AKP កំពង់ធំ ថ្ងៃទី២១ ខែមេសា ឆ្នាំ២០២៥-- ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម និងជាប្រធានក្រុមការងារចុះមូលដ្ឋានឃុំចំណាលើ បានអំពាវដល់បេក្ខជន និងប្រជាពលរដ្ឋត្រូវមានស្វាមីភក្តិចំពោះគណបក្ស និងថ្នាក់ដឹកនាំគណបក្សប្រជាជនកម្ពុជា ដើម្បីសុខសន្តិភាព និងការអភិវឌ្ឍ ក្នុងឱកាសដែលឯកឧត្តម និងសហការី ព្រមទាំងលោក សាយ គឹមឡម អភិបាលស្រុកស្ទោង អញ្ជើញជួបសំណេះសំណាលសួរសុខទុក្ខប្រជាពលរដ្ឋនៅក្នុងឃុំចំណាលើ ស្រុកស្ទោង ខេត្តកំពង់ធំ កាលពីថ្ងៃទី២០ ខែមេសា ឆ្នាំ២០២៥។

ក្នុងឱកាសនោះ ឯកឧត្តម ចាន់ ស៊ីណាត បានពាំនាំការផ្ដាំផ្ញើសួរសុខទុក្ខពីសំណាក់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានក្រុមការងារចុះមូលដ្ឋានស្រុកស្ទោងដែលឯកឧត្តមតែងតែគិតគូរយកចិត្តទុកដាក់ដល់សុខទុក្ខ សុមាលភាពជីវភាពរស់នៅរបស់បងប្អូនប្រជាពលរដ្ឋជាពិសេសបានជួយកសាងនូវហេដ្ឋារចនាសម្ព័ន្ធប្រព័ន្ធធារាសាស្ត្រផ្លូវគមនាគមន៍ជាច្រើននៅក្នុងមូលដ្ឋានស្រុកស្ទោង។

ឯកឧត្តម ចាន់ ស៊ីណាត បានអំពាវនាវដល់ក្រុមការងារទាំងអស់នៅក្នុងមូលដ្ឋានឃុំចំណាលើត្រូវធ្វើខ្លួនជាអ្នកបម្រើ ជាអ្នកជួយប្រជាពលរដ្ឋឱ្យអស់ពីចិត្តពីថ្លើមទាំងកម្លាំងកាយចិត្តដើម្បីប្រជាពលរដ្ឋនៅទូទាំងឃុំចំណាលើ និងនាំគណបក្សប្រជាជនកម្ពុជាឈានទៅទទួលជ័យជំនះគ្រប់សមរភូមិបោះឆ្នោត។ ត្រូវធ្វើខ្លួនជាមនុស្សល្អជាមនុស្សគំរូសម្រាប់ប្រជាពលរដ្ឋក៏ដូចជាគណបក្សទាំងមូល ជាពិសេសត្រូវខិតខំអំពាវនាវកៀរគរអ្នកដែលមាននិន្នាការនយោបាយផ្សេងពីគណបក្សប្រជាជនកម្ពុជាឱ្យជឿទុកចិត្ត និងងាកមកចូលរួមជីវភាពនយោបាយជាមួយគណបក្សប្រជាជនកម្ពុជាដើម្បីចូលរួមអភិវឌ្ឍ និងថែរក្សាសុខសន្តិភាពជូនជាតិមាតុភូមិ និងបានអំពាវនាវដល់ប្រជាពលរដ្ឋនៅក្នុងមូលដ្ឋានត្រូវខិតខំនាំគ្នាថែរក្សានូវសមិទ្ធផលនានាដែលគណបក្សក៏ដូចជារាជរដ្ឋាភិបាលបានសាងសង់ជូនជាពិសេសប្រព័ន្ធធារាសាស្ត្រផ្លូវថ្នល់ផ្លូវគមនាគមន៍ និងផ្លូវបេតុងដែលកំពុងសាងសង់ឱ្យបានគង់វង្សស្ថិតស្ថេរប្រើប្រាស់បានយូរអង្វែង និងបែងចែកការប្រើប្រាស់ឱ្យបានស្មើៗគ្នា និងទទួលផលរួមគ្នា។

លោក សាយ គឹមឡម អភិបាលស្រុកស្ទោង បានថ្លែងអំណរគុណដល់ឯកឧត្តម ថោ ជេដ្ឋា ប្រធានក្រុមការងារចុះមូលដ្ឋានស្រុកស្ទោង និងឯកឧត្តម ចាន់ ស៊ីណាត ប្រធានក្រុមការងារចុះមូលដ្ឋានឃុំចំណាលើដែលបានបង្កើតព្រឹត្តិការណ៍សង្ក្រាន្តស្រុកស្ទោង ក៏ដូចជាសង្ក្រាន្តឃុំចំណាលើជូនប្រជាពលរដ្ឋបានកម្សាន្តសប្បាយឆ្នាំថ្មី និងទទួលបាននូវរង្វាន់យ៉ាងច្រើនសន្ធឹកសន្ធាប់ជាទីគាប់ចិត្តថែមទៀតផង។

ឆ្លៀតក្នុងឱកាសនោះ ឯកឧត្តម ចាន់ ស៊ីណាត បានអញ្ជើញពិនិត្យមើលវឌ្ឍនភាពសាងសង់ផ្លូវបេតុងប្រវែងជាង១១គីឡូម៉ែត្រ ទទឹង៥ម៉ែត្រ កម្រាស់០,២ម៉ែត្រ ព្រមទាំងអគារស្នាក់ការគណបក្សប្រជាជនកម្ពុជាឃុំចំណាលើ ដែលសមិទ្ធផលទាំងពីរនេះកំពុងដំណើរការសាងសង់បានប្រមាណ៣០ភាគរយហើយ ព្រមទាំងឧបត្ថម្ភថវិកាសរុបជាង៣១លានរៀលដល់អ្នកចូលរួមដល់វត្តទាំង៦នៅក្នុងឃុំចំណាលើ ដល់គណបក្សស្រុក និងគណបក្សឃុំផងដែរ៕

ដោយ ស៊ុម វណ្ណា