AKP កំពង់ធំ ថ្ងៃទី០៧ ខែឧសភា ឆ្នាំ២០២៥-- 

លោក ងួន រាសី អភិបាលរងខេត្តកំពង់ធំ នាព្រឹកថ្ងៃទី០៧ ខែឧសភា ឆ្នាំ២០២៥ បានដឹកនាំក្រុមការងារចុះត្រួតពិនិត្យ ទីតាំងអាជីវកម្មទទួលបញ្ចាំនិងទទួលប្រាតិភោគដោយអនុប្បទាន ក្នុងភូមិសាស្ត្រស្រុកតាំងគោក និងស្រុកបារាយណ៍ ខេត្តកំពង់ធំ។

ក្នុងប្រតិបត្តិការចុះត្រួតពិនិត្យលោក ងួន រាសី និងក្រុមការងារ ក៏បានរកឃើញថា មានម្ចាស់អាជីវកម្មទទួលបញ្ចាំមួយចំនួននៅក្នុងស្រុកតាំងគោក និងស្រុកបារាយណ៍ មិនបានបំពេញលក្ខខណ្ឌទៅតាមផ្លូវច្បាប់បានត្រឹមត្រូវនៅឡើយនោះទេហើយមានហាងបញ្ចាំខ្លះ មិនបានលើកផ្លាកសញ្ញាយីហោ និងមិនមានអាជ្ញាបណ្ណគ្រប់គ្រាន់ផងដែរ។

ក្នុងឱកាសនោះ លោក ងួន រាសី អភិបាលរងខេត្តកំពង់ធំបានធ្វើការណែនាំទៅដល់ម្ចាស់អាជីវកម្មដែលកំពុងតែប្រកបមុខរបរទទួលបញ្ចាំ និងទទួលប្រាតិភោគដោយអនុប្បទាន មុននឹងទទួលបញ្ចាំវត្ថុអ្វីមួយពីអតិថិជនក្នុងនាមជាម្ចាស់អាជីវកម្ម ត្រូវត្រួតពិនិត្យឱ្យបានច្បាស់លាស់ ដើម្បីប្រាកដថា វត្ថុដែលដាក់បញ្ចាំនោះ គឺមិនត្រូវបាន ជាប់ពាក់ព័ន្ធជាមួយនឹងចោរកម្មនោះឡើយនិងបានជំរុញឱ្យម្ចាស់អាជីវកម្មទទួលបញ្ចាំ ដែលមិនទាន់មាន អាជ្ញាបណ្ណត្រឹមត្រូវ រួសរាន់ ស្នើសុំអាជ្ញាបណ្ណ ប្រកបអាជីវកម្មរបស់ខ្លួន ឱ្យបានស្របទៅតាមផ្លូវច្បាប់ របស់ព្រះរាជាណាចក្រកម្ពុជាដើម្បីចៀសវាង ពេលដែលក្រុមការងារចុះមកត្រួតពិនិត្យជាលើកទី២ប្រសិនបើនៅតែមិនទាន់មានអាជ្ញាបណ្ណ និងលើកស្លាកយីហោឱ្យបានល្អត្រឹមត្រូវនោះទេ អាចនឹងទទួលរងផលប៉ះពាល់ការពិន័យទៅតាមផ្លូវច្បាប់ជាដើម។

សូមបញ្ជាក់ថា ហាងអាជីវកម្មទទួលបញ្ចាំនិងទទួលប្រាតិភោគដោយអនុប្បទាន នៅក្នុងស្រុកតាំងគោក មានចំនួន ៦ទីតាំងនឹងស្រុកបារាយណ៍ចំនួន១៤ទីតាំង៕

ដោយ ស៊ុម វណ្ណា