AKP សៀមរាប ថ្ងៃទី២២ ខែមេសា ឆ្នាំ២០២៥-- ក្រោយពីបញ្ចប់នៃពិធីបុណ្យចូលឆ្នាំថ្មីប្រពៃណីជាតិខ្មែរ ថ្ងៃទី២១ខែមេសាឆ្នាំ២០២៥ ព្រះមន្ត្រីសង្ឃខេត្ត និងពុទ្ធបរិស័ទខេត្តសៀមរាប ដឹកនាំដោយធម្មសេរី ជុំ គឹមឡេង ព្រះសុមង្គលសិលាចារ្យ ព្រះមេគណខេត្តសៀមរាប បានចុះសួរសុខទុក្ខ និងនាំយកគ្រឿងឧបភោគបរិភោគ បានពីការប្រគេនរបស់សម្តេចព្រះព្រហ្មរតនមុនី សិរីសុវណ្ណោ ពិន សែម សមាជិកថេរសភាព្រះពុទ្ធសាសនានៃព្រះរាជាណាចក្រកម្ពុជា គណៈមហានិកាយ ជាព្រះចៅអធិការ វត្តរាជបូណ៌ក្រុងសៀមរាប ទៅចែកជូនកងទ័ព នៅប្រាសាទតាមាន់និងប្រាសាទតាក្របីដែលកំពុងឈរជើងការពារខ្សែបន្ទាត់ព្រំដែនខេត្តឧត្តរមានជ័យ។

ព្រះធម្មសិរី ជុំ គឹមឡេង បានកោតសរសើរដល់បងប្អូនកងទ័ពទាំងអស់ ដែលឈរជើងតាមបន្ទាត់ព្រំដែនថាបានលះបង់កម្លាំងកាយចិត្ត ការពារជាតិ អធិបតេយ្យភាព បូរណភាពទឹកដី ដើម្បីសុខសន្តិភាពស្ថិរភាព ជាពិសេសបានយកចិត្តទុកដាក់យ៉ាងខ្លាំង ចំពោះការងារគ្រប់គ្រងព្រំដែន។ ព្រះមេគណខេត្តមានថេរដីកាថា សកម្មភាពមកសួរសុខទុក្ខកងទ័ពជួរមុខនេះ ក្នុងបំណងផ្សារភ្ជាប់មនោសញ្ចេតនារំលែកការលំបាករវាងព្រះសង្ឃ និងកងទ័ព ក្នុងន័យជួយលើកទឹកចិត្ត និងបានដឹងពីសុខទុក្ខ  ខណៈដែលពិធីបុណ្យចូលឆ្នាំថ្មីៗនេះ បងប្អូនប្រជាពលរដ្ឋក្នុងទូទាំងប្រទេសរីករាយសាទរសប្បាយតែបងប្អូនកងទ័ពមានភារកិច្ចការពារខ្សែក្រវ៉ាត់ព្រំដែនជួរមុខដើម្បីបូរណភាពទឹកដី ហើយព្រះសង្ឃនិងប្រជាពុទ្ឋបរិស័ទនៅជួរក្រោយ និងមិនដែលភ្លេចសោះឡើយពីសុខទុក្ខ ការលំបាក និងការលះបង់កម្លាំងកាយចិត្តរបស់វីរកងទ័ពខ្មែរដែលកំពុងបំពេញភារកិច្ចក្នុងបុព្វហេតុការពារមាតុប្រទេសកម្ពុជាឡើយ។

ឧត្តមសេនីយ៍ត្រី ឈឹម យ៉ើត មេបញ្ជាការរងកងពលតូចលេខ៤២ ខេត្តឧត្តរមានជ័យ បានឱ្យដឹងខ្លះៗពីសភាពការណ៍និងស្ថានភាពតាមបណ្តោយព្រំដែននៅតំបន់នោះថាបច្ចុប្បន្ននេះ សភាពការណ៍នៅតាមបណ្តោយព្រំដែនក្នុងភូមិសាស្ត្រអង្គភាពនេះឈរជើង គឺមានសភាពស្ងប់ស្ងាត់ពុំមានអ្វីប្រែប្រួលឡើយ តែយ៉ាងណាក៍ដោយ ក៏កងទ័ពនៅតែប្រុងស្មារតី និងប្រុងប្រយត្ន័ខ្ពស់ពុំធ្វេសប្រហែសឡើយ។

ទន្ទឹមនឹងនេះ ឧត្តមសេនីត្រី ឈឹម យ៉ើត បានបង្ហាញនូវសកម្មភាពការងារ ក្រៅពីការងារស្នូល ការពារ រក្សាសន្តិសុខសណ្តាប់ធ្នាប់ខ្សែក្រវ៉ាត់ព្រំដែន ក៍បានយកចិត្តទុកដាក់ឱ្យយោធិនចូលរួមការងារកសាងអង្គភាពទៀតផង។

សូមជម្រាបថា ព្រះមេគណ និងមន្ត្រីសង្ឃខេត្តបានប្រគល់ជូនថវិកាចំនួន១៥.១៤៥.០០០ (ដប់ប្រាំលានមួយរយសែសិបប្រាំពាន់) រៀល គ្រឿងឧបភោគបរិភោគ រួមមាន មីជាតិចំនួន១២៩កេស អង្ករ១តោន ព្រមទាំងភេសជ្ជៈ ត្រីខ ប្រហុក ទឹកស៊ីអ៊ីវ ទឹកត្រី អំបិលជាដើម៕

ដោយ ឃុត សៅ