AKP ភ្នំពេញ ថ្ងៃទី០៨ ខែឧសភា ឆ្នាំ២០២៥-- នៅសាលប្រជុំធំ នៃទីស្ដីការរដ្ឋលេខាធិការដ្ឋានកិច្ចការព្រំដែន ឯកឧត្ដម ឡាំ ជា រដ្ឋមន្រ្ដីទទួលបន្ទុករដ្ឋលេខាធិការដ្ឋានកិច្ចការព្រំដែន កាលពី ថ្ងៃទី០៧ ខែឧសភា ឆ្នាំ២០២៥ បានអញ្ជើញជាអធិបតីដឹកនាំកិច្ចប្រជុំពិនិត្យ និងពិភាក្សាអំពីការត្រៀមឯកសារពាក់ព័ន្ធសម្រាប់ការរៀបចំកិច្ចប្រជុំគណៈកម្មការចម្រុះខណ្ឌសីមា និងបោះបង្គោលព្រំដែនគោក(JBC) កម្ពុជា-វៀតណាម កម្ពុជា-ឡាវ និងកម្ពុជា-ថៃ ដោយមានការអញ្ជើញចូលរួមពីសំណាក់ ឯកឧត្ដមរដ្ឋលេខាធិការប្រចាំការ ឯកឧត្តមរដ្ឋលេខាធិការ ឯកឧត្តមអនុរដ្ឋលេខាធិការ និងមន្ត្រីជំនាញបច្ចេកទេសនៃរដ្ឋលេខាធិការដ្ឋានកិច្ចការព្រំដែន។

ក្នុងឱកាសនោះ ឯកឧត្តមរដ្ឋមន្រ្តី ឡាំ ជា បានមានមតិស្វាគមន៍ ព្រមទាំងបានកោតសរសើរនិងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្រ្ដីជំនាញបច្ចេកទេសនាពេលកន្លងមក ដែលបានសម្រេចសមិទ្ធផលការងារព្រំដែនជាមួយប្រទេសជិតខាងជាបន្ដបន្ទាប់ ដោយគោរពតាមអនុសាសន៍ណែនាំដ៏ខ្ពង់ខ្ពស់បំផុតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា។ 

ទន្ទឹមនឹងនេះ ឯកឧត្ដមរដ្ឋមន្រ្ដី បានផ្តល់អនុសាសន៍ណែនាំនូវចំណុចសំខាន់ៗមួយចំនួន ជូនអង្គប្រជុំដើម្បីជាមូលដ្ឋានក្នុងការត្រៀមលក្ខណៈសម្បត្ដិឱ្យបានរួចរាល់សម្រាប់រៀបចំកិច្ចប្រជុំគណៈកម្មការចម្រុះខណ្ឌសីមា និងបោះបង្គោលព្រំដែនគោក(JBC) កម្ពុជា វៀតណាម កម្ពុជា ឡាវ និងកម្ពុជា ថៃ ដែលគ្រោងនឹងរៀបចំនាពេលខាងមុខនេះ។

ជាមួយគ្នានេះដែរ ឯកឧត្តមបានជូនពរថ្នាក់ដឹកនាំ និងមន្ត្រីជំនាញបច្ចេកទេសទាំងអស់ឱ្យមានសុខភាពល្អបរិបូរណ៍ សម្រេចបានជោគជ័យគ្រប់ភារកិច្ចការងារ និងសូមប្រសិទ្ធពរជ័យជូនដល់ ឯកឧត្តម លោក លោកស្រីទាំងអស់ សូមជួបប្រទះតែនឹងពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

ដោយ ណយ នឿន (ប្រភព៖ រដ្ឋលេខាធិការដ្ឋានកិច្ចការព្រំដែន)