AKP បន្ទាយមានជ័យ ថ្ងៃទី២៦ ខែមេសា ឆ្នាំ២០២៥ -- ក្រោមការដឹកនាំយ៉ាងយកចិត្តទុកដាក់ពីឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានចាត់តាំងលោក ឃូ ពៅ អភិបាលរងខេត្តឱ្យដឹកនាំកិច្ចប្រជុំដ៏សំខាន់មួយ ដែលបានធ្វើឡើងកាលពីថ្ងៃសុក្រ ទី២៥ ខែមេសា ឆ្នាំ២០២៥ ដើម្បីស្វែងរកដំណោះស្រាយបន្ទាន់ក្នុងការផ្គត់ផ្គង់ទឹកស្អាតជូនប្រជាពលរដ្ឋដែលកំពុងប្រឈមមុខនឹងបញ្ហាខ្វះខាតទឹកប្រើប្រាស់នៅតំបន់មួយចំនួនក្នុងស្រុកមង្គលបូរី។

កិច្ចប្រជុំនេះមានការចូលរួមយ៉ាងសកម្មពីលោក ឡាយ សុទ្ធី អនុប្រធានមន្ទីរធនធានទឹក និងឧតុនិយមខេត្ត និងក្រុមការងារជំនាញ លោក ញ៉ិល ប៊ុនធឿន ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោក រត្ឋ័ដា ស៊ីណង់ អភិបាលនៃគណៈអភិបាលស្រុកមង្គលបូរី ព្រមទាំងតំណាងមកពីក្រុមហ៊ុនផលិតទឹកស្អាតចំនួន៣ នៅក្នុងខេត្ត។

កិច្ចពិភាក្សាដ៏ស៊ីជម្រៅ និងការប្តេជ្ញាចិត្តរួមគ្នាបានធ្វើឱ្យបរិយាកាសនៃកិច្ចប្រជុំនោះពោរពេញទៅដោយការយកចិត្តទុកដាក់ និងស្មារតីសហការខ្ពស់ ដោយភាគីពាក់ព័ន្ធទាំងអស់បានបង្ហាញពីការយល់ដឹងយ៉ាងច្បាស់លាស់អំពីភាពបន្ទាន់នៃបញ្ហាដែលប្រជាពលរដ្ឋកំពុងជួបប្រទះ។   

មានប្រសាសន៍ក្នុងឱកាសនោះ  លោក ឃូ ពៅ អភិបាលរងខេត្តបានគូសបញ្ជាក់អំពីការព្រួយបារម្ភយ៉ាងខ្លាំងរបស់រដ្ឋបាលខេត្តចំពោះការលំបាករបស់ប្រជាពលរដ្ឋ និងបានជំរុញឱ្យមានការស្វែងរកដំណោះស្រាយប្រកបដោយប្រសិទ្ធភាព និងឆាប់រហ័សបំផុត។

លោក ឡាយ សុទ្ធី អនុប្រធានមន្ទីរធនធានទឹក និងឧតុនិយមខេត្ត បានធ្វើបទបង្ហាញសង្ខេបអំពីស្ថានភាពផ្គត់ផ្គង់ទឹកបច្ចុប្បន្ននៅក្នុងស្រុកមង្គលបូរី ដោយលើកឡើងពីបញ្ហាប្រឈម និងតម្រូវការជាក់ស្តែងរបស់ប្រជាពលរដ្ឋ។ លោកក៏បានផ្តល់នូវទិន្នន័យបច្ចេកទេសពាក់ព័ន្ធនឹងប្រភពទឹក និងបណ្តាញចែកចាយដែលអាចនឹងត្រូវបានប្រើប្រាស់ដើម្បីដោះស្រាយបញ្ហាផងដែរ។

ស្របពេលជាមួយគ្នានោះ លោក ញ៉ិល ប៊ុនធឿន បានលើកឡើងពីសារៈសំខាន់នៃការធានាគុណភាពទឹកស្អាតដែលនឹងត្រូវផ្គត់ផ្គង់ជូនប្រជាពលរដ្ឋ ដោយលោកបានណែនាំឱ្យក្រុមហ៊ុនផលិតទឹកស្អាតទាំង៣ យកចិត្តទុកដាក់លើស្តង់ដារបច្ចេកទេស និងអនាម័យ ដើម្បីធានាថាទឹកដែលប្រជាពលរដ្ឋទទួលបាន គឺពិតជាស្អាត និងមានសុវត្ថិភាពសម្រាប់ការប្រើប្រាស់។

លោក រត្ឋ័ដា ស៊ីណង់ ក្នុងនាមជាអ្នកដឹកនាំរដ្ឋបាលស្រុក បានបង្ហាញពីការយល់ដឹងយ៉ាងស៊ីជម្រៅអំពីផលប៉ះពាល់នៃកង្វះទឹកស្អាតមកលើជីវភាពរស់នៅប្រចាំថ្ងៃរបស់ប្រជាពលរដ្ឋនៅក្នុងមូលដ្ឋានរបស់លោក។ លោកបានថ្លែងអំណរគុណចំពោះរដ្ឋបាលខេត្ត និងមន្ទីរជំនាញដែលបានយកចិត្តទុកដាក់ និងចុះមកដោះស្រាយបញ្ហាដ៏សំខាន់នេះ។

ដំណោះស្រាយឈានទៅមុខ គឺការតភ្ជាប់បណ្តាញចែកចាយទឹកផ្អែកលើការពិភាក្សាដ៏ផុសផុល និងប្រកបដោយការស្ថាបនា ក្រុមហ៊ុនផ្គត់ផ្គង់ផលិតទឹកស្អាតទាំង៣ បានបង្ហាញពីស្មារតីទទួលខុសត្រូវខ្ពស់ និងបានឯកភាពជាឯកច្ឆ័ន្ទទៅតាមអនុសាសន៍ដ៏ម៉ឺងម៉ាត់របស់លោក ឃូ ពៅ ក្នុងការសហការគ្នាដើម្បីដោះស្រាយបញ្ហា។ ដំណោះស្រាយចម្បងដែលត្រូវបានឯកភាព គឺការតភ្ជាប់បណ្តាញទុយោទឹកពីក្រុមហ៊ុនមួយទៅក្រុមហ៊ុនមួយទៀត ដែលមានលទ្ធភាពផ្គត់ផ្គង់ទឹកបានគ្រប់គ្រាន់ ដើម្បីជួយសម្រួលដល់តំបន់ដែលកំពុងរងគ្រោះដោយកង្វះទឹកស្អាត។

លោក ឃូ ពៅ បានសង្កត់ធ្ងន់ថា កិច្ចសហប្រតិបត្តិការនេះ គឺជាគំរូដ៏ល្អមួយនៃការរួបរួមគ្នាក្នុងការដោះស្រាយបញ្ហាប្រឈមរួម ដោយលោកបានកោតសរសើរចំពោះស្មារតីសហការ និងការប្តេជ្ញាចិត្តរបស់ក្រុមហ៊ុនទាំង៣ ក្នុងការចូលរួមចំណែកជួយសម្រាលទុក្ខលំបាករបស់ប្រជាពលរដ្ឋ។

ទន្ទឹមនឹងការសម្រេចបាននូវដំណោះស្រាយបឋមនេះ រដ្ឋបាលខេត្ត និងមន្ទីរជំនាញបានប្តេជ្ញាចិត្តបន្តតាមដាន និងត្រួតពិនិត្យយ៉ាងដិតដល់នូវដំណើរការនៃការតភ្ជាប់បណ្តាញទឹក និងការផ្គត់ផ្គង់ទឹកស្អាតជូនប្រជាពលរដ្ឋដើម្បីធានាថា ដំណើរការនេះប្រព្រឹត្តទៅដោយរលូន និងមានប្រសិទ្ធភាព។ អាជ្ញាធរខេត្តក៏បានសន្យាផងដែរថានឹងបន្តធ្វើការសិក្សា និងស្វែងរកដំណោះស្រាយយូរអង្វែងដើម្បីធានាបាននូវការផ្គត់ផ្គង់ទឹកស្អាតប្រកបដោយស្ថិរភាពជូនប្រជាពលរដ្ឋនៅក្នុងស្រុកមង្គលបូរី និងទូទាំងខេត្តបន្ទាយមានជ័យ។

កិច្ចប្រជុំនេះបានបិទបញ្ចប់ក្នុងបរិយាកាសរីករាយ និងពោរពេញដោយក្តីសង្ឃឹម ដោយភាគីពាក់ព័ន្ធទាំងអស់បានបង្ហាញពីការប្តេជ្ញាចិត្តរួមគ្នាក្នុងការធ្វើការងារយ៉ាងជិតស្និទ្ធិដើម្បីផលប្រយោជន៍របស់ប្រជាពលរដ្ឋ។ នេះ គឺជាសក្ខីភាពមួយទៀតដែលបង្ហាញពីការយកចិត្តទុកដាក់យ៉ាងខ្លាំងរបស់រាជរដ្ឋាភិបាល និងរដ្ឋបាលខេត្តបន្ទាយមានជ័យ ក្នុងការដោះស្រាយរាល់បញ្ហាប្រឈមនានាដែលប៉ះពាល់ដល់ជីវភាពរស់នៅរបស់ប្រជាពលរដ្ឋ។

 
សូមជម្រាបឱ្យដឹងថា នៅក្នុងស្រុកមង្គលបូរី ឃុំដែលកំពុងប្រឈមខ្វះខាតទឹកប្រេីប្រាស់ គឺឃុំឬស្សីក្រោក មាន ៤ភូមិ។ ជាក់ស្ដែង ឯកឧត្តម អុំ រាត្រី អភិបាល នៃគណៈអភិបាលខេត្ត ក៏បានដឹកនាំនូវរថយន្តពន្លត់អគ្គីភ័យរបស់ស្នងការដ្ឋាននគរបាលខេត្ត និងអធិការនគរបាលស្រុក សរុបចំនួន ៣គ្រឿង រួមនឹងរថយន្តពន្លត់អគ្គិភ័យរបស់បញ្ជាការដ្ឋានកងរាជអាវុធហត្ថខេត្តចំនួន ៤គ្រឿង ដើម្បីដឹកទឹកជូនដល់បងប្អូនប្រជាពលរដ្ឋដែលខ្វះខាតទឹកនៅភូមិចំនួន៤ នោះដែរ ដែលរួមមាន ភូមិព្រែករល្ពៅ

ភូមិនាងកេត ភូមិហ្លួង និងភូមិឬស្សីក្រោក ដែលមានប្រជាជនសរុបប្រមាណជិត ២០០គ្រួសារ។ រីឯនៅមន្ទីរពេទ្យបង្អែកមិត្តភាពកម្ពុជា-ជប៉ុន ក៏ប្រឈមនឹងការខ្វះខាតទឹកដែរ ដោយក្នុងនោះ កងកម្លាំងតំបន់ប្រតិបត្តិការសឹករងខេត្តបន្ទាយមានជ័យ និងអធិការនគរបាលស្រុក បានដឹកទឹកដើម្បីផ្គត់ផ្គង់មន្ទីរពេទ្យខាងលើជាប្រចាំរហូតទាល់តែមានទឹកប្រើប្រាស់ឡើងវិញ៕

ដោយ: ឈុន សារ៉ាត