AKP បន្ទាយមានជ័យ ថ្ងៃទី១៧ ខែមេសា ឆ្នាំ២០២៥-- ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ នៅថ្ងៃទី១៧ ខែមេសា ឆ្នាំ២០២៥ បានដឹកនាំក្រុមការងារគណៈកម្មាធិការគ្រប់គ្រងគ្រោះមហន្តរាយថ្នាក់ខេត្ត និងសហការជាមួយគណៈកម្មាធិការគ្រប់គ្រងគ្រោះមហន្តរាយថ្នាក់ក្រុងសិរីសោភ័ណ ព្រមទាំងកងកម្លាំងពាក់ព័ន្ធចុះទៅពិនិត្យ និងជួយជួសជុលផ្ទះសម្បែងរបស់បងប្អូនប្រជាពលរដ្ឋ ដែលរងគ្រោះដោយសារបាតុភូតខ្យល់កន្ត្រាក់កាលពីរសៀលថ្ងៃទី១៦ ខែមេសា ឆ្នាំ២០២៥ នៅក្នុងក្រុងសិរីសោភ័ណ។

ក្នុងឱកាសចុះពិនិត្យ និងជួយសាងសង់នោះ ឯកឧត្តម អ៊ុំ រាត្រី បានសម្តែងនូវការសោកស្តាយចំពោះគ្រោះធម្មជាតិដែលបានកើតឡើង និងបានលើកទឹកចិត្តបងប្អូនប្រជាពលរដ្ឋដែលរងគ្រោះ សូមកុំអស់សង្ឃឹម និងខិតខំស្តារលំនៅដ្ឋានឡើងវិញ។ ឯកឧត្តមបានបញ្ជាក់ថា រដ្ឋបាលខេត្តនឹងបន្តសហការជាមួយអាជ្ញាធរក្រុង ឃុំ ដើម្បីផ្តល់ការគាំទ្រ និងជំនួយសង្គ្រោះបន្ទាន់ដល់បងប្អូនដែលរងផលប៉ះពាល់។

ជាមួយគ្នានោះ ឯកឧត្តមអភិបាលខេត្ត ក៏បានក្រើនរំលឹកដល់បងប្អូនប្រជាពលរដ្ឋទាំងអស់ សូមបង្កើនការប្រុងប្រយ័ត្នចំពោះបាតុភូតធម្មជាតិ ដូចជា ខ្យល់កន្ត្រាក់ និងរន្ទះបាញ់ ដែលអាចកើតមានឡើងជាយថាហេតុ ជាពិសេសនៅពេលមានភ្លៀងធ្លាក់ សូមកុំជ្រកនៅក្រោមដើមឈើធំៗ ឬនៅជិតបង្គោលភ្លើង ដើម្បីចៀសវាងគ្រោះថ្នាក់ជាយថាហេតុ។

យោងតាមរបាយការណ៍របស់គណៈកម្មាធិការគ្រប់គ្រងគ្រោះមហន្តរាយខេត្តបន្ទាយមានជ័យ បានឱ្យដឹងថា កាលពីរសៀលថ្ងៃទី១៦ ខែមេសា ឆ្នាំ២០២៥ មានភ្លៀងធ្លាក់លាយឡំនឹងខ្យល់កន្ត្រាក់ បានបោកបក់មកលើស្រុកចំនួន ៣ ក្នុងខេត្តបន្ទាយមានជ័យ បណ្តាលឱ្យប៉ះពាល់ផ្ទះប្រជាពលរដ្ឋសរុបចំនួន៣៧ខ្នង កុដិលោក ១ ខ្នង ជង្រុក ១ ខ្នង ដើមឈើ១៨ដើម និងដំបូលស័ង្កសីចំនួន៤២៣សន្លឹក។ ក្នុងនោះក្រុងសិរីសោភ័ណរងការប៉ះពាល់ខ្លាំងជាងគេ ប៉ះពាល់ដល់សង្កាត់ចំនួន ២ បណ្តាលឱ្យខូចខាតផ្ទះប្រជាពលរដ្ឋ ២៥ខ្នង កុដិលោក១ខ្នង ដើមឈើ១៣ដើម និងស័ង្កសី២៦៥សន្លឹក។ ក្រៅពីនោះ ស្រុកស្វាយចេកប៉ះពាល់ផ្ទះ១១ខ្នង ជង្រុក១ខ្នង និងស័ង្កសី១៤២សន្លឹក និងស្រុកមង្គលបូរីប៉ះពាល់ផ្ទះ១ខ្នង និងស័ង្កសី ១៦ សន្លឹក៕

ដោយ ឈុន សារ៉ាត