AKP ភ្នំពេញ ថ្ងៃទី២២ ខែមេសា ឆ្នាំ២០២៥-- ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ រួមដំណើរដោយឯកឧត្ដមអនុរដ្ឋលេខាធិការ ប្រធានមន្ទីរអភិវឌ្ឍន៍ជនបទខេត្តកំពត និងមន្ដ្រីជំនាញ បានអញ្ជើញទៅពិនិត្យស្ថានភាពស្ពានឈើមួយកន្លែងឆ្លងកាត់ទំនប់ស្ទឹងកែវ មានប្រវែង៥០ម៉ែត្រ ទទឹង៥ម៉ែត្រ ស្ថិតនៅក្នុងភូមិកំពង់ចិន ឃុំស្ទឹងកែវ ស្រុកទឹឈូ ខេត្តកំពត កាលពីថ្ងៃទី២១ ខែមេសា ឆ្នាំ២០២៥។

ស្ពានឈើនេះមានអាយុកាលច្រើនឆ្នាំមកហើយ និងត្រូវបានជួសជុលប្រើប្រាស់ឡើងវិញក្នុងអំឡុងឆ្នាំ២០២២។ បច្ចុប្បន្នស្ពានមានសភាពចាស់ទ្រុឌទ្រោមខ្លាំង ដែលធ្វើឱ្យប្រជាជនក្នុងឃុំចំនួន៣ គឺឃុំស្ទឹងកែវ ឃុំព្រៃថ្នង និងឃុំថ្មី នៃស្រុកទឹកឈូ សរុបប្រមាណ ៥ ៧៤៦ គ្រួសារ ស្មើនឹង ២៤ ៨៤២ នាក់ ពិបាកក្នុងការធ្វើដំណើរឆ្លងកាត់ ជាពិសេសពិបាកក្នុងការដឹកជញ្ជូនកសិផលរបស់ប្រជាកសិករ ក្នុងតំបន់កសិឧស្សាហកម្មនៅប៉ែកខាងជើងឆៀងខាងលិច នៃស្រុកទឹកឈូ មកកាន់ទីរួមខេត្តកំពត។

ក្នុងឱកាសនោះ ឯកឧត្តមរដ្ឋមន្ត្រីបានអញ្ជើញជួបសំណេះសំណាលជាមួយប្រជាពលរដ្ឋក្នុងមូលដ្ឋាន ដោយបានពាំនាំនូវប្រសាសន៍ផ្តាំផ្ញើសាកសួរសុខទុក្ខ និងសេចក្តីនឹករលឹក ព្រមទាំងពរជ័យសព្ទសាធុការពីសំណាក់សម្ដេចតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និង សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ជូនចំពោះប្រជាពលរដ្ឋនៅទីនោះ និងបានជម្រាបជូនអំពីការខិតខំប្រឹងប្រែងរបស់រាជរដ្ឋាភិបាលក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋន្រ្ដីនៃព្រះរាជាណាចក្រកម្ពុជា ក្នុងការកសាងហេដ្ឋារចនាសម្ព័ន្ធ ជាពិសេស បណ្ដាញគមនាគមន៍ជនបទ រួមមានផ្លូវ ស្ពាន ដែលជាសរសៃឈាមនៃសេដ្ឋកិច្ចដ៏សំខាន់របស់ប្រជាពលរដ្ឋ ក្នុងការដឹកជញ្ជូនកសិផល និងក្នុងការធ្វើដំណើរទៅទទួលយកសេវាសាធារណៈ រួមមានមន្ទីរពេទ្យ វត្តអារាម សាលារៀន និងសេវាផ្សេងៗទៀត បានឆាប់រហ័ស ចំណេញទាំងពេលវេលា និងថវិកា។

មានប្រសាន៍ក្នុងឱកាសនោះ ឯកឧត្ដមរដ្ឋមន្រ្ដី បានណែនាំដល់មន្ដ្រីបច្ចេកទេសក្រសួង និងមន្ទីរ សហការជាមួយអាជ្ញាធរមូលដ្ឋាន ធ្វើការសិក្សារចនាប្លង់លម្អិត  ដើម្បីសាងសង់ជាស្ពានថ្មីជូនប្រជាពលរដ្ឋនៅចុងឆ្នាំ២០២៥នេះ ឬនៅឆ្នាំ២០២៦ ខាងមុខ។

ជាមួយគ្នានោះដែរ អាជ្ញាធរមូលដ្ឋាន និងប្រជាពលរដ្ឋបានថ្លែងអំណរគុណចំពោះការយកចិត្តទុកដាក់សុខទុក្ខប្រជាពលរដ្ឋពីសំណាក់រាជរដ្ឋាភិបាលក្រោមការដឹកនាំរបស់សម្តេចមហាបវរធិបតីហ៊ុន ម៉ាណែត ដែលបានចាត់ឱ្យក្រសួងអភិវឌ្ឍន៍ជនបទជាសេនាធិការចុះមកដោះស្រាយការលំបាកតាមសំណូមពរប្រជាពលរដ្ឋ ហើយពួកគាត់សង្ឃឹមថា ជីវភាពរស់នៅរបស់ពួកគាត់នឹងប្រសើរឡើង ជាពិសេសពួកគាត់លែងភ័យខ្លាចពេលធ្វើដំណើរ ឬដឹកជញ្ជូនកសិផល ឆ្លងកាត់ស្ពាននេះទៀតហើយ៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)