AKP យូណាន ថ្ងៃទី០៩ ខែឧសភា ឆ្នាំ២០២៥ -- ប្រទេសកម្ពុជា និងចិនមានទំនាក់ទំនងកាន់តែស៊ីជម្រៅ និងប្រកបដោយផ្លែផ្កាលើវិស័យជាច្រើនក្នុងរយៈពេលប៉ុន្មានឆ្នាំកន្លងមកនេះ ហើយកិច្ចសហការរបស់ប្រទេសទាំងពីរបាននាំមកនូវផលប្រយោជន៍ជាក់ស្តែងដល់ប្រជាជន និងជាទំនាក់ទំនងមួយដែលបង្កើតឡើងដោយការគោរពគ្នាទៅវិញទៅមក មានសេចក្តីប្រាថ្នារួមគ្នា និងមានចក្ខុវិស័យសម្រាប់អនាគតដ៏រុងរឿងជាមួយគ្នា។ នេះបើយោងតាមការថ្លែងសុន្ទរកថារបស់លោក វ៉ាន់ វិទ្យា អគ្គកុងស៊ុលនៃស្ថានកុងស៊ុលកម្ពុជាប្រចាំនៅទីក្រុងឆុងជីងរបស់ប្រទេសចិន ក្នុងឱកាសដែលលោកអញ្ជើញចូលរួមក្នុងពិធីបើកកម្មវិធីពិព័រណ៍សេដ្ឋកិច្ច និងពាណិជ្ជកម្ម RCEP របស់ខេត្តយូណាន (វ៉ាយហ័រ) លើកទី២ នៅក្នុងទីក្រុងវ៉ាយហ័រ ខេត្តយូណាន ប្រទេសចិន កាលពីព្រឹកថ្ងៃទី០៩ ខែឧសភា ឆ្នាំ២០២៥ នេះ។
លោកបានថ្លែងថា ចំណងមិត្តភាពរវាងកម្ពុជា និងចិនបានអូសបន្លាយមកអស់រាប់សតវត្សមកហើយ ដោយចាក់ឫសក្នុងការផ្លាស់ប្តូរវប្បធម៌ និងការជួយគ្នាទៅវិញទៅមក។ ក្នុងប៉ុន្មានទសវត្សរ៍ថ្មីៗនេះ ទំនាក់ទំនងនេះកាន់តែស៊ីជម្រៅតាមរយៈភាពជាដៃគូយុទ្ធសាស្ត្រគ្រប់ជ្រុងជ្រោយនៃកិច្ចសហប្រតិបត្តិការ គំនិតផ្តួចផ្តើមខ្សែក្រវាត់ និងផ្លូវ (BRI) និងកិច្ចព្រមព្រៀងពាណិជ្ជកម្មសេរីចិន-កម្ពុជា (CCFTA) ក្នុងកិច្ចព្រមព្រៀងដទៃទៀត។ ក្របខណ្ឌទាំងនេះបានចាក់គ្រឹះយ៉ាងរឹងមាំសម្រាប់កិច្ចសហប្រតិបត្តិការសេដ្ឋកិច្ច ការអភិវឌ្ឍហេដ្ឋារចនាសម្ព័ន្ធ និងទំនាក់ទំនងរវាងប្រជាជន និងប្រជាជន។

លោកបានថ្លែងបន្ថែមថា «ចំណងមិត្តភាពរវាងកម្ពុជា និងចិន កំពុងពង្រឹង និងអភិវឌ្ឍន៍ជាបន្តបន្ទាប់ ដូចដែលវាត្រូវបានបញ្ជាក់ដោយដំណើរទស្សនកិច្ចផ្លូវរដ្ឋកាលពីពេលថ្មីៗនេះរបស់ឯកឧត្តម ស៊ី ជីនពីង (Xi Jinping) ប្រធានាធិបតីនៃសាធារណរដ្ឋប្រជាមានិតចិនទៅកាន់ព្រះរាជាណាចក្រកម្ពុជា ដែលដំណើរទស្សនកិច្ចដ៏សំខាន់នេះ មិនត្រឹមតែបញ្ជាក់ជាថ្មីនូវការប្តេជ្ញាចិត្តឥតងាករេចំពោះទំនាក់ទំនងមិត្តភាពរវាងកម្ពុជា និងចិនប៉ុណ្ណោះទេ ប៉ុន្តែថែមទាំងបានពង្រឹង និងធ្វើឱ្យកាន់តែស៊ីជម្រៅថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយ និងកិច្ចសហប្រតិបត្តិការឈ្នះ-ឈ្នះ រវាងប្រទេសទាំងពីរផងដែរ»។ លោកបានបន្តថា ដំណើរទស្សនកិច្ចនេះបានចាក់បញ្ចូលនូវសន្ទុះថ្មីក្នុងការកសាងសហគមន៍កម្ពុជា-ចិនគ្រប់បរិយាកាសជាមួយនឹងអនាគតរួមគ្នាក្នុងយុគសម័យថ្មីប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់។
នៅក្នុងឱកាសនោះ លោកក៏បានកោតសរសើរដល់ក្រុមការងារចំពោះការរៀបចំព្រឹត្តិការណ៍ដ៏អស្ចារ្យនាថ្ងៃនេះ និងការស្វាគមន៍យ៉ាងកក់ក្តៅបំផុតចំពោះរូបលោក ដែលបង្ហាញពីការយកចិត្តទុកដាក់ និងទំនាក់ទំនងរវាងប្រជាជនរបស់ប្រទេសទាំងពីរ។
សូមបញ្ជាក់ថា កម្មវិធីពិព័រណ៍សេដ្ឋកិច្ច និងពាណិជ្ជកម្មយូណាន (វ៉ាយហ័រ) RCEP លើកទីពីរ បានប្រារព្ធធ្វើឡើងនៅមជ្ឈមណ្ឌលពិព័រណ៍អន្តរជាតិចិន (ទីក្រុងវ៉ាយហ័រ) ចាប់ពីថ្ងៃទី០៨ ដល់ថ្ងៃទី១១ ខែឧសភា ឆ្នាំ២០២៥ ក្រោមប្រធានបទ «ចែករំលែកឱកាសឆ្ពោះទៅអនាគតឈ្នះ-ឈ្នះ»៕

ដោយ៖ យា ចិន្តាខន្តី