AKP បន្ទាយមានជ័យ ថ្ងៃទី២១ ខែមេសា ឆ្នាំ២០២៥-- 

ក្រោមវត្តមានរបស់ឯកឧត្ដម ប្លែក វ៉ារី ប្រធានក្រុមប្រឹក្សាខេត្ត និងឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ ពិធីក្រុងពាលីបញ្ចុះបឋមសិលាសាងសង់អគាររដ្ឋបាលស្រុកព្រះនេត្រព្រះ បានប្រព្រឹត្តទៅយ៉ាងឱឡារិក នៅថ្ងៃចន្ទ ទី២១ ខែមេសា ឆ្នាំ២០២៥ ដែលជាសញ្ញាវិជ្ជមានមួយទៀតក្នុងការលើកកម្ពស់ប្រសិទ្ធភាពការងារ និងការផ្តល់សេវាសាធារណៈជូនប្រជាពលរដ្ឋក្នុងខេត្ត។

អគាររដ្ឋបាលថ្មីនេះមានទំហំធំទូលាយ៣៦ម៉ែត្រ គុណនឹង១៤ម៉ែត្រ និងមានកម្ពស់បីជាន់ ដែលនឹងក្លាយជាទីតាំងបម្រើការងារដ៏សំខាន់មួយសម្រាប់មន្ត្រីរាជការស្រុកព្រះនេត្រព្រះ ក្នុងការបំពេញភារកិច្ចបម្រើប្រជាពលរដ្ឋឱ្យកាន់តែល្អប្រសើរ។ នេះគឺជាអគាររដ្ឋបាលទីប្រាំមួយហើយនៅក្នុងខេត្តបន្ទាយមានជ័យ ដែលត្រូវបានសាងសង់ឡើងតាមស្តង់ដាររដ្ឋបាល តាមរយៈគម្រោងថវិការបស់រដ្ឋបាលខេត្ត ដោយបច្ចុប្បន្ននៅសល់តែ៣ក្រុង-ស្រុកទៀតប៉ុណ្ណោះដែលមិនទាន់មានអគាររដ្ឋបាលប្រភេទនេះ។

ថ្លែងក្នុងឱកាសនោះ លោក ហឿន វីរៈ អភិបាលស្រុកព្រះនេត្រព្រះ បានសម្តែងការដឹងគុណយ៉ាងជ្រាលជ្រៅចំពោះប្រមុខរាជរដ្ឋាភិបាល ក្រសួងមហាផ្ទៃ និងជាពិសេសរដ្ឋបាលខេត្តបន្ទាយមានជ័យ ដែលបានផ្តល់អគាររដ្ឋបាលដ៏មានសារៈសំខាន់នេះ។ លោកបានបញ្ជាក់ថា អគារថ្មីនេះនឹងជួយលើកកម្ពស់បរិយាកាសការងាររបស់មន្ត្រី និងជាពិសេសនឹងផ្តល់ភាពងាយស្រួលដល់បងប្អូនប្រជាពលរដ្ឋក្នុងការទទួលសេវាផ្សេងៗ រួមទាំងសេវាសំណូមពរទាក់ទងនឹងជីវភាពរស់នៅប្រចាំថ្ងៃ។

គួរឱ្យដឹងផងដែរថា គិតមកដល់ពេលនេះ ខេត្តបន្ទាយមានជ័យមានរដ្ឋបាលក្រុង-ស្រុកចំនួន ៦ ហើយដែលទទួលបានអគាររដ្ឋបាលស្តង់ដារ រួមទាំងស្រុកព្រះនេត្រព្រះដែលទើបនឹងបើកការដ្ឋានសាងសង់នេះ។ កាលពីឆ្នាំ២០២៤ ក្រុងសិរីសោភ័ណបានសម្ពោធដាក់ឱ្យប្រើប្រាស់អគាររដ្ឋបាលថ្មីដែលសាងសង់រួចរាល់១០០% ខណៈដែលស្រុកមង្គលបូរីកំពុងស្ថិតក្រោមការសាងសង់។ ទោះជាយ៉ាងណាក្តី រដ្ឋបាលខេត្តបានប្តេជ្ញាចិត្តបន្តការសាងសង់អគាររដ្ឋបាលស្តង់ដារជូនដល់ក្រុង-ស្រុកដែលនៅសេសសល់ចំនួន៣ទៀតគឺ ក្រុងប៉ោយប៉ែត ស្រុកម៉ាឡៃ និងស្រុកស្វាយចេក នៅក្នុងឆ្នាំបន្តបន្ទាប់។

ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានមានប្រសាសន៍បញ្ជាក់ពីការប្តេជ្ញាចិត្តរបស់រដ្ឋបាលខេត្តក្នុងការបន្តកែលម្អហេដ្ឋារចនាសម្ព័ន្ធរដ្ឋបាលនៅតាមបណ្តាក្រុង-ស្រុកនានា ដើម្បីធានាបាននូវការផ្តល់សេវាសាធារណៈដែលមានគុណភាព តម្លាភាព និងឆាប់រហ័សជូនប្រជាពលរដ្ឋ។ ឯកឧត្តមបានសង្កត់ធ្ងន់ថា ការសាងសង់អគាររដ្ឋបាលថ្មីនេះ មិនត្រឹមតែជាការលើកកម្ពស់រូបរាង និងបរិយាកាសការងារប៉ុណ្ណោះទេ ប៉ុន្តែវាក៏ជាការវិនិយោគដ៏សំខាន់ក្នុងការពង្រឹងអភិបាលកិច្ចល្អ និងការបម្រើប្រជាពលរដ្ឋឱ្យកាន់តែមានប្រសិទ្ធភាព។

ការសាងសង់អគាររដ្ឋបាលស្រុកព្រះនេត្រព្រះនេះគឺជាជំហានដ៏សំខាន់មួយទៀតរបស់រដ្ឋបាលខេត្តបន្ទាយមានជ័យ ក្នុងការសម្រេចបាននូវគោលដៅនៃការមានអគាររដ្ឋបាលស្តង់ដារនៅគ្រប់បណ្តាក្រុង-ស្រុកទាំងអស់ក្នុងខេត្ត ដែលជាការឆ្លុះបញ្ចាំងពីការយកចិត្តទុកដាក់ខ្ពស់ចំពោះការលើកកម្ពស់គុណភាពនៃការផ្តល់សេវាសាធារណៈជូនប្រជាពលរដ្ឋ៕

ដោយ ឈុន សារ៉ាត