AKP ភ្នំពេញ ថ្ងៃទី២១ ខែមេសា ឆ្នាំ២០២៥--
ឯកឧត្តមបណ្ឌិត លី ធុជ ទេសរដ្ឋមន្ដ្រី ទទួលបន្ទុកបេសកកម្មពិសេស និងប្រធានគណៈកម្មាធិការជាតិអេស្កាប់ បានចូលរួមកម្មវិធីសន្និបាតប្រចាំឆ្នាំលើកទី៨១ របស់គណៈ កម្មការសេដ្ឋកិច្ច និងសង្គមកិច្ចសម្រាប់អាស៊ី និងប៉ាស៊ីហ្វិក នៃអង្គការសហប្រជាជាតិ (UN-ESCAP) នៅថ្ងៃទី២១ខែមេសា ឆ្នាំ២០២៥ នៅទីស្នាក់ការអង្គការសហប្រជាជាតិ ទីក្រុងបាងកក ប្រទេសថៃ ។ 
       សន្និបាតប្រចាំឆ្នាំលើកទី៨១ របស់ UN-ESCAP ប្រព្រឹត្តទៅក្រោមមូលបទ “កិច្ចសហប្រតិបត្តិការក្នុងតំបន់ សម្រាប់ការអភិវឌ្ឍទីក្រុងប្រកបដោយចីរភាព នៅក្នុងតំបន់អាស៊ី និងប៉ាស៊ីហ្វិក” និងមានការចូលរួមពីគណៈប្រតិភូនៃប្រទេសចំនួនជាង៦០ ក្នុងតំបន់អាស៊ី និងប៉ាស៊ីហ្វិក ព្រម ទាំងតំណាងស្ថាប័នសំខាន់ៗរបស់អង្គការសហប្រជាជាតិ អង្គការអន្តរជាតិ ដៃគូអភិវឌ្ឍន៍ ស្ថាប័នហិរញ្ញវត្ថុអន្តរជាតិ និងសង្គមស៊ីវិល។

      កម្មវិធីបើកនៃសន្និបាតប្រចាំឆ្នាំនេះ ក៏មានការការអញ្ជើញជាកិត្តិយស ថ្លែងសុន្ទរកថា បើកដោយ លោកជំទាវ Paetongtarn Shinawatra នាយករដ្ឋមន្ត្រីនៃព្រះរាជា ណាចក្រថៃ លោកជំទាវ Armida Salsiah Alisjahba na អគ្គលេខាធិការរងអង្គារសហប្រជាជាតិ និងជាប្រធាន UN-ESCAP លោកជំទាវ Amina J. Mohammed អគ្គលេខាធិការរងអង្គការសហប្រជាជាតិ ឯកឧត្តម Bob Rae ប្រធានទី៨០ នៃក្រុមប្រឹក្សាសេដ្ឋកិច្ច និងសង្គមនៃអង្គការសហប្រជាជាតិ និងឯកឧត្តម Philemon Yang ប្រធានមហាសន្និបាតអង្គការសហប្រជាជាតិលើកទី៧៩។

      ឯកឧត្ដមបណ្ឌិត លី ធុជ បានបញ្ជាក់ថា UN-ESCAP ត្រូវបានបង្កើតឡើងក្នុងឆ្នាំ១៩៤៧ ដែលមានទីស្នាក់ការកណ្តាល នៅទីក្រុងបាងកក ប្រទេសថៃ ដោយមានគោលបំណងសម្រេចឱ្យបាននូវតំបន់អាស៊ីប៉ាស៊ីហ្វិកមួយដែលមានភាពធន់ ដោយឈរលើគោលការណ៍នៃភាពរុងរឿងរួមគ្នា ប្រកបដោយសមធម៌សង្គម និងចីរភាព ព្រម ទាំងផ្តល់វេទិកាមួយសម្រាប់រដ្ឋជាសមាជិករបស់ខ្លួន ក្នុងការលើកកម្ពស់កិច្ចសហប្រតិបត្តិការក្នុងតំបន់ និងសកម្មភាពរួម ស្របតាមរបៀបវារៈឆ្នាំ២០៣០សម្រាប់ការអភិវឌ្ឍប្រកប ដោយចីរភាព ដែលជួយប្រទេសនានាឱ្យសម្រេចបាននូវកំណើនសេដ្ឋកិច្ចរួមគ្នា និងសមធម៌សង្គម។ 

     ឯកឧត្ដមបានបន្ដថា៖ លើសពីនេះUN-ESCAP ជំរុញការចូលរួមរបស់ប្រទេសតូចៗ និងមិនសូវទទួលបានការយក ចិត្តទុកដាក់ ប្រទេសមានការអភិវឌ្ឍតិចតួច និងប្រទេសដែលមិនមានដែនសមុទ្រ ៕

 ដោយ៖  សួស សំរិត