AKP កំពង់ធំ ថ្ងៃទី១០ ខែឧសភា ឆ្នាំ២០២៥--ឯកឧត្តម ផល សុជាតិ អគ្គលេខាធិការគណៈកម្មការជាតិជំរុញចលនាភូមិមួយផលិតផលមួយ ឧកញ៉ាបណ្ឌិត កែវ មុំ ប្រធានសភាមុខរបរនិងមីក្រូសហគ្រាសកម្ពុជា(CPMEC)លោក ជា វ៉ាន់ចាន់ អភិបាលរងខេត្តកំពង់ធំ លោក ទិត្យ កំរង ប្រធានក្រុមប្រឹក្សាភិបាលក្រុមហ៊ុនឬទ្ឋិពល និងជាស្ថាបនិកអេបកត់លុយ លោក គី សុខគីម នាយកប្រតិបត្តិនៃមូលនិធិអភិវឌ្ឍន៍ជំនាញ((SDF)នៃក្រសួងសេដ្ឋកិច្ច និងហិរញ្ញវត្ថុ សមាជិកចលនាភូមិមួយផលិតផលមួយ សភាមុខរបរ និងមីក្រូសហគ្រាសកម្ពុជានិងសិប្បកម្មសេដ្ឋកិច្ចក្រៅប្រព័ន្ធក្នុងខេត្តកំពង់ធំបានអញ្ជើញចូលរួមក្នុងពិធីសម្ពោធដំណើរការគម្រោងបណ្តុះបណ្តាលមូលដ្ឋានគ្រឹះនៃការគ្រប់គ្រងអាជីវកម្មនៃសហគ្រាសក្រៅប្រព័ន្ធនិងពិធីចែកវិញ្ញាបនបត្រទទួលស្គាល់ផលិតផលភូមិមួយផលិតផលមួយឆ្នាំ២០២៤កាលពី រសៀលថ្ងៃទី០៩ខែឧសភាឆ្នាំ២០២៥នៅសាលប្រជុំសាលាខេត្តកំពង់ធំ។

ឧកញ៉ាបណ្ឌិត កែវ មុំ ប្រធានសភាមុខរបរនិងមីក្រូសហគ្រាសកម្ពុជា(CPMEC) បានបង្ហាញពីគោលបំណងពិធីសម្ពោធដំណើរការគម្រោងកម្មវិធីបណ្តុះបណ្តាលមូលដ្ឋានគ្រឹះនៃការគ្រប់គ្រងអាជីវកម្មនៃសហគ្រាសក្រៅប្រព័ន្ធ ដែលទទួលថវិកាបដិភាគក្នុងការបណ្តុះបណ្តាលជំនាញពីមូលនិធិអភិវឌ្ឍន៍ជំនាញ(SDF) អនុវត្តគម្រោងដោយ ក្រុមហ៊ុនឫទ្ធិពល ឯ.ក (Rithipul Co., Ltd) សហការជាមួយសភាមុខរបរនិងមីក្រូសហគ្រាស(CPMEC)និងគណៈកម្មការជាតិជំរុញចលនាភូមិមួយផលិតផលមួយ(OVOP) និងផ្សព្វផ្សាយពីអត្ថប្រយោជន៍នៃការចូលរួមក្នុងអាជីវកម្មនៃសហគ្រាសក្រៅប្រព័ន្ធនិងអត្ថប្រយោជន៍នៃមូលនិធិអភិវឌ្ឍន៍ជំនាញការអនុវត្តគម្រោងឱ្យចំគោលដៅនិងតម្រូវការដើម្បីរួមចំណែកលើកកម្ពស់ការ អភិវឌ្ឍជំនាញឱ្យកាន់តែមានភាពទូលំទូលាយប្រសិទ្ធភាពនិងប្រសិទ្ធផលខ្ពស់ស្របតាមការកំណត់ក្នុងយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨របស់រាជរដ្ឋាភិបាល។

ឯកឧត្តម ផល សុជាតិ បានមានប្រសាសន៍លើកឡើងថាកម្មវិធីបណ្តុះបណ្តាលដែលទទួលបានមូលនិធីបដិភាគពីមូលនិធិអភិវឌ្ឍន៍ជំនាញ SDF បានផ្តោតទៅលើមុខជំនាញមួយចំនួនរួមមាន÷១.ការគ្រប់គ្រងលុយកាក់។ ២. ជំនាញលក់និងជំនាញទន់។ ៣.មូលដ្ឋានគ្រឹះឌីជីថល។ដោយមុខជំនាញទាំងនេះបាននឹងកំពុងបណ្តុះបណ្តាលដល់សហគ្រិនជាសមាជិកភូមិមួយផលិតផលមួយ និងសមាជិករបស់សេដ្ឋកិច្ចក្រៅប្រព័ន្ធសរុបចំនួន១៥០នាក់ និងគ្រោងពង្រីកទៅកាន់បណ្តាខេត្តផ្សេងៗទៀត។
ឯកឧត្តម ផល សុជាតិបានបញ្ជាក់ថា ការចុះអនុស្សារណៈយោគយល់រវាងគណៈកម្មការជាតិជំរុញចលនាភូមិមួយ ផលិតផលមួយ សភានិងមុខរបរនិងមជ្ឈមណ្ឌលបណ្តុះបណ្តាលឫទ្ធិពលគឺជាឱកាសមួយដែលនឹងជួយបង្កើតសមត្ថភាពដល់មូលដ្ឋានអាជីវកម្មតាមមូលដ្ឋាន។

គណៈកម្មការជាតិជំរុញចលនាភូមិមួយផលិតផលមួយបានចូលរួមចែកវិញ្ញាបនបត្រជូនសមាជិកដែលបានទទួលស្គាល់ក្នុងឆ្នាំ២០២៤ចំនួន២៤សហគ្រាស។កន្លងមកនៅក្នុងខេត្តកំពង់ធំបានទទួល ស្គាល់សហគ្រាសចំនួន២១រួចមកហើយ សរុបសហគ្រាសដែលបានទួលស្គាល់ចំនួន៤៥សហគ្រាស។ កិច្ចការចុះបញ្ជីទទួលស្គាល់សមាជិកយើងនឹងធ្វើជាបន្តបន្ទាប់។ អត្ថប្រយោជន៍នៃការចូលជាសមាជិករួមមានការជួយស្វែងរកទីផ្សារ ការជួយផ្តល់បច្ចេកទេសនិងឈានទៅដាក់ផ្កាយផលិតផលដែលធានាបាននូវគុណភាព ឈានទៅការពង្រីកអាជីវកម្មរបស់ពួកគាត់និងបានស្ដាំផ្ញើដល់សហគ្រាសទាំងអស់ជួយពង្រឹងនូវសុច្ចរិតភាព ទើបទទួលបានជោគជ័យក្នុងអាជីវកម្មរបស់ពួកគាត់៕
ដោយ៖ ស៊ុម វណ្ណា