AKP បន្ទាយមានជ័យ ថ្ងៃទី០៧ ខែឧសភា ឆ្នាំ២០២៥--ឯកឧត្ដម អ៊ុំ រាត្រី អភិបាលខេត្តបន្ទាយមានជ័យ បានក្រើនរម្លឹកយ៉ាងម៉ឺងម៉ាត់ដល់ក្រុមប្រឹក្សាឃុំសង្កាត់ទាំងអស់ ជាពិសេសថ្នាក់ដឹកនាំថ្មីឱ្យបន្តពង្រឹងស្មារតីបម្រើជាតិ បម្រើប្រជាពលរដ្ឋដោយស្មោះត្រង់ និងយកចិត្តទុកដាក់ខ្ពស់។ ការជំរុញបែបនេះរបស់ឯកឧត្តមអភិបាលខេត្តបានធ្វើឡើងក្នុងពិធីប្រកាសតែងតាំងប្រធានក្រុមប្រឹក្សាសង្កាត់ និងចៅសង្កាត់ទឹកថ្លាថ្មី ព្រមទាំងសមាជិកក្រុមប្រឹក្សាសង្កាត់ចំនួនពីររូបបន្ថែមទៀត យ៉ាងឱឡារិកនៅសាលាសង្កាត់ទឹកថ្លា ក្រុងសិរីសោភ័ណ កាលពីរសៀលថ្ងៃទី០៦ ខែឧសភា ឆ្នាំ២០២៥ ដោយមានការអញ្ជើញចូលរួមពីឯកឧត្ដម ប្លែក វ៉ារី ប្រធានក្រុមប្រឹក្សាខេត្តបន្ទាយមានជ័យ និង មន្រី្តអ្នកមុខអ្នកការ ប្រជាពលរដ្ឋជាច្រើន ដែលពិធីដ៏មានសារៈសំខាន់នេះធ្វើឡើងបន្ទាប់ពីលោក ខាំ សរ ចៅសង្កាត់ទឹកថ្លាបានទទួលមរណភាព។

ក្នុងឱកាសនោះ ឯកឧត្ដម ប្លែក វ៉ារី បានអញ្ជើញប្រកាសតែងតាំងលោក សឿន ចាន់ស ជាប្រធានក្រុមប្រឹក្សាសង្កាត់ និងជាចៅសង្កាត់ទឹកថ្លាថ្មី ដើម្បីបន្តដឹកនាំ និងបម្រើពលរដ្ឋនៅក្នុងមូលដ្ឋាន ខណៈដែលលោក ឌី ហៀង ក៏ត្រូវបានប្រកាសតែងតាំងជាចៅសង្កាត់រងទី១ ព្រមទាំងមានការប្រកាសតែងតាំងសមាជិកក្រុមប្រឹក្សាសង្កាត់ថ្មីចំនួនពីររូបទៀតផងដែរ ដែលជាការបំពេញបន្ថែមនូវគណៈបម្រើការងារសង្កាត់ឱ្យកាន់តែរឹងមាំ និងមានប្រសិទ្ធភាព។

ឯកឧត្ដម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានកោតសរសើរចំពោះកិច្ចខិតខំប្រឹងប្រែង និងស្នាដៃដែលថ្នាក់ដឹកនាំសង្កាត់ចាស់បានបន្សល់ទុក និងបាន សង្កត់ធ្ងន់លើសារសំខាន់នៃការយកចិត្តទុកដាក់ចំពោះសេចក្តីត្រូវការ និងសំណូមពររបស់ប្រជាពលរដ្ឋ ការផ្តល់សេវាសាធារណៈឱ្យបានឆាប់រហ័ស ប្រកបដោយតម្លាភាព និងគណនេយ្យភាព។

ឯកឧត្ដមបានលើកឡើងថា “ក្រុមប្រឹក្សាឃុំសង្កាត់ គឺជាអ្នកដែលនៅជិតប្រជាពលរដ្ឋបំផុត ដូច្នេះការយល់ដឹងពីទុក្ខលំបាក និងការឆ្លើយតបបានទាន់ពេលវេលា គឺជាកាតព្វកិច្ចចម្បងដែលត្រូវតែបំពេញឱ្យបានល្អប្រសើរ” ព្រមទាំងបានរម្លឹកពីតួអង្គស្នូលសំខាន់ៗរួមមាន មេឃុំ-ចៅសង្កាត់ ស្មៀនឃុំ ប៉ុស្តិ៍នគរបាលរដ្ឋបាលឃុំ-សង្កាត់ មណ្ឌលសុខភាព ឬប៉ុស្តិ៍សុខភាព និងមេភូមិ ដែលត្រូវខិតខំយកចិត្តទុកដាក់អនុវត្តតួនាទី ភារកិច្ចរបស់ខ្លួនក្នុងផ្តល់សេវាសាធារណៈនានាជូនប្រជាពលរដ្ឋក្នុងមូលដ្ឋានរបស់ខ្លួនឱ្យបានល្អប្រសើរ ប្រកបដោយក្រមសីលធម៌វិជ្ជាជីវៈ មានឥរិយាបថល្អក្នុងការប្រាស្រ័យទាក់ទងជាមួយប្រជាពលរដ្ឋ ប្រកបដោយតម្លាភាព គណនេយ្យភាព និងយុត្តិធម៌ ដោយមិនត្រូវមានការរើសអើងការបែងចែកបក្សពួក និងនិន្នាការនយោបាយនោះឡើយ។

ជាមួយគ្នានោះដែរ ឯកឧត្ដមអភិបាលខេត្តក៏បានជំរុញណែនាំដល់កងកម្លាំងគ្រប់អង្គភាព អាជ្ញាធរគ្រប់ថ្នាក់ មន្ទីរ អង្គភាព មន្រ្តីពាក់ព័ន្ធទាំងអស់ បន្តកិច្ចខិតខំប្រឹងប្រែងក្នុងការអនុវត្ត «គោលនយោបាយភូមិ ឃុំ សង្កាត់មានសុវត្ថិភាព» និងបង្កើនការគ្រប់គ្រងសភាពការណ៍នៅមូលដ្ឋាន។ រាល់បញ្ហាដែលកើតមាននៅមូលដ្ឋានត្រូវឆាប់ដោះស្រាយឱ្យបានទាន់ពេលវេលា ទោះតូចតាច តិចតួចក្ដី ចៀសវាងបង្កឱ្យកើតជាបញ្ហាធំ ដើម្បីបង្ការទប់ស្កាត់សកម្មភាពដែលបំផុសបំផុលបំប៉ោងបំភ្លៃការពិតក្នុងសង្គម ការញុះញង់អុជអាលប៉ុនប៉ងបង្កឱ្យមានអស្ថិរភាពក្នុងសង្គម។ បន្តជំរុញចលនាប្រជាពលរដ្ឋឱ្យចូលរួមអនុវត្តគោលនយោបាយ“ភូមិ ឃុំ សង្កាត់មានសុវត្ថិភាព”ដើម្បីពង្រឹងសន្តិសុខ សណ្តាប់ធ្នាប់ សុវត្ថិភាពក្នុងមូលដ្ឋានរបស់ខ្លួន។ ត្រូវសហការជាមួយអាជ្ញាធរមូលដ្ឋានក្នុងការបង្ការ ទប់ស្កាត់ និងបង្រ្កាបបទល្មើសជួញដូរ មនុស្ស អាជីវកម្មផ្លូវភេទ ការផលិត ការជួញដូរ ការចែកចាយ និងការប្រើប្រាស់គ្រឿងញៀនឱ្យបានម៉ឺងម៉ាត់ និងមានប្រសិទ្ធភាព។

សូមជម្រាបជូនថា ពិធីប្រកាសតែងតាំងនេះបានប្រព្រឹត្តទៅក្នុងបរិយាកាសសោមនស្សរីករាយ និងពោរពេញដោយក្តីសង្ឃឹមថ្មីសម្រាប់ការបម្រើប្រជាពលរដ្ឋកាន់តែប្រសើរឡើងនៅក្នុងសង្កាត់ទឹកថ្លា ក្រុងសិរីសោភ័ណ។ ការតែងតាំងថ្នាក់ដឹកនាំថ្មីនេះ ត្រូវបានគេរំពឹងយ៉ាងមុតមាំថានឹងនាំមកនូវភាពរឹងមាំ និងប្រសិទ្ធភាពខ្ពស់ជាងមុន ក្នុងការដោះស្រាយបញ្ហា និងបំពេញតម្រូវការរបស់ប្រជាពលរដ្ឋនៅក្នុងមូលដ្ឋាន៕

ដោយ ឈុន សារ៉ាត