AKP បន្ទាយមានជ័យ ថ្ងៃទី២៦ ខែមេសា ឆ្នាំ២០២៥ -- លោកវរសេនីយ៍ឯក ប៉ែន សុគន្ធ មេបញ្ជាការរង នាយសេនាធិការកងពលតូចថ្មើរជើងលេខ៥១ បានដឹកនាំកម្លាំងសហការជាមួយកងកម្លាំងចម្រុះ និងអាជ្ញាធរមូលដ្ឋាន ចុះផ្ទាល់ដល់លំនៅដ្ឋានរបស់ប្រជាពលរដ្ឋដែលរងគ្រោះដោយខ្យល់កន្ត្រាក់ ដើម្បីនាំយកអំណោយស័ង្កសី និងជួយរុះរើជួសជុលផ្ទះចំនួន ៧ខ្នងផ្ទះ នៅភូមិស្មាច់ ឃុំបស្បូវ ស្រុកព្រះនេត្រព្រះ ខេត្តបន្ទាយមានជ័យ នៅថ្ងៃទី២៦ ខែមេសា ឆ្នាំ២០២៥ នេះ។ សកម្មភាពនេះបានបង្ហាញពីការយកចិត្តទុកដាក់ខ្ពស់របស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ក្នុងការជួយសម្រួលទុក្ខលំបាករបស់ប្រជាពលរដ្ឋឱ្យបានទាន់ពេលវេលា។

 
លោកវរសេនីយ៍ឯក ប៉ែន សុគន្ធ បានមានប្រសាសន៍ថា «នេះជាការយកចិត្តទុកដាក់ដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ដែលតែងតែគិតគូរពីសុខទុក្ខរបស់ប្រជាពលរដ្ឋគ្រប់ពេលវេលា។ កងកម្លាំងរបស់យើងរួមជាមួយអាជ្ញាធរមូលដ្ឋាន បានខិតខំប្រឹងប្រែងជួយជួសជុលផ្ទះជូនប្រជាពលរដ្ឋឱ្យបានឆាប់រហ័ស ដើម្បីពួកគាត់អាចស្នាក់នៅបានឡើងវិញ»។

ប្រជាពលរដ្ឋដែលរងគ្រោះដោយខ្យល់កន្ត្រាក់ បានបង្ហាញពីអារម្មណ៍រំភើបរីករាយ និងថ្លែងអំណរគុណយ៉ាងជ្រាលជ្រៅចំពោះសម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ចំពោះទឹកចិត្តសប្បុរសធម៌ និងការយកចិត្តទុកដាក់របស់ពួកគាត់។

លោកតា គឹម សុខ ដែលជាជនរងគ្រោះម្នាក់ បានរៀបរាប់ទាំងទឹកភ្នែកថា «ខ្ញុំពិតជាអរគុណខ្លាំងណាស់ចំពោះសម្ដេច និងលោកជំទាវ ដែលបានជួយខ្ញុំ និងគ្រួសាររបស់ខ្ញុំ។ ផ្ទះរបស់ខ្ញុំត្រូវបានខ្យល់កន្ត្រាក់បំផ្លាញស្ទើរទាំងស្រុង ខ្ញុំមិនដឹងថាត្រូវធ្វើដូចម្តេចនោះទេ ប៉ុន្តែអរគុណដល់សម្ដេច និងលោកជំទាវ ដែលបានជួយខ្ញុំឱ្យមានកន្លែងស្នាក់នៅឡើងវិញ»។

ចំណែកឯអ្នកស្រី នួន ស្រីពេជ្រ បាននិយាយថា «ខ្ញុំពិតជាសប្បាយចិត្តខ្លាំងណាស់ដែលបានទទួលជំនួយនេះ។ នេះជាការបង្ហាញពីការយកចិត្តទុកដាក់របស់ថ្នាក់ដឹកនាំចំពោះប្រជាពលរដ្ឋដែលជួបការលំបាក។ ខ្ញុំសូមជូនពរសម្ដេច និងលោកជំទាវ មានសុខភាពល្អ និងជោគជ័យក្នុងការដឹកនាំប្រទេសជាតិ»។

សកម្មភាពដ៏មានអត្ថន័យនេះ បានបង្ហាញពីការយកចិត្តទុកដាក់ខ្ពស់របស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ចំពោះសុខទុក្ខរបស់ប្រជាពលរដ្ឋ។ នេះជាគំរូដ៏ល្អសម្រាប់មន្ត្រីរាជការ និងប្រជាពលរដ្ឋទូទៅ ក្នុងការចូលរួមជួយសង្គម និងកសាងប្រទេសជាតិឱ្យកាន់តែរីកចម្រើន៕

ដោយ: ឈុន សារ៉ាត