្ជាក់ជូនថា ការិយាល័យច្រកចេញចូលតែមួយនៅតាមបណ្តាក្រុង-ស្រុក-ខណ្ឌ បាន និងកំពុងផ្តល់សេវាជូនប្រជាពលរដ្ឋក្នុងវិស័យជំនាញចំនួន១៧ រួមមាន វិស័យទេសចរណ៍ វប្បធម៌ ពាណិជ្ជកម្ម សាធារណការ ឧស្សាហកម្ម សំណង់ កសិកម្ម សុខាភិបាល អប់រំ រ៉ែ និងថាមពល បរិស្ថាន ការងារ ធម្មការ និងសាសនា ការងារអត្រានុកូលដ្ឋាន ការងារនីត្យានុកូលកម្ម ការងាររដ្ឋបាល និងការផ្ទេរសិទ្ធិកាន់កាប់អចលទ្រព្យដែលមិនទាន់ចុះបញ្ជី៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)