AKP ភ្នំពេញ ថ្ងៃទី០៦ ខែឧសភា ឆ្នាំ២០២៥ -- សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជាបានគូសបញ្ជាក់ថា ក្រោយពីការបញ្ចប់សង្គ្រាមនៅថ្ងៃទី២៩ ខែធ្នូ ឆ្នាំ១៩៩៨ នៅកម្ពុជា ពេលនោះសម្ដេចបានដាក់ចេញនូវគោលដៅពីរ និងយុទ្ធសាស្រ្ដត្រីកោណ ដើម្បីកសាងប្រទេសឱ្យមានសន្ដិភាព និងការអភិវឌ្ឍ។ ការគូសបញ្ជាក់របស់សម្ដេចតេជោបែបនេះ ក្នុងបាឋកថារបស់សម្ដេចថ្លែងក្នុងសិក្ខាសាលាស្ដីពី "ទស្សនៈ និងបទពិសោធន៍នៃកិច្ចខិតខំកសាងសន្តិភាពនៅកម្ពុជា" នាព្រឹកថ្ងៃទី០៦ ខែឧសភា ឆ្នាំ២០២៥ នៅរដ្ឋធានីហ្សាការតា នៃសាធារណរដ្ឋឥណ្ឌូណេស៊ី។

ពាក់ព័ន្ធនឹងគោលដៅពីរនោះសម្ដេចតេជោ ហ៊ុន សែន បានថ្លែងបញ្ជាក់ថា៖ «គោលដៅទី១ គឺត្រូវប្រែក្លាយអតីតសមរភូមិទាំងអស់ឱ្យទៅជាតំបន់អភិវឌ្ឍន៍ ដែលពេលនេះ យើងសម្រេចបានប្រមាណជា ៩៥ភាគរយ រួចស្រេចទៅហើយ ខណៈ៥ភាគរយ ដែលនៅសេសសល់គឺជាដីដែលមិនទាន់បានបំផ្លាញចោលនូវគ្រាប់មីន។ អីចឹងតំបន់ទាំងអស់ដែលមានការប្រយុទ្ធ ឥឡូវគឺជាតំបន់អភិវឌ្ឍន៍ តំបន់ឧស្សាហកម្ម តំបន់ពាណិជ្ជកម្ម ឬជាតំបន់ទេសចរណ៍ដែលមានការទាក់ទាញ។ គោលដៅទី២ គឺត្រូវប្រែក្លាយខែ្សបន្ទាត់ព្រំដែនជាមួយប្រទេសជិតខាងទាំងអស់ ឱ្យទៅជាព្រំដែនសន្ដិភាព មិត្ដភាព កិច្ចសហប្រតិបត្តិការ និងការអភិវឌ្ឍ»។ សម្ដេចតេជោបានលើកឡើងថា បើយើងមិនសម្រេចគោលដៅទាំងពីរនេះទេ គឺយើងនឹងជួបការលំបាក។

ជាមួយគ្នានេះដែរ សម្ដេចតេជោប្រធានព្រឹទ្ធសភាបានបន្ថែមថា ប្រទេសជាតិមួយ ដើម្បីរីកចម្រើនត្រូវមានកត្ដាពីរសំខាន់ ទី១ គឺស្ថិរភាពផ្ទៃក្នុង និងទី២ មានអ្នកជិតខាងល្អ មានទំនាក់ទំនងអន្ដរជាតិល្អ ។ ឯយុទ្ធសាស្រ្ដត្រីកោណវិញ គឺទី១ ការធ្វើសន្ដិភាវូបនីយកម្មក្នុងការរក្សាសណ្ដាប់ធ្នាប់ ការរក្សាសន្ដិភាព សន្ដិសុខ និងការកសាងសន្ដិភាពនៅទូទាំងប្រទេស៕

ដោយ៖ រិទ្ធី