AKP បន្ទាយមានជ័យ ថ្ងៃទី២៥ ខែមេសា ឆ្នាំ២០២៥-- ព្រឹកថ្ងៃសុក្រ ទី២៥ ខែមេសា ឆ្នាំ២០២៥ គឺជាសក្ខីភាពនៃទំនាក់ទំនងដ៏រឹងមាំ និងការប្តេជ្ញាចិត្តក្នុងការពង្រីកកិច្ចសហប្រតិបត្តិការរវាងព្រះរាជាណាចក្រកម្ពុជា និងសាធារណរដ្ឋហ្វីលីពីន នៅពេលដែលលោកជំទាវ Florida Ann Camille P.Mayo ឯកអគ្គរដ្ឋទូតនៃសាធារណរដ្ឋហ្វីលីពីនប្រចាំព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់អញ្ជើញជួបសម្តែងការគួរសម និងពិភាក្សាការងារដ៏មានសារៈសំខាន់ជាមួយគណៈអភិបាលខេត្តបន្ទាយមានជ័យ ដឹកនាំដោយឯកឧត្តម អ៊ុ រាត្រី អភិបាលនៃខេត្តដ៏សំខាន់មួយនេះ ដោយជំនួបនេះបានប្រព្រឹត្តទៅនៅក្នុងបរិយាកាសស្និទ្ធស្នាល និងប្រកបដោយការយោគយល់គ្នា នៅសាលប្រជុំ (ខ) នៃសាលាខេត្តបន្ទាយមានជ័យ ដោយមានការចូលរួមពីឯកឧត្តម សមាជិកក្រុមប្រឹក្សាខេត្ត លោក លោកស្រី អភិបាលរងខេត្ត តំណាងកងកម្លាំងទាំងបី និងប្រធាន អនុប្រធានមន្ទីរអង្គភាពពាក់ព័ន្ធជាច្រើនរូប។

នៅក្នុងឱកាសនៃជំនួបដ៏មានអត្ថន័យនេះ ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានសម្តែងនូវការស្វាគមន៍យ៉ាងកក់ក្តៅចំពោះលោកជំទាវឯកអគ្គរដ្ឋទូត និងគណៈប្រតិភូ។ ឯកឧត្តមបានលើកឡើងអំពីសារៈសំខាន់នៃទំនាក់ទំនងជាប្រពៃណីដ៏ល្អប្រសើររវាងប្រទេសទាំងពីរ ជាពិសេសបានរំលេចនូវសក្តានុពលដ៏ធំធេងរបស់ខេត្តបន្ទាយមានជ័យ ក្នុងវិស័យកសិកម្ម ពាណិជ្ជកម្ម និងទេសចរណ៍ ដែលអាចជាចំណុចចាប់ផ្តើមនៃកិច្ចសហប្រតិបត្តិការកាន់តែស៊ីជម្រៅនាពេលអនាគត។

ឯកឧត្តមអភិបាលខេត្តបានមានប្រសាសន៍ដោយក្តីសោមនស្សរីករាយយ៉ាងក្រៃលែងចំពោះការអញ្ជើញមកកាន់ខេត្តបន្ទាយមានជ័យរបស់លោកជំទាវឯកអគ្គរដ្ឋទូត និងគណៈប្រតិភូ។ ជំនួបថ្ងៃនេះពិតជាមានសារៈសំខាន់ក្នុងការស្វែងយល់គ្នាទៅវិញទៅមក និងពិភាក្សាអំពីឱកាសសហប្រតិបត្តិការដែលអាចកើតមាន ដើម្បីផលប្រយោជន៍រួមនៃប្រជាជនយើងទាំងពីរ។ ឯកឧត្តមបានបន្ថែមទៀតថា រដ្ឋបាលខេត្តត្រៀមខ្លួនរួចជាស្រេចក្នុងការសហការយ៉ាងជិតស្និទ្ធជាមួយស្ថានទូតហ្វីលីពីន ដើម្បីជំរុញគម្រោង និងសកម្មភាពនានាដែលនឹងនាំមកនូវការអភិវឌ្ឍន៍ និងភាពរីកចម្រើន។

ជាការឆ្លើយតប លោកជំទាវ Florida Ann Camille P.Mayo ឯកអគ្គរដ្ឋទូតនៃសាធារណរដ្ឋហ្វីលីពីន ប្រចាំព្រះរាជាណាចក្រកម្ពុជា បានថ្លែងនូវការកោតសរសើរចំពោះការស្វាគមន៍ដ៏កក់ក្តៅ និងការរៀបចំដ៏ល្អរបស់រដ្ឋបាលខេត្តបន្ទាយមានជ័យ។ លោកជំទាវបានសម្តែងនូវចំណាប់អារម្មណ៍យ៉ាងជ្រាលជ្រៅចំពោះសក្តានុពល និងភាពរីកចម្រើនគួរឱ្យកត់សម្គាល់របស់ខេត្ត ជាពិសេសក្នុងវិស័យកសិកម្ម ដែលហ្វីលីពីនមានបទពិសោធន៍ និងជំនាញជាច្រើនដែលអាចចែករំលែកបាន។

លោកជំទាវបានបន្តទៀតថា ស្ថានទូតហ្វីលីពីនមានឆន្ទៈយ៉ាងមុតមាំក្នុងការជំរុញកិច្ចសហប្រតិបត្តិការមិនត្រឹមតែក្នុងវិស័យកសិកម្មប៉ុណ្ណោះទេ ប៉ុន្តែក៏មានវិស័យពាណិជ្ជកម្ម ទេសចរណ៍ ការអប់រំ និងការផ្លាស់ប្តូរវប្បធម៌ផងដែរ។ លោកជំទាវបានសង្កត់ធ្ងន់លើសារៈសំខាន់នៃការបង្កើតទំនាក់ទំនងរវាងប្រជាជន និងប្រជាជន ដែលជាគ្រឹះដ៏រឹងមាំសម្រាប់កិច្ចសហប្រតិបត្តិការយូរអង្វែង។

នៅក្នុងជំនួបពិភាក្សាការងារ ភាគីទាំងពីរបានផ្លាស់ប្តូរយោបល់យ៉ាងស៊ីជម្រៅលើវិស័យសំខាន់ៗ ដែលជាចំណាប់អារម្មណ៍រួម។ វិស័យកសិកម្មត្រូវបានគេលើកឡើងជាពិសេស ដោយសារខេត្តបន្ទាយមានជ័យជាតំបន់កសិកម្មដ៏សំខាន់របស់កម្ពុជា ហើយហ្វីលីពីនមានបទពិសោធន៍ជោគជ័យក្នុងការអភិវឌ្ឍបច្ចេកវិទ្យាកសិកម្ម និងការគ្រប់គ្រងដំណាំ។ ឱកាសសម្រាប់ការផ្លាស់ប្តូរបច្ចេកទេស ការបណ្តុះបណ្តាល និងការវិនិយោគក្នុងវិស័យនេះត្រូវបានពិភាក្សាយ៉ាងផុសផុល។ ក្រៅពីវិស័យកសិកម្ម ភាគីទាំងពីរបានពិនិត្យមើលលទ្ធភាពនៃកិច្ចសហប្រតិបត្តិការក្នុងវិស័យពាណិជ្ជកម្ម តាមរយៈការជំរុញការផ្លាស់ប្តូរទំនិញ និងសេវាកម្មរវាងខេត្តបន្ទាយមានជ័យ និងតំបន់សក្តានុពលនានានៅហ្វីលីពីន។ វិស័យទេសចរណ៍ក៏ត្រូវបានលើកមកពិភាក្សាផងដែរ ដោយផ្តោតលើការទាក់ទាញភ្ញៀវទេសចរ និងការអភិវឌ្ឍន៍ហេដ្ឋារចនាសម្ព័ន្ធទេសចរណ៍ប្រកបដោយនិរន្តរភាព។

ជាមួយគ្នានោះដែរ ឯកឧត្តម អ៊ុ រាត្រី និងលោកជំទាវ Florida Ann Camille P.Mayo បានឯកភាពគ្នាលើសារៈសំខាន់នៃការបន្តកិច្ចសន្ទនា និងការកសាងទំនាក់ទំនងឱ្យកាន់តែរឹងមាំថែមទៀត។ ភាគីទាំងពីរបានប្តេជ្ញាចិត្តក្នុងការបង្កើតក្រុមការងារបច្ចេកទេស ដើម្បីសិក្សា និងរៀបចំផែនការសកម្មភាពជាក់លាក់សម្រាប់កិច្ចសហប្រតិបត្តិការនាពេលអនាគត ដោយឈរលើមូលដ្ឋាននៃផលប្រយោជន៍រួម និងការគោរពគ្នាទៅវិញទៅមក៕

ដោយ ឈុន សារ៉ាត