AKP កំពង់ធំ ថ្ងៃទី២៦ ខែមេសា ឆ្នាំ២០២៥ -- ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ បានជួបពិភាក្សាការងារជាមួយឯកឧត្តម ង្វៀង មិញវូ ឯកអគ្គរដ្ឋទូតវៀតណាមប្រចាំព្រះរាជាណាចក្រកម្ពុជា និងបានប្រគល់-ទទួលបង្គោល និងអំពូលភ្លើងសូឡាចំនួន ៥០០ដើមជូនដល់រដ្ឋបាលខេត្តកំពង់ធំ ដើម្បីចូលរួមចំណែកជាមួយរដ្ឋបាលខេត្តក្នុងយុទ្ធនាការបំពាក់អំពូលភ្លើងសូឡានៅតាមដងផ្លូវជាតិលេខ៦ ពីព្រំប្រទល់ខេត្តកំពង់ចាមដល់ព្រំប្រទល់ខេត្តសៀមរាប កាលពីរសៀលថ្ងៃទី២៥ ខែមេសា ឆ្នាំ២០២៥ ដោយមានការអញ្ជើញចូលរួមពីលោក លោកស្រីអភិបាលរងខេត្ត កងកម្លាំងទាំងបី មន្ត្រីសាលាខេត្ត ប្រធានមន្ទីរជុំវិញខេត្តអភិបាលក្រុង-ស្រុកទាំង៩ និងបណ្តាក្រុមហ៊ុនវិនិយោគចំការកៅស៊ូក្នុងខេត្តកំពង់ធំ។

ឯកឧត្តម នួន ផារ័ត្ន បានថ្លែងអំណរគុណដល់ក្រុមហ៊ុនវិនិយោគចំការកៅស៊ូដែលបានចូលរួមចំណែកជាមួយរដ្ឋបាលខេត្តនៅក្នុងយុទ្ធនាការបំពាក់អំពូលភ្លើងសូឡាតាមដងផ្លូវជាតិលេខ៦ ដែលបានរួមចំណែកយ៉ាងសំខាន់ក្នុងការកាត់បន្ថយគ្រោះថ្នាក់ចរាចរណ៍ រក្សាសន្តិសុខសណ្តាប់ធ្នាប់ជូនដល់បងប្អូនប្រជាពលរដ្ឋ និងបានលើកទឹកចិត្តដល់អ្នកវិនិយោគក្នុងការវិនិយោគលើការកែច្នៃឈើកៅស៊ូ ដំឡូងមី ស្វាយចន្ទី ជីកសិកម្ម ក៏ដូចជាថ្នាំសម្លាប់សត្វល្អិតដើម្បីឱ្យសេដ្ឋកិច្ចខេត្តកំពង់ធំមានការរីកចម្រើនលូតលាស់បន្ថែមទៀត៕

ដោយ: ស៊ុម វណ្ណា