AKPកំពង់ធំថ្ងៃទី១១ ខែឧសភា ឆ្នាំ២០២៥--

ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រីនិងជាក្រុមការងាររបស់រាជរដ្ឋាភិបាលចុះមូលដ្ឋានខេត្តកំពង់ធំតំណាងដ៏ខ្ពង់ខ្ពស់របស់សម្ដេចមហាបបរអធិបតីហ៊ុនផ្នែកនាយករដ្ឋមន្ត្រីនៃព្រះរាជាណាចក្រកម្ពុជាកាលពីថ្ងៃទី១០ខែឧសភាឆ្នាំ២០២៥បានអញ្ជើញជាអធិបតីភាពក្នុងពិធីសម្ពោធដាក់ឱ្យប្រើប្រាស់ជាផ្លូវការផ្លូវលំក្រាលគ្រួសក្រហម០១ខ្សែប្រវែង២១,២៥គីឡូម៉ែត្រពីទីរួមស្រុកសណ្ដាន់ទៅឃុំដងកាំបិត ស្រុកសណ្ដាន់ខេត្តកំពង់ធំដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានិងលោកជំទាវបណ្ឌិត ពេជ ចន្ទមុន្នីតាមរយៈឯកឧត្តមនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក ប្រធានក្រុមការងាររាជរដ្ឋាភិបាលចុះមូលដ្ឋានស្រុកសណ្ដាន់ ខេត្តកំពង់ធំ។

ឯកឧត្តម នួន ផារ័ត្ន អភិបាលខេត្តកំពង់ធំ បានសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចមហាបវរធិបតី ហ៊ុន ម៉ាណែត និងលោកជំទាវ បណ្ឌិតពេជ ចន្ទមុន្នីតាមរយៈឯកឧត្តមនាយឧត្តមសេនីយ៍ ម៉ៅ សុផាន់ ដែលបានស្ថាបនាផ្លូវដោយលោកសំ លាងទ្រី ប្រធានមន្ទីរសាធារណការខេត្តព្រះវិហារនិងជាក្រុមវិស្វកម្មស្ថាបនាផ្លូវរបស់ឯកឧត្តមនាយឧត្តមសេនីយ៍ ម៉ៅ សុផាន់ ដោយមានការសម្របសម្រួលដំណើរការស្ថាបនាផ្លូវលំនេះឡើងដោយឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានក្រុមការងាររបស់រាជរដ្ឋាភិបាលចុះមូលដ្ឋានស្រុកនិងជាប្រធានក្រុមការងារចុះមូលដ្ឋានឃុំដងកាំបិតស្រុក ស្រុកសណ្ដាន់ ខេត្តកំពង់ធំ។ 

ឯកឧត្តម វង្សី វិស្សុត បានថ្លែងនូវការអបអរសាទរចំពោះចំណងដៃថ្មីរបស់សម្ដេចមហាបវរធិបតី ហ៊ុន ម៉ាណែតនិងលោកជំទាវ តាមរយៈឯកឧត្តមនាយឧត្តមសេនីយ៍ ម៉ៅ សុផាន់ នូវផ្លូវ០១ខ្សែថ្មីទៀតនេះ និងបណ្ដាផ្លូវជាច្រើនខ្សែផ្សេងទៀត ជូនដល់ប្រជាពលរដ្ឋនៅក្នុងស្រុកសណ្ដាន់ ខេត្តកំពង់ធំ ដើម្បីបម្រើសេចក្តីត្រូវការរបស់ប្រជាជននិងបានថ្លែងអំណរគុណចំពោះឯកឧត្តមនាយឧត្តមសេនីយ៍ ម៉ៅ សុផាន់ និងឧត្តមសេនីយ៍ទោ សោម ស៊ុន រួមជាមួយក្រុមការងាររបស់រាជរដ្ឋាភិបាលចុះមូលដ្ឋានស្រុកសណ្ដាន់ ដែលបានសហការជាមួយអាជ្ញាធរដែនដីក្នុងការបម្រើនិងដោះស្រាយបញ្ហាប្រឈមនានាជូនដល់ប្រជាជននៅក្នុងស្រុកសណ្ដាន់នាពេលកន្លងទៅ។
ឯកឧត្តម វង្សី វិស្សុតបានគូសបញ្ជាក់អំពីគម្រោងអភិវឌ្ឍន៍ធំៗមួយចំនួននៅខេត្តកំពង់ធំ ដើម្បីបម្រើឱ្យសេដ្ឋកិច្ចជាតិ សេដ្ឋកិច្ចសង្គមនិងកំណើនសេដ្ឋកិច្ច សម្រាប់ប្រជាជន តាមរយៈវិស័យកសិកម្ម វិស័យទេសចរណ៍ កំណើនការងារសម្រាប់ប្រជាជននិងគ្រប់ពហុវិស័យផ្សេងទៀត ដើម្បីឱ្យខេត្តកំពង់ធំ ក៏ដូចជាប្រជាជននៅស្រុកសណ្ដាន់ មានជីវភាពធូរធារ ហើយនៅពេលខាងមុខខេត្តកំពង់ធំ លែងជាខេត្តដែលមានអ្នកទៅហួសនិងមកហួសទៀតហើយ។

ក្នុងពិធីសម្ពោធឱ្យប្រើប្រាស់ជាផ្លូវការផ្លូវលំ០១ខ្សែនេះមានការឧបត្ថម្ភជូនប្រជាពលរដ្ឋនិងក្រុមគ្រួសារអតីតយុទ្ធជនដែលបានចូលរួមក្នុងកម្មវិធីនេះចំនួន៧៣០គ្រួសារ ដោយក្នុងមួយគ្រួសារទទួលបាននូវអង្ករ២០គីឡូក្រាម មីជាតិមួយកេស ទឹកត្រីទឹកស៊ីអ៊ីវចំនួន២យូរ និងត្រីខកំប៉ុងចំនួន១ យូរ។សិស្សានុសិស្សយុវជនកាកបាទក្រហមនិងយុវជន ស ស យ ក ចំនួន ៣០០នាក់ក្នុងម្នាក់ទទួលបានសៀវភៅពីរក្បាល ប៊ិចពីរដើមខ្មៅដៃ១ដើមបន្ទាត់១ដើមនិងថវិកាចំនួន១០០០០រៀល។លោកគ្រូអ្នកគ្រូចំនួន ៣០នាក់ម្នាក់ៗទទួលបានថវិកាចំនួន១០០០០០រៀល។រដ្ឋបាលសាលាស្រុកសណ្ដាន់ ទទួលបានថវិកាចំនួន២លានរៀលឃុំដងកាំបិតនិងឃុំសណ្ដាន់ក្នុង១ឃុំទទួលបានថវិកាចំនួន១លានរៀល៕

ដោយ៖ ស៊ុម វណ្ណា