AKP កំពង់ធំ ថ្ងៃទី២១ ខែមេសា ឆ្នាំ២០២៥--

ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ និងលោក ហ្សង់ ហ្វីលីព (Jean Philippe BRUN) ប្រធានអង្គការសហគមន៍បឹងទន្លេសាបនៃប្រទេសបារាំង អញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់សមិទ្ធផលអគារសិក្សា០១ខ្នង ០៣បន្ទប់ ស្ថិតក្នុងសាលាបឋមសិក្សាគគីរ ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ នាព្រឹកថ្ងៃទី២១ ខែមេសា ឆ្នាំ២០២៥ ដោយមានការអញ្ជើញចូលរួមពីថ្នាក់ដឹកនាំមន្ទីរអង្គភាពជុំវិញខេត្តលោកអភិបាលស្រុកកងកម្លាំងទាំងបី លោកមេឃុំ លោកគ្រូអ្នកគ្រូ សិស្សានុសិស្ស និងប្រជាពលរដ្ឋសរុបចំនួន៦៥៨នាក់។

ឯកឧត្តម នួន ផារ័ត្ន បានមានប្រសាសន៍ថា គ្រួសារមួយដែលខ្លាំងសហគមន៍មួយដែលខ្លាំង ប្រទេសជាតិមួយដែលខ្លាំង គឺអាស្រ័យ ដោយសារគ្រួសារនោះ សហគមន៍នោះ ឬប្រទេសនោះមានធនធានមនុស្សដែលខ្លាំង មានសមត្ថភាពប្រកបដោយសីលធម៌ និងគុណធម៌។ ការកសាងបាននូវធនធានមនុស្សដែលខ្លាំងគឺអាស្រ័យលើកត្តាធំៗ៥គឺ៖ ១. កត្តាសិស្សខ្លួនឯង គ្មានចំណេះដឹងណាដែលកើតឡើងដោយឯកឯង ដោយមិនមានការខិតខំប្រឹងប្រែងនោះទេ។មានតែការប្រឹងប្រែងសិក្សារៀនសូត្រជាប្រចាំប្រកបដោយវិន័យ និងការតាំងចិត្តខ្ពស់ទើបអាចទទួលបានជោគជ័យក្នុងជីវិត។ ២. កត្តាគ្រូបង្រៀនបើមិនមានលោកគ្រូអ្នកគ្រូដែល ប្រកបដោយសមត្ថភាព ឆន្ទៈ និងមសិកាវិជ្ជាជីវៈច្បាស់លាស់ ជាអ្នកតម្រែតម្រង់ ណែនាំ បង្ហាត់បង្រៀនទាំងចំណេះដឹង ចំណេះធ្វើ សីលធម៌ គុណធម៌ដោយយកចិត្តទុកដាក់នៅសាលារៀន។ ៣. កត្តាសាលារៀនមានការតាំងចិត្តរៀនសូត្រខ្លួនឯងហើយ មានលោកគ្រូអ្នក គ្រូគ្រប់គ្រាន់ហើយ តែបើគ្មានសាលារៀនត្រឹមត្រូវ គ្មានកម្មវិធីសិក្សាច្បាស់លាស់ ក៏ធ្វើឱ្យដំណើរ នៃការអភិវឌ្ឍវិស័យអប់រំមានការលំបាក និងយឺតយ៉ាវផងដែរ។ ៤. កត្តាដែលមិនអាចខ្វះបាន នោះគឺការចូលរួមរបស់មាតាបិតាអាណាព្យាបាលដែលដើរតួនាទីយ៉ាងសំខាន់ក្នុងការតាមដាន ត្រួតពិនិត្យនិងជំរុញការសិក្សាអប់រំរបស់កុមារា កុមារីនៅផ្ទះ។ ការបញ្ជូនកូនមកសាលារៀន ប្រៀបដូចជាការសន្សំលុយទុកឱ្យកូននៅពេលធំពេញវ័យ ចំណែក្នុងការតាមដាន និងជំរុញការ សិក្សារបស់កូននៅផ្ទះប្រៀបដូចជាការតាមដានប្រាក់សន្សំរបស់ខ្លួនដើម្បីធានាថាប្រាក់សន្សំនេះ មិនបាត់បង់ ឬខុសខូតដោយប្រការណាមួយ និង៥. កត្តាចូលរួមពីសហគមន៍ អាជ្ញាធរមូលដ្ឋាន និងសប្បុរសជនកាន់តែឆាប់រហ័ស ដែលកត្តាជាកម្លាំងជំរុញឱ្យការអភិវឌ្ឍធនធានមនុស្សកាន់តែរីកលូតលាស់។

លោក ហ្សង់ ហ្វីលីព ប្រធានអង្គការសហគមន៍បឹងទន្លេសាបនៃប្រទេសបារាំង បានមានប្រសាសន៍ថា អស់រយៈពេលជាង១២ឆ្នាំមកហើយដែលអង្គការសហគមន៍បឹងទន្លេសាប ដំណើរការការងាររបស់ខ្លួនក្នុងការប្រមូលផ្តុំគ្នា ក្នុងគោលបំណងក្រុមធំមួយ គឺជួយប្រជាជនក្នុងតំបន់ជនបទនៃប្រទេសកម្ពុជា ក្នុងការសាងសង់ឬកែជុសជុលសាលារៀន។ បានជ្រើសរើសប្រសិទ្ធនាមអង្គការថា "អង្គការសហគមន៍បឹងទន្លេសាប" ជាការគោរពដឹងគុណដល់បឹងទន្លេសាបដ៏ធំជាងគេមួយក្នុងតំបន់អាស៊ីអាគ្នេយ៍។ សម្រាប់ពួកយើង បឹងទន្លេសាបនេះ គឺជានិម្មិត្តរូបនៃប្រទេសដ៏ស្រស់ត្រកាលរបស់អ្នក។ បឹងទន្លេសាបនេះហើយបានផ្តល់នូវធនធានមច្ឆជាតិ ផ្តល់នូវធនធានទឹកដែលអាចស្រោចស្រពស្រែចម្ការរបស់អ្នក ហើយក៏ជាបឹងដែលតំណាងឱ្យភោគទ្រព្យយ៉ាងពិតប្រាកដសម្រាប់ ប្រជាជននិងប្រទេសកម្ពុជា។ ពួកយើងសប្បាយចិត្តណាស់ ដែលបានជ្រើសរើសយកនិម្មិតសញ្ញានេះដើម្បីចូលរួមក្នុងការជួយអ្នក។

សូមបញ្ជាក់ថា អគារសិក្សាដែលត្រូវសម្ពោធ និងកាត់ខ្សែបូដាក់ឱ្យប្រើប្រាស់ នាពេលនេះមានបណ្ដោយ២៧ម៉ែត្រ ទទឹង០៨ម៉ែត្រ កម្ពស់០៣ម៉ែត្រ មាន០៣បន្ទប់ ធ្វើអំពីបេតុងដំបូលប្រក់ក្បឿងដោយចំណាយទឹកប្រាក់អស់៤៤០០០ដុល្លារសហរដ្ឋអាមេរិក។ ក្នុងឱកាសនោះគណៈអធិបតីអញ្ជើញចែកអំណោយដល់សិស្សានុសិស្ស១០០នាក់ ក្នុងម្នាក់ទទួលបានសៀវភៅ២ក្បាល ប៊ិច២ដើម និងថវិកា៥០០០រៀលដែលជាអំណោយរបស់សាលាស្រុកប្រាសាទបល័្លង្ក លោកគ្រូអ្នកគ្រូ១៣៨នាក់ ក្នុងម្នាក់ទទួលបានថវិកា២ម៉ឺនរៀល៕

ដោយ ស៊ុម វណ្ណា