AKP ភ្នំពេញ ថ្ងៃទី២៤ ខែមេសា ឆ្នាំ២០២៥-- ឯកឧត្តម ប៊ុត បូវុត រដ្ឋលេខាធិការក្រសួងព័ត៌មាន សមាជិកក្រុមការងារគ្រប់គ្រងការផ្សាយផលិតផលគ្រឿងស្រវឹង (ក.គ.ផ.ស.) បានគូសបញ្ជាក់ថា ទន្ទឹមនឹងការរីកចម្រើននៃវិស័យឧស្សាហកម្មគ្រឿងស្រវឹងនៅកម្ពុជា ដែលបានរួមចំណែកដល់ការលូតលាស់នៃសេដ្ឋកិច្ចជាតិ ឧស្សាហកម្មគ្រឿងស្រវឹងនេះក៏បានជះឥទ្ធិពលអវិជ្ជមានដល់សង្គម វប្បធម៌ សុខុមាលភាពសាធារណៈ និងការប្រកួតប្រជែងមិនស្មោះត្រង់តាមរយៈការធ្វើទីផ្សារដោយខ្វះការទទួលខុសត្រូវផងដែរ។ ការលើកឡើងរបស់ឯកឧត្តម ប៊ុត បូវុត ដូចនេះ ធ្វើឡើងពិធីបើកសិក្ខាសាលាផ្សព្វផ្សាយលទ្ធផលការអង្កេតស្តីពីទស្សនៈរបស់សាធារណជន ចំពោះការផ្សាយពាណិជ្ជកម្មគ្រឿងស្រវឹង ដែលរៀបចំឡើងដោយរាជបណ្ឌិតសភាកម្ពុជា សហការជាមួយក្រសួង ស្ថាប័នជាតិ អន្តរជាតិ និងដៃគូពាក់ព័ន្ធ នៅរាជបណ្ឌិត្យសភាកម្ពុជា នាព្រឹកថ្ងៃទី២៤ ខែមេសា  ឆ្នាំ២០២៥នេះ។

ឯកឧត្តម រដ្ឋលេខាធិការ ប៊ុត បូវុត បានថ្លែងថា ការផ្សាយពាណិជ្ជកម្មផលិតផលគ្រឿងស្រវឹងយ៉ាងគគ្រឹកគគ្រេង និងផ្តល់រង្វាន់យ៉ាងច្រើនតាមគ្រប់មធ្យោបាយនៅតាមប្រព័ន្ធផ្សព្វផ្សាយសោតទស្សន៍ និងបណ្តាញទំនាក់ទំនងសង្គម ដើម្បីទាក់ទាញអតិថិជនរៀងៗខ្លួន ជំរុញឱ្យមហាជន ជាពិសេសស្រទាប់យុវជនឈ្លក់វង្វេងនៅក្នុងការទទួលទានគ្រឿងស្រវឹងដើម្បីផ្សងសំណាងតាមយករង្វាន់ ធ្វើឱ្យប៉ះពាល់ដល់ការសិក្សា សុខុមាលភាពសាធារណៈ សណ្តាប់ធ្នាប់សង្គម និងបើកបរក្នុងស្ថានភាពស្រវឹង ខ្វះការទទួលខុសត្រូវបង្កឱ្យកើតមានគ្រោះថ្នាក់ចរាចរណ៍កើតមានឡើងជាញឹកញាប់។ ឯកឧត្តមបានបន្តថា មានក្រុមហ៊ុនឧស្សាហកម្មគ្រឿងស្រវឹងមួយចំនួនបានប្រើប្រាស់រូបភាពទាក់ទាញ ក្នុងការផ្សាយពាណិជ្ជកម្មផលិតផលគ្រឿងស្រវឹង ធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរបស់ស្ត្រីខ្មែរទូទៅ និងវប្បធម៌ដ៏ល្អរបស់ជាតិ ហើយក៏មានក្រុមហ៊ុនស្រាបៀរមួយចំនួនក៏បានបំពានលក្ខខណ្ឌនៃការផ្សាយពាណិជ្ជកម្មដើម្បីដណ្តើមទីផ្សារ ដោយបានដាក់លក្ខខណ្ឌទៅលើម្ចាស់ប្រព័ន្ធផ្សព្វផ្សាយតម្រូវឱ្យគោរពតាមលក្ខខណ្ឌរបស់ក្រុមហ៊ុនខ្លួន ដើម្បីទទួលបានការផ្សាយពាណិជ្ជកម្មផលិតផលគ្រឿងស្រវឹង ដែលប្រាសចាកអំពីក្រមសីលធម៌វិជ្ជាជីវៈសារព័ត៌មាន ជាពិសេសកម្មវិធីផ្សាយផ្ទាល់ ដែលម្ចាស់ស្ថានីយទូរទស្សន៍ពុំបានដឹងជាមុនអំពីសេណារីយោរបស់ក្រុមហ៊ុនដែលត្រូវផ្សាយផ្ទាល់ គឺផ្សាយទៅតាមការចាត់ចែងរបស់ក្រុមហ៊ុនឧបត្ថម្ភកម្មវិធីដែលធ្វើឱ្យកើតមានភាពមិនប្រក្រតីឥតបណ្តាប់ធ្នាប់។

ទាក់ទងទៅនឹងការរៀបចំសិក្ខាសាលាផ្សព្វផ្សាយលទ្ធផលការអង្កេតស្តីពីទស្សនៈរបស់សាធារណជន ចំពោះការផ្សាយពាណិជ្ជកម្មគ្រឿងស្រវឹងនាពេលនេះ បណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិន នៃរាជបណ្ឌិត្យសភាកម្ពុជាបានថ្លែងថា បានធ្វើឡើងបន្ទាប់ពីវិទ្យាស្ថានបានរៀបចំការសិក្សាស្រាវជ្រាវមួយស្តីពី «ទស្សនៈការផ្សាយពាណិជ្ជកម្មនៅកម្ពុជា» ដោយមានការចូលរួមសហការជាមួយអង្គការចលនាដើម្បីសុខភាពកម្ពុជាកាលពីខែមករា ឆ្នាំ២០២៥នេះ។ ការសិក្សាស្រាវជ្រាវនេះបានធ្វើឡើងក្នុងខេត្តចំនួន៥ក្នុងប្រទេសកម្ពុជាលើប្រជាពលរដ្ឋ ១៥១៥នាក់ ដែលមានអាយុ១៨ឆ្នាំឡើងទៅ ដែលធ្វើការជ្រើសរើសដោយចៃដន្យលក្ខណៈជាប្រព័ន្ធ ហើយនៅចុងខែមីនា ឆ្នាំ២០២៥ ក្រុមការងារស្រាវជ្រាវបានបញ្ចប់ការសិក្សាស្រាវជ្រាវដោយបរិបូរណ៍ និងបានរៀបចំជារបាយការណ៍ស្រាវជ្រាវឡើង និងឈានដល់ការធ្វើសិក្ខាសាលាផ្សព្វផ្សាយពីលទ្ធផលនៃការអង្កេតនាពេលនេះ ដែលការសិក្សាស្រាវជ្រាវ ស្តីពីទស្សនៈសាធារណជនចំពោះការផ្សាយពាណិជ្ជកម្មនៅកម្ពុជានេះ មានគោលបំណងដើម្បីស្វែងយល់ពីទស្សនទាន និងការយល់ឃើញរបស់ប្រជាពលរដ្ឋទូទៅទៅលើការផ្សាយពាណិជ្ជកម្មគ្រឿងស្រវឹង និងការគាំទ្ររបស់ប្រជាជនលើការកំហិតការផ្សាយពាណិជ្ជកម្មគ្រឿងស្រវឹង។ សនិទានដែលនាំដល់ការសិក្សាស្រាវជ្រាវនេះ ប្រជាពលរដ្ឋកម្ពុជាម្នាក់បានប្រើប្រាស់គ្រឿងស្រវឹងសុទ្ធចំនួន ២១លីត្រ ក្នុង១ឆ្នាំ ដែលបុរសប្រើប្រាស់៣ដងច្រើនជាងស្ត្រី ដែលការប្រើប្រាស់គ្រឿងស្រវឹងនេះបានបណ្តាលឱ្យមានអ្នកស្លាប់ចំនួន ៥.៣ភាគរយ នៃចំនួនអ្នកស្លាប់ទាំងអស់នៅលើពិភពលោក ហើយគ្រឿងស្រវឹងបង្កឱ្យកើតជំងឺផ្សេងៗជាកត្តាហានិភ័យឈានមុខមួយបណ្តាលឱ្យកើតជំងឺមិនឆ្លង ភាពមិនប្រក្រតីខាងផ្លូវចិត្ត គ្រោះថ្នាក់ចរាចរណ៍ និងភាពក្រីក្រនៅក្នុងពិភពលោក។ ក្រៅពីនេះគ្រឿងស្រវឹងក៏ជាដើមហេតុនៃការបាត់បង់សណ្តាប់ធ្នាប់សង្គម អំពើហិង្សាក្នុងគ្រួសារ ការខាតបង់សេដ្ឋកិច្ចបុគ្គល និងសង្គម និងបញ្ហាសង្គមជាច្រើនទៀត។

បណ្ឌិត គី សេរីវឌ្ឍន៍ ជឿជាក់ថា អង្គសិក្ខាសាលានាពេលនេះនឹងបង្ហាញជូនសាធារណជននូវទស្សនៈនានារបស់មហាជនជុំវិញការផ្សាយពាណិជ្ជកម្មផលិតផលគ្រឿងស្រវឹងនៅកម្ពុជា រួមផលនិងប៉ះពាល់នានាលើវិស័យសុខភាពសាធារណៈនៅកម្ពុជាផងដែរ៕

ដោយ៖ ចាន់ សុភឿន