AKPភ្នំពេញថ្ងៃទី១៩ ខែមេសា ឆ្នាំ២០២៥ --

 គណៈកម្មការវាយតម្លៃនិងជ្រើសរើសសហគ្រាសមួយជាសហគមន៍សុខសាន្តមួយសម្រាប់ឆ្នាំ ២០២៥ ដែលជាយន្តការត្រីភាគី បានបើកកិច្ចប្រជុំដើម្បីពិនិត្យ វាយតម្លៃ និងជ្រើសរើសបញ្ជីបេក្ខភាពសហគ្រាស ដែលនឹងត្រូវទទួលពានរង្វាន់សហគ្រាសមួយជាសហគមន៍សុខសាន្តមួយ ប្រចាំឆ្នាំ២០២៥ ក្រោមអធិបតីភាព លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មការ វាយតម្លៃ និងជ្រើសរើសសហគ្រាសមួយជាសហគមន៍សុខសាន្តមួយ ប្រចាំឆ្នាំ២០២៥ និងមានការចូលរួមពីសមាជិក សមាជិកាគណៈកម្មការស្របតាមកូរ៉ុមដែលបានកំណត់។

តាមរយៈកិច្ចប្រជុំកាលពីថ្ងៃ ទី១៨ ខែមេសា ឆ្នាំ២០២៥ នៅទីស្តីការក្រសួងការងារ និងបណ្តុះបណ្តាលវិជ្ជាជីវៈ
គណៈកម្មការវាយតម្លៃ ការជ្រើសរើសសហគ្រាសមួយជាសហគមន៍សុខសាន្តមួយត្រូវអនុវត្តស្របតាមលិខិតបទដ្ឋានគតិយុត្តជាធរមាននៃព្រះរាជាណាចក្រកម្ពុជា។ ដើម្បីទទួលបានពានរង្វាន់ "សហគ្រាសមួយជាសហគមន៍សុខសាន្តមួយ" សហគ្រាសត្រូវបំពេញគ្រប់លក្ខខណ្ឌវិនិច្ឆ័យនៃអនុលោមភាពចំនួន ៨ ដូចខាងក្រោម៖
១- អនុលោមភាពនៃលក្ខខណ្ឌការងារ
២- អនុលោមភាពនៃការប្រើប្រាស់កម្មករនិយោជិតវ័យក្មេង
៣- អនុលោមភាពនៃទំនាក់ទំនងវិជ្ជាជីវៈ
៤- អនុលោមភាពនៃលក្ខខណ្ឌស្តីពីសុវត្ថិភាព និងសុខភាពការងារ
៥- អនុលោមភាពនៃរបបសន្តិសុខសង្គម
៦- អនុលោមភាពនៃការប្រើប្រាស់កម្មករនិយោជិតជាជនពិការ
៧- អនុលោមភាពនៃការអនុវត្តកម្មវិធីលើកកម្ពស់ផលិតភាពការងារ
៨- អនុលោមភាពនៃការអនុវត្តកម្មវិធីទទួលខុសត្រូវសង្គម។
ពានរង្វាន់ "សហគ្រាសមួយជាសហគមន៍សុខសាន្តមួយ" ជាពានរង្វាន់ថ្នាក់ជាតិ ដែលត្រូវបានបែងចែកជា ៣កម្រិត៖ ផ្កាយ១ ផ្កាយ២ និងផ្កាយ៣ ទៅតាមចំនួនកម្មករនិយោជិតនៃសហគ្រាសតាមវិស័យនីមួយៗ។ ផ្អែកលើលក្ខខណ្ឌវិនិច្ឆ័យ និងនីតិវិធី ដែលបានកំណត់ គណៈកម្មការវាយតម្លៃបានធ្វើការពិនិត្យនិងវាយតម្លៃយ៉ាងល្អិតល្អន់លើគ្រប់ទិដ្ឋភាព ដើម្បីធានាថា ពានរង្វាន់ដែលផ្តល់ជូនអាចបញ្ជាក់យ៉ាងច្បាស់អំពីអនុលោមភាពរបស់សហគ្រាសជ័យលាភីនីមួយៗ និងសុខដុមនីយកម្មក្នុងទំនាក់ទំនងវិជ្ជាជីវៈនៅតាមសហគ្រាសទាំងនោះ។ 

តាមរយៈការពិនិត្យ និងផ្ទៀងផ្ទាត់លើលទ្ធផលនៃរបាយការណ៍ស្វ័យប្រកាសអធិការកិច្ចការងាររបស់សហគ្រាស គណៈកម្មការវាយតម្លៃបានបោះឆ្នោតផ្តល់ការឯកភាពលើបញ្ជីបេក្ខភាពសហគ្រាសដែលនឹងត្រូវទទួលបានពានរង្វាន់សហគ្រាសមួយជាសហគមន៍សុខសាន្តមួយ ប្រចាំឆ្នាំ២០២៥។សហគ្រាសជ័យលាភីនឹងត្រូវប្រកាសជាផ្លូវការនៅក្នុងពិធីអបអរសាទរខួបអនុស្សាវរីយ៍លើកទី១៣៩ នៃទិវាពលកម្មអន្តរជាតិ ១ ឧសភា នាសប្តាហ៍ក្រោយនេះ៕

ដោយ៖ ពេជ្រ សំអឿន(ប្រភព៖ក្រសួងការងារ និងបណ្តុះបណ្តាលវិជ្ជាជីវៈ)