AKP កំពង់ធំ ថ្ងៃទី១០ ខែឧសភា ឆ្នាំ២០២៥--លោក ព្រឹម រដ្ឋា អភិបាលរងខេត្តលោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ និងលោក សំរិត គ្រុយ ប្រធានការិយាល័យនីតិកម្មកសិកម្មខេត្ត សមាជិកសមាជិកាចំនួន១៧០នាក់ដែលសិក្ខាកាមមកពី១៩ខេត្តបានអញ្ជើញចូលរួមក្នុងពិធីបិទវគ្គបណ្ដុះបណ្ដាល អប់រំសមត្ថភាពវិជ្ជាជីវៈដល់អាជីវករលក់ដុំ លក់រាយ ថ្នាំកសិកម្ម និងជីកសិកម្ម ក្នុងភូមិសាស្ត្រខេត្តកំពង់ធំកាលពីព្រឹកថ្ងៃទី០៩ខែឧសភាឆ្នាំ២០២៥នៅសាលប្រជុំសាលាខេត្តកំពង់ធំ។

លោក ប៉ែន វណ្ណរិទ្ធបានលើកឡើងថាវគ្គបណ្តុះបណ្តាលនេះមានគោលបំណងអប់រំសមត្ថភាពវិជ្ជាជីវៈដល់អាជីវករដែលមានបំណងធ្វើអាជីវកម្មលក់ដុំលក់រាយ ថ្នាំកសិម្មនិងជីកសិកម្ម ក្នុងព្រះរាជាណាចក្រកម្ពុជាឱ្យយល់ដឹងពីច្បាប់ស្តីពីការគ្រប់គ្រង ថ្នាំកសិកម្ម និងជីកសិកម្ម ដើម្បីអភិវឌ្ឍវិស័យកសិម្មឱ្យមានប្រសិទ្ធិភាពខ្ពស់ បង្កើនកំណើនសេដ្ឋកិច្ចជាតិ ស្របតាមគោលនយោបាយរបស់រាជរដ្ឋាភិបាល។ធានាការគ្រប់គ្រងថ្នាំកសិកម្មនិងជីកសិកម្ម ប្រកបដោយប្រសិទ្ធិភាព និងសុវត្ថិភាពឱ្យស្របជាមួយនឹងបមាណីអន្តរជាតិ។លើកកម្ពស់ការយល់ដឹងជាសាធរណៈលើការអនុវត្ត និងការតម្រូវបមាណីសម្រាប់ថ្នាំកសិកម្ម និងជីកសិកម្ម នៅក្នុងការគ្រប់គ្រងផលិតផលកសិកម្ម។ កាត់បន្ថយហានិភ័យដែលបង្កដោយការប្រើប្រាស់ថ្នាំកសិកម្ម និងជីកសិកម្មដើម្បីជាផលប្រយោជន៍ របស់កសិករនិង ប្រជាពលរសដ្ឋទូទាំងប្រទេស ដោយធានានូវសន្តិសុខស្បៀង សុវត្ថិភាពស្បៀង សុខភាពសាធារណៈនិងនិរន្តភាពនៃបរិស្ថាន។

លោកព្រឹម រដ្ឋាមានប្រសាសន៍បញ្ជាក់ថាក្នុងវគ្គបណ្តុះបណ្តាល គ្រួសម្របសម្រួលប្រើសំណួរបំផុសគំនិតវាស់ស្ទង់ចំណេះដឹងសិក្ខាកាមមុនវត្តនិងក្រោយវគ្គ ដោយប្រើប្រាស់បញ្ជីសំណួរលើប្រធានបទស្តីពី (ច្បាប់ការគ្រប់គ្រងថ្នាំកសិកម្ម និងជីកសិកម្ម, នីតិ វិធីក្នុងការគ្រប់គ្រង និងការធ្វើអាជីវកម្ម ថ្នាំកសិកម្ម និងជីកសិកម្ម វិធានបច្ចេកទេសពាក់ព័ន្ធ និងស្លាកសញ្ញា ព័ត៌មាន ថ្នាំកសិកម្មនិងជីកសិកម្ម វិធានបច្ចេកទេសទូទៅប្រភេទនៃទោសទណ្ឌការធ្វើអធិការកិច្ច ការយល់ដឹងពីការប្រើប្រាស់ ថ្នាំកសិកម្ម និងជីកសិកម្ម និងផលប៉ះពាល់នៃថ្នាំកសិកម្មនិងវិធានសុវត្ថិភាព។លោកមានប្រសាសន៍បន្តថាការសម្របសម្រួល ពិភាក្សាជាក្រុម និងមានរូបភាពជាសំណាក ស្តីពីស្លាកសញ្ញាព័ត៌មាន ស្តីពីគោល ការណែនាំក្នុងការប្រើប្រាស់ ថ្នាំកសិកម្ម និងជីកសិកម្ម និងច្បាប់ស្តីពីការស្នើសុំលិខិតអនុញ្ញាតចុះបញ្ជីការ វិញ្ញាបនបត្រសន្និធិឃ្លាំង លិខិតអនុញ្ញាតផ្គត់ផ្គង់ចែកចាយ ថ្នាំកសិកម្ម និងជីកសិកម្ម ដែលអនុញ្ញាតដោយ ក្រសួងកសិកម្មរុក្ខាប្រមាញ់ និងនេសាទ នៅលើសំបកវិចខ្ចប់ ថ្នាំកសិកម្ម និងជីកសិកម្ម និងការប្រើប្រាស់ពត៌មានតាមយ្យអកូដ(QR-Cord) សម្រាប់ពន្យល់ណែនាំដល់អាជីវករ លក់ដុំលក់រាយ ថ្នាំកសិកម្ម និងជីកសិកម្ម ដោយមានសំណួរសួរពីសិក្ខាកាមនិងមានការបកស្រាយពីគ្រួសម្របសម្រួល។

តាមរបាយការណ៍របស់លោក សំរិត គ្រុយ ប្រធានការិយាល័យនីតិកម្មកសិកម្មខេត្តខេត្តកំពង់ធំ បានលើកឡើងថា វគ្គបណ្ដុះបណ្ដាល អប់រំសមត្ថភាពវិជ្ជាជីវៈដល់អាជីវករលក់ដុំ លក់រាយ ថ្នាំកសិកម្ម និងជីកសិកម្ម រយៈពេល៣ថ្ងៃ ចាប់ពីថ្ងៃទី០៧-០៩ ខែឧសភា ឆ្នាំ២០២៥ លោកគ្រូសម្របសម្រួលបានបង្ហាញនូវខ្លឹមសាររួមមាន÷១.បទបង្ហាញពីនីតិវិធី និងវិធានបច្ចេកទេសការធ្វើអាជីវកម្មលក់ដុំលក់រាយថ្នាំកសិកម្មនិងជីកសិកម្ម។២.បទបង្ហាញពី វិធានការគ្រប់គ្រងជីជាតិដី និងសារធាតុចិញ្ចឹមដំណាំ។ ៣.ការយល់ដឹងអំពីធនធានដឹកសិកម្ម នៅកម្ពុជា។ ៤.បទបង្ហាញស្តីពីច្បាប់លិខិតបទដ្ឋានកំណត់នីតិវិធី និងវិធានបច្ចេកទេសក្នុងការគ្រប់គ្រង់និងការធ្វើពាណិជ្ជកម្មថ្នាំកសិកម្មនិងជីកសិកម្ម។ ៥.បទបង្ហាញស្តីពីបច្ចេកទេសនៃការប្រើប្រាស់ថ្នាំកសិកម្ម ប្រកបដោយប្រសិទ្ធភាព និងសុវត្ថិភាព។ ៦.បទបង្ហាញស្តីពីបច្ចេកទេសនៃការប្រើប្រាស់ថ្នាំកសិកម្មប្រកបដោយប្រសិទ្ធភាពនិងសុវត្ថិភាព។ ជាលទ្ធផលទទួលបានពីការវាស់ស្ទង់ ចំណេះដឹង មុនវគ្គនិងក្រោយវគ្គបណ្តុះបណ្តាល គឺ ចំណេះដឹងមុនវគ្គគឺ៖ខ្ពស់៥ភាគរយមធ្យម១៥ភាគរយទាប៨០ភាគរយ។ចំណេះដឹងក្រោយវគ្គគឺ៖ខ្ពស់៨៣ភាគរយមធ្យម១០ភាគរយនិងទាប៧ ភាគរយ។ខេត្តកំពង់ធំបានរៀបចំវគ្គបណ្ដុះបណ្ដាលអប់រំនេះចំនួន១៣វគ្គហើយចាប់ពីឆ្នាំ២០១១ដល់ឆ្នាំ២០២៥ដែលមានអ្នកចូលរួមសរុប១៥៥៩នាក់៕

ដោយ៖ ស៊ុម វណ្ណា