AKP ភ្នំពេញ ថ្ងៃទី០៩ ខែឧសភា ឆ្នាំ២០២៥

នៅអំឡុងពេលនៃកិច្ចប្រជុំរដ្ឋមន្ត្រីព័ត៌មានអាស៊ានលើកទី១៧ នៅប្រទេសព្រុយណេ ដារូសាឡាម ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មានកម្ពុជាបានទទួលជួបពិភាក្សាការងារជាមួយលោកជំទាវ Fifi Aleyda Yahya អគ្គនាយិកានៃក្រសួងទំនាក់ទំនងនិងកិច្ចការឌីជីថលនៃប្រទេសឥណ្ឌូណេស៊ី ដើម្បីពង្រឹងកិច្ចសហប្រតិបត្តិការលើវិស័យព័ត៌មានរវាងប្រទេសទាំងពីរ និងសន្យាសហការរួមគ្នាដើម្បីប្រយុទ្ធប្រឆាំងនឹងព័ត៌មានក្លែងក្លាយ។ ប្រទេសឥណ្ឌូណេស៊ី និងកម្ពុជា បានផ្តួចផ្តើមការប្រយុទ្ធប្រឆាំងព័ត៌មានក្លែងក្លាយ ដោយរៀបចំជាយុទ្ធនាការនៅទូទាំងប្រទេសសំដៅផ្លាស់ប្តូរឥរិយាបថពលរដ្ឋឱ្យមានការយល់ដឹងពីព័ត៌មានក្លែងក្លាយ និងការចូលរួមទប់ស្កាត់ និងបង្ការ។

ឯកឧត្តម នេត្រ ភក្ត្រា បានថ្លែងជម្រាបជូនភាគីឥណ្ឌូណេស៊ីពីគំនិតផ្តួចផ្តើមឱ្យមានការសហការរួមគ្នាក្នុងការរៀបចំយុទ្ធនាការថ្នាក់តំបន់មួយដែលមានគោលបំណងប្រយុទ្ធប្រឆាំងនឹងព័ត៌មានក្លែងក្លាយ តាមរយៈការបណ្តុះបណ្តាលផ្នែកអក្ខរកម្មព័ត៌មាន និងការចែករំលែកសារអប់រំជាសាធារណៈ និងការរួមសហការក្នុងចំណោមបណ្តាប្រទេសក្នុងតំបន់ព្រោះបញ្ហាព័ត៌មានក្លែងក្លាយមិនមែនជារឿងដាច់ដោយឡែករបស់ប្រទេសណាមួយទេ ប៉ុន្តែជាបញ្ហាប្រឈមរបស់គ្រប់ប្រទេសទាំងអស់។ ឯកឧត្ដមរដ្ឋមន្រ្ដីគូសបញ្ជាក់ថា ដូច្នេះការប្រមូលកម្លាំងគ្នា និងរួមគ្នាប្រយុទ្ធប្រឆាំងនឹងព័ត៌មានក្លែងក្លាយគឺជាការចាំបាច់។

ជាការឆ្លើយតប លោកជំទាវ Fifi Aleyda Yahya បានបង្ហាញពីការគាំទ្ររបស់ឥណ្ឌូណេស៊ីលើគំនិតផ្តួចផ្តើមនេះ និងសន្យាបន្តផ្លាស់ប្តូរទស្សនៈ បទពិសោធនានាពាក់ព័ន្ធនឹងការរៀបចំបទប្បញ្ញត្តិស្តីពីប្រព័ន្ធផ្សព្វផ្សាយ និងការប្រយុទ្ធប្រឆាំងនឹងព័ត៌មានក្លែងក្លាយឱ្យកាន់តែមានប្រសិទ្ធភាព៕

ដោយ៖ រិទ្ធី រូបថត៖ ឡុង ដេវីត