AKP ពោធិ៍សាត់ ថ្ងៃទី២២ ខែមេសា ឆ្នាំ២០២៥–សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាមានប្រសាសន៍ថា ផលិតកម្មរបស់ក្រុមហ៊ុន Ford នៃសហរដ្ឋអាមេរិកនៅលើទឹកដីស្រុកក្រគរ ខេត្តពោធិ៍សាត់ គឺជាមោទនភាពរួមរបស់ប្រជាជនកម្ពុជានៅទូទាំងប្រទេស ក្នុងការទទួលបាននូវវត្តមានរបស់ឧស្សាហកម្មធុនធ្ងន់ទំនើប ដែលបាន និងកំពុងចូលរួមបង្កើនឱកាសកំណើនការងារ  ការអភិវឌ្ឍធនធានមនុស្ស ការផ្ទេរបច្ចេកវិទ្យា ព្រមទាំងការអនុវត្តផ្ទាល់ផងដែរ ហើយថាសម្តេចពិតជាមានមោទនភាព និងវាយតម្លៃខ្ពស់ចំពោះគ្រប់ភាគីពាក់ព័ន្ធនៅក្នុងការចូលរួមចំណែកដល់ការអភិវឌ្ឍវិស័យយានយន្តនៅកកម្ពុជា ជាពិសេសចំពោះក្រុមហ៊ុនអន្តរជាតិ RMA ដែលជាក្រុមហ៊ុនឈានមុខមួយក្នុងការផ្តល់សេវា និងផលិតផលជូនដល់ប្រជាពលរដ្ឋកម្ពុជា។ ការលើកឡើងរវបស់សម្តេចធិបតីនាយករដ្ឋមន្ត្រីដូចនេះ ធ្វើឡើងក្នុងពិធីសម្ពោធដាក់ឱ្យដំណើរការនូវខ្សែច្រវាក់ផលិតកម្មថ្មី និងរោងចក្រដំឡើងគ្រឿងបង្គុំរថយន្ត Ford របស់ក្រុមហ៊ុន RMA Cambodia ស្ថិតនៅក្នុងស្រុកក្រគរ ខេត្តពោធិ៍សាត់ នាព្រឹកថ្ងៃទី២២ ខែមេសា ឆ្នាំ២០២៥នេះ។

សម្តេចនាយករដ្ឋមន្ត្រីបានគូសបញ្ជាក់ថា សមិទ្ធផលដែលយើងបានសម្ពោធដាក់ដំណើរការនាពេលនេះ វាជាសមិទ្ធផលថ្មីបន្ថែមមួយទៀតសម្រាប់ប្រទេសកម្ពុជា ដែលពីមួយជំហានទៅមួយជំហាន ពីមួយថ្ងៃ ទៅមួយថ្ងៃ គឺយើងទទួលបាននូវសមិទ្ធផលថ្មីៗបន្ថែមទៀត ដ្បិតថាយើងមិនទាន់មានអ្វីគ្រប់សព្វនៅឡើយក៏ដោយ ប៉ុន្តែពីមួយថ្ងៃទៅមួយថ្ងៃនៅក្រោមសុខសន្តិភាពបានបើកឱកាសឱ្យយើងឈានទៅដល់ ការចាប់បាននូវកាលានុវត្តភាពរបស់កម្ពុជា និងប្រែក្លាយកាលានុវត្តភាពទៅជាមិទ្ធផលជាក់ស្តែង។ 

សម្តេចបានហៅក្រុមហ៊ុន RMA ថាជាក្រុមហ៊ុនយក្សរបស់សហរដ្ឋអាមេរិក ហើយជាមោទនភាពខ្លាំងណាស់ដែលក្រុមហ៊ុនមួយនេះបានសម្រេចចិត្តមកបោះទុនវិនិយោគនៅកម្ពុជា។ យើងសូមអរគុណចំពោះស្ថាប័នពាក់ព័ន្ធ រួមមាន ក្រុមប្រឹក្សាអភិវឌ្ឍន៍កម្ពុជា (CDC) អាជ្ញាធរខេត្ត រួមនឹងផ្នែកពាក់ព័ន្ធដទៃ ទៀតក្នុងការជួយរៀបចំឱ្យក្រុមហ៊ុន RMA អាចដំណើរការបើករោងចក្របាននៅលើទឹកដីនៃស្រុកក្រគរ ខេត្តពោធិ៍សាត់នេះ ដោយសម្តេចធិបតីនាយករដ្ឋមន្ត្រីបានគូសបញ្ជាក់ថា ប្រសិនបើគ្មានការបង្កលក្ខណៈងាយស្រួលគឺទៅមិនរួចទេ បើគ្មានការយកចិត្តទុកដាក់គឺទៅមិនរួចទេ បើគ្មានការខិតខំជួយសម្រួល គឺទៅមិនរួចទេ ដោយសម្តេចបានទទួលជួបជាមួយតំណាងក្រុមហ៊ុនមួយនេះតាំងពីមុនសម្តេចឡើងកាន់ដំណែងជានាយករដ្ឋមន្ត្រីដើម្បីធ្វើការដោះស្រាយបញ្ហាសេសសល់មួយចំនួនដែលនាំឱ្យក្រុមហ៊ុន RMA អាចសាងសង់រោងចក្រនៅកម្ពុជាបាន និងបានដំណើរការដោយជោគជ័យក្នុងរយៈពេល៣ឆ្នាំកន្លងមកនេះ ដែលជាចាប់ផ្តើមដំបូងក្រុមហ៊ុនមានបុគ្គលិកបម្រើការងារតែចំនួន ១៦០នាក់ប៉ុណ្ណោះ ដោយទទួលបានប្រាក់បៀវត្សចន្លោះពី ២៥០ ទៅ ៦០០ដុល្លារអាម៉េរិក តែមកដល់ឆ្នាំ២០២៥នេះបុគ្គលិកបម្រើការងារនៅក្នុងរោងចក្រមួយនេះបានកើនឡើងរហូតដល់ ៤០៤នាក់ ហើយចំពោះប្រាក់បៀវត្សបានកើនឡើងចន្លោះពី ៣២០ ទៅ ៨០០ ដុល្លារអាម៉េរិក ដែលនេះហើយគឺជាការវិវឌ្ឍន៍ថ្មីសម្រាប់ទីនេះ ខណៈដែលទីនេះក៏មានផងដែរនូវតំបន់សេដ្ឋកិច្ចពិសេស វាផ្ទុយកាលពីអតីតកាល ដែលខេត្តកំពង់ឆ្នាំង និងខេត្តពោធិ៍សាត់គេច្រើនតែទៅហួស មកហួស តែឥឡូវនេះបើយើងនិយាយពីខេត្តពោធិ៍សាត់វាបានក្លាយទៅជាតំបន់សក្តានុពលខាងផ្នែកឧស្សាហកម្ម ពាណិជ្ជកម្មមួយយ៉ាងសំខាន់ ដោយផលនៃការបង្កើតរោងចក្រ សហគ្រាស ដែលបានចាប់ផ្តើមតាំងតែពីអត់ទាន់មានតំបន់សេដ្ឋកិច្ចពិសេសទៅជាមានតំបន់សេដ្ឋកិច្ចពិសេស តាំងពីរោងចក្រ សហគ្រាស ៣០០កាលពី៣ឆ្នាំមុន មកជាង ៤០០រោងចក្រ សហគ្រាសនាពេលបច្ចុប្បន្ន ដោយផ្តល់ការងារនៅហ្នឹងកន្លែងជូនពលរដ្ឋរាប់ម៉ឺននាក់៕

ដោយ៖ ចាន់ សុភឿន