AKP ភ្នំពេញ ថ្ងៃទី២៦ ខែមេសា ឆ្នាំ២០២៥ -- បន្ទាប់ពីទទួលបានព័ត៌មានទាក់ទងនឹងស្ត្រីឈ្មោះ ធាន សីហា អាយុ៣៣ឆ្នាំ មានកូនពីរនាក់ និងមានជីវភាពខ្វះខាត ថែមទាំងកំពុងកេីតជំងឺដុំសាច់នៅឆ្អឹងថ្គាមខាងស្តាំ រស់នៅភូមិត្រពាំងធំ ឃុំរនាម ស្រុកទ្រាំងខេត្តតាកែវ ហេីយត្រូវបានក្រុមការងារក្រសួងសុខាភិបាលយកមកព្យាបាលនៅមន្ទីរពេទ្យកាល់ម៉ែត្រនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាបានឧបត្ថម្ភថវិកា ៥លានរៀល និងស្បៀងមួយចំនួនដល់អ្នកស្រី ធាន សីហា ដែលមានជំងឺមានដុំសាច់នៅឆ្អឹងថ្គាមខាងស្តាំ នោះ។

ក្នុងឱកាសនៃការផ្តល់ថវិកាឧបត្ថម្ភ ៥លានរៀល និងស្បៀងមួយចំនួននៅទីស្នាក់ការកណ្តាលកាកបាទក្រហមកម្ពុជាកាលពីថ្ងៃសុក្រ ទី២៥ ខែមេសា ឆ្នាំ២០២៥ លោកជំទាវ ម៉ែន នារីសោភ័គ អគ្គលេខាធិការរងទី១ បានពាំនាំនូវប្រសាសន៍ផ្តាំផ្ញើសួរសុខទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងលើកទឹកចិត្ត ជូនពរដល់អ្នកស្រីដែលមានជំងឺមានដុំសាច់នោះ ឱ្យឆាប់បានជាសះស្បើយឡើងវិញ។ លោកជំទាវក៏បានមានប្រសាសន៍ណែនាំអំពីការបរិភោគអាហារឱ្យបានត្រឹមត្រូវដើម្បីបំប៉នដល់សុខភាព និងមិនធ្វើឱ្យជំងឺដ ឬឈឺចាប់ឡើងវិញផងដែរ។

ជាមួយគ្នានេះ លោកជំទាវ ក៏បានមានប្រសាសន៍បន្ថែមអំពីជំងឺមិនឆ្លងនានាក្នុងបច្ចុប្បន្ននេះ ដែលកំពុងតែកើតមានឡើងលើមនុស្សគ្រប់វ័យ ដូចជាជំងឺទឹកនោមផ្អែម ជំងឺលើសសម្ពាធឈាម ជំងឺបេះដូង និងជំងឺមហារីកជាដើម ដែលជំងឺទាំងអស់នេះបង្កឡើងដោយការបរិភោគអាហារមិនបានត្រឹមត្រូវ ដូច្នេះលោកជំទាវបានអំពាវនាវសុំឱ្យយកចិត្តទុកដាក់គិតគូរពីការបរិភោគអំបិលតិច ស្ករតិច ខ្លាញ់តិច និងហាត់ប្រាណជាប្រចាំដើម្បីសុខភាពល្អ និងសុភមង្គល។

អ្នកស្រី ធាន សីហា មានជំងឺដុំសាច់នៅឆ្អឹងថ្គាមខាងស្តាំ និងម្តាយ មានក្តីរំភើបក្តុកក្តួលឥតឧបមាដោយទទួលបានការយកចិត្តទុកដាក់ ជាពិសេសការលើកទឹកចិត្តពីសំណាក់អ្នកម្តាយមនុស្សធម៌ ដែលលោកតែងតែគិតគូរដល់សុខទុក្ខ និងប្រជាជនងាយរងគ្រោះបំផុតគ្រប់ពេលវេលា និងគ្រប់ទីកន្លែង។ អ្នកស្រីសូមគោរពជូនពរសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សូមជួបប្រទះតែនឹងសេចក្តីសុខ សុភមង្គល សុខភាពល្អរឹងមាំ ជន្មាយុយឺនយូរ ដើម្បីបន្តដឹកនាំប្រទេស និងជាម្លប់ដ៏ត្រជាក់ដល់ប្រជាជនកម្ពុជាជារៀងរហូតតទៅ។

សូមបញ្ជាក់ថា យោងតាមរបាយការណ៍របស់មន្ទីរពេទ្យកាល់ម៉ែតបានឱ្យដឹងថា ស្ត្រីឈ្មោះ ធាន សីហា អាយុ៣៣ឆ្នាំ រស់នៅភូមិត្រពាំងធំ ឃុំរនាម ស្រុកទ្រាំង ខេត្តតាកែវ កេីតជំងឺ informée  ដែលមានដុំសាច់ និងឆ្អឹងថ្គាមខាងស្តាំធំ និងបានពិនិត្យពិភាក្សាគ្រប់ជ្រុងជ្រោយ (បន្ទាប់ពីបានលទ្ធផលស្កែន និងលទ្ធផលពិនិត្យសាច់) និងផ្តល់ការព្យាបាលជំនួយ (ដោយដាក់ឈាម សេរ៉ូម ថ្នាំបំបាត់ការឈឺចាប់)។ ក្រុមការងារបានដាក់ការពិភាក្សាក្នុងក្រុម ដោយបានសម្រេចថា ត្រូវបន្តការព្យាបាលដោយបាញ់កាំរស្មី ក្នុងគោលដៅបន្ថយការវិវឌ្ឍន៍ដុំសាច់ ព្រោះការវះកាត់មិនអាចធ្វើបានផលចំណេញទេ ហេីយអ្នកជំងឺត្រូវបានអនុញ្ញាតិឱ្យចេញទៅផ្ទះដើម្បីចូលឆ្នាំខ្មែរជាមួយថ្នាំលេប។ ផ្នែករដ្ឋបាលមន្ទីរពេទ្យនឹងជួយចាត់ចែងការជូនដំណើរទៅគេហដ្ឋាន ហើយខាងមន្ទីរសុខាភិបាលនឹងជូនមកវិញថ្ងៃណាត់បាញ់កាំរស្មីបន្ទាប់ពី
អ្នកជំងឺបានធ្វេីការគូរប្លង់រួចសំរាប់ការបាញ់កាំរស្មី ហើយបានត្រលប់មកវិញដេីម្បីបាញ់កាំរស្មីកាលពីថ្ងៃទី២៣ ខែមេសា ៕

ដោយ: ពេជ្រ សំអឿន (ប្រភព: កាកបាទក្រហមកម្ពុជា)