AKP បន្ទាយមានជ័យ ថ្ងៃទី០៨ ខែឧសភា ឆ្នាំ២០២៥-- ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ កាលពីព្រឹកថ្ងៃទី០៨ ខែឧសភា ឆ្នាំ២០២៥នេះ បានអញ្ជើញជាអធិបតីក្នុងពិធីប្រារព្ធខួបលើកទី១៦២ អបអរទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ២០២៥ ដែលប្រារព្ធឡើងក្រោមប្រធានបទ «រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ» ដោយមានការអមដំណើរពីឯកឧត្តម ប្លែក វ៉ារី ប្រធានក្រុមប្រឹក្សាខេត្តបន្ទាយមានជ័យ និងឯកឧត្តម អ៊ុ រាត្រី អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យ ព្រមទាំងថ្នាក់ដឹកនាំ មន្ត្រីរាជការ និងសមាជិក សមាជិកាកាកបាទក្រហមជាច្រើនរូប។

ថ្លែងទៅកាន់អង្គពិធីដ៏ឱឡារិកនោះ ឯកឧត្តម ឌិត ទីណា បានសម្តែងក្តីសោមនស្សរីករាយយ៉ាងក្រៃលែងចំពោះការអញ្ជើញចូលរួម និងបានថ្លែងអំណរគុណចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលបានផ្តល់កិត្តិយសតែងតាំងឯកឧត្តមជានិច្ចកាលជាប្រធានកិត្តិយសសាខាកាកបាទក្រហមកម្ពុជាខេត្តបន្ទាយមានជ័យ។

ឯកឧត្តមបានប្តេជ្ញាចិត្តយ៉ាងមុតមាំក្នុងការបន្តជំរុញចលនាគាំទ្រឱ្យការងារមនុស្សធម៌ក្នុងខេត្តកាន់តែមានភាពសកម្ម និងផ្តល់ជំនួយដល់បងប្អូនប្រជាពលរដ្ឋដែលកំពុងជួបប្រទះនូវទុក្ខលំបាកនានាប្រកបដោយប្រសិទ្ធភាពខ្ពស់ និងបានមានប្រសាសន៍បញ្ជាក់ថា៖ «ខ្ញុំពិតជាមានកិត្តិយស និងសូមថ្លែងអំណរគុណដ៏ខ្ពង់ខ្ពស់បំផុតចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលបានផ្តល់នូវការទុកចិត្តដ៏ខ្ពស់នេះ។ ខ្ញុំសូមប្តេជ្ញាថានឹងបន្តខិតខំប្រឹងប្រែងឱ្យអស់ពីកម្លាំងកាយចិត្ត ដើម្បីចូលរួមយ៉ាងសកម្មក្នុងការលើកកម្ពស់ការងារមនុស្សធម៌របស់កាកបាទក្រហមកម្ពុជា នៅក្នុងខេត្តបន្ទាយមានជ័យរបស់យើងឱ្យកាន់តែរីកចម្រើន និងអាចជួយដល់បងប្អូនប្រជាពលរដ្ឋដែលកំពុងត្រូវការជំនួយបានកាន់តែច្រើនថែមទៀត»។

ទន្ទឹមនឹងនេះ ឯកឧត្តមរដ្ឋមន្ត្រីបានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង និងលទ្ធផលការងារដ៏គួរឱ្យកត់សម្គាល់ដែលគណៈកម្មាធិការសាខាកាកបាទក្រហមកម្ពុជា ខេត្តបន្ទាយមានជ័យសម្រេចបាននាពេលកន្លងមក ព្រមទាំងបានលើកឡើងពីតួនាទីដ៏សំខាន់របស់កាកបាទក្រហមក្នុងការជួយសង្គ្រោះ និងផ្តល់ជំនួយសង្គ្រោះ  ដល់ប្រជាពលរដ្ឋដែលរងគ្រោះដោយសារគ្រោះមហន្តរាយផ្សេងៗ ដូចជា គ្រោះទឹកជំនន់ គ្រោះរាំងស្ងួត គ្រោះខ្យល់កន្ត្រាក់ គ្រោះអគ្គិភ័យ និងបញ្ហាប្រឈមផ្សេងៗទៀតនៅក្នុងសហគមន៍។

ឯកឧត្តមរដ្ឋមន្ត្រីបានសង្កត់ធ្ងន់ថា «កាកបាទក្រហមកម្ពុជាពិតជាបានដើរតួនាទីយ៉ាងសំខាន់ក្នុងការជួយសម្រាលទុក្ខលំបាករបស់ប្រជាពលរដ្ឋរបស់យើង។ ខ្ញុំមានជំនឿយ៉ាងមុតមាំថា ក្រោមការដឹកនាំដ៏ឈ្លាសវៃរបស់ សម្តេចកិត្តិព្រឹទ្ធបណ្ឌិត និងការខិតខំប្រឹងប្រែងរបស់គណៈកម្មាធិការសាខា កាកបាទក្រហមកម្ពុជានឹងមិនបោះបង់ចោលនរណាម្នាក់ឡើយ ហើយនឹងបន្តពង្រាយសកម្មភាពរបស់ខ្លួនឱ្យបានទូទាំងគ្រប់ភូមិ-ឃុំទូទាំងខេត្តបន្ទាយមានជ័យ ដើម្បីជាកម្លាំងចលករដ៏សំខាន់ក្នុងការជួយសង្គ្រោះបងប្អូនប្រជាពលរដ្ឋបានទាន់ពេលវេលា»។

ជាមួយគ្នានេះដែរ ឯកឧត្តមរដ្ឋមន្ត្រីបានថ្លែងអំណរគុណចំពោះសមាជិក សមាជិកា និងសប្បុរសជនទាំងអស់ដែលបានលះបង់ទាំងកម្លាំងកាយចិត្ត និងធនធានផ្ទាល់ខ្លួនក្នុងការចូលរួមគាំទ្រសកម្មភាពមនុស្សធម៌របស់កាកបាទក្រហមកម្ពុជាខេត្តបន្ទាយមានជ័យនាពេលកន្លងមក។ ឯកឧត្តមបានអំពាវនាវឱ្យបន្តនូវស្មារតីនៃការចែករំលែក និងការគាំទ្រនេះបន្តទៅមុខទៀតតាមលទ្ធភាព និងទឹកចិត្ត ដើម្បីរួមគ្នាជួយដល់ជនរងគ្រោះ និងជនងាយរងគ្រោះក្នុងខេត្ត និងបានជូនពរឱ្យអង្គពិធីទាំងមូលទទួលបាននូវភាពជោគជ័យ និងសូមជូនពរដល់អ្នកចូលរួមទាំងអស់ឱ្យទទួលបាននូវសុខភាពល្អ សុភមង្គល និងក្រោមម្លប់នៃសន្តិភាព។

ឯកឧត្តម ឌិត ទីណា បានកោតសរសើរចំពោះលទ្ធផលការងាររបស់សាខាកាកបាទក្រហមខេត្តក្នុងការជួយសង្គ្រោះប្រជាពលរដ្ឋពីគ្រោះមហន្តរាយនានា និងបានសង្កត់ធ្ងន់ថា កាកបាទក្រហមនឹងមិនទុកនរណាម្នាក់ចោលឡើយ។

ក្នុងឱកាសនោះ ឯកឧត្តម អ៊ុ រាត្រី  ក្នុងនាមជាប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យ បានថ្លែងរបាយការណ៍សង្ខេបអំពីសកម្មភាព និងសមិទ្ធផលដែលសាខាសម្រេចបាននាពេលកន្លងមកក្នុងការអនុវត្តបេសកកម្មមនុស្សធម៌ក្នុងខេត្ត និងបានថ្លែងអំណរគុណចំពោះការគាំទ្រពីគ្រប់មជ្ឈដ្ឋាន ជាពិសេសការយកចិត្តទុកដាក់ពីរាជរដ្ឋាភិបាល និងប្រធានកាកបាទក្រហមកម្ពុជា ដែលបានជួយឱ្យសាខាមានលទ្ធភាពគ្រប់គ្រាន់ក្នុងការផ្តល់ជំនួយសង្គ្រោះដល់ប្រជាពលរដ្ឋរងគ្រោះ។ ឯកឧត្តមបានប្តេជ្ញាបន្តពង្រឹងសមត្ថភាព និងពង្រីកសកម្មភាពរបស់សាខាឱ្យកាន់តែមានប្រសិទ្ធភាពខ្ពស់ថែមទៀត ដើម្បីឆ្លើយតបទៅនឹងតម្រូវការចាំបាច់របស់ប្រជាពលរដ្ឋក្នុងខេត្ត៕

ដោយ ឈុន សារ៉ាត